మాజీ మంత్రి నారాయణకు ఏపీ హైకోర్టులో ఊరాట

టీడీపీ నేత, మాజీ మంత్రి నారాయణకు ఏపీ హైకోర్టులో ఊరాట లభించింది. ఆంధ్రప్రదేశ్‌లో పదో తరగతి ప్రశ్నపత్రం లీకేజీ ఆరోపణల కేసులో తెలుగు దేశం పార్టీ నాయకుడు, మాజీ మంత్రి నారాయణకు ఊరట లభించింది. మాజీ మంత్రి నారాయణ బెయిల్‌ రద్దు పిటిషన్‌పై చిత్తూరు సెషన్స్‌ కోర్టు ఇచ్చిన ఉత్తర్వులను హైకోర్టు రద్దు చేసింది. ఈ కేసును మళ్లీ విచారించి నాలుగు వారాల్లో నిర్ణయం తీసుకోవాలని సెషన్స్‌ కోర్టును ఉన్నత న్యాయస్థానం ఆదేశించింది. నారాయణకు చిత్తూరు మెజిస్ట్రేట్‌ కోర్టు ఇచ్చిన బెయిల్‌ను గత నెల 30న సెషన్స్‌ కోర్టు రద్దు చేసింది. వెంటనే కోర్టులో లొంగిపోవాలని ఆదేశించింది.

ఈ ఆదేశాలను మాజీ మంత్రి నారాయణ హైకోర్టులో సవాల్‌ చేశారు. దీనిపై మంగళవారం హైకోర్టులో విచారణ జరిగింది. అయితే, ఈ కేసులో రివిజన్‌ పిటిషన్‌కు విచారణ అర్హత లేదన్న నారాయణ తరపు న్యాయవాది వాదనను ఆంధ్రప్రదేశ్‌ హైకోర్టు తోసిపుచ్చింది. కేసు పూర్వాపరాల ఆధారంగా తిరిగి విచారణ జరపాలని సెషన్స్‌ కోర్టుకి ఆదేశాలు జారీ చేసింది.

మరోవైపు, పదో తరగతి ప్రశ్నపత్రం లీక్‌ చేయడం ద్వారా నారాయణ విద్యా సంస్థల అధిపతి, మాజీ మంత్రి పొంగూరు నారాయణ ఎంతో మంది విద్యార్థుల జీవితాలతో ఆడుకున్నారని రాష్ట్ర ప్రభుత్వం తరఫున అదనపు అడ్వొకేట్‌ జనరల్‌ (ఏఏజీ) పొన్నవోలు సుధాకర్‌రెడ్డి హైకోర్టుకు నివేదించారు. ఇలాంటి వారి పట్ల న్యాయస్థానం మెతక వైఖరి అవలంబించకూడదని అన్నారు.

తీవ్ర నేరానికి పాల్పడిన నారాయణకు రిమాండ్‌ తిరస్కరించి, బెయిల్‌ మంజూరు చేయడం ద్వారా మేజిస్ట్రేట్‌ తప్పు చేశారని, పరిధి దాటి వ్యవహరించారని, మినీ ట్రయల్‌ నిర్వహించారని ఏఏజీ సుధాకర్ రెడ్డి తెలిపారు. ఇది ఎంతమాత్రం సమర్థనీయం కాదన్నారు. సెషన్స్‌ కోర్టు ఉత్తర్వుల్లో జోక్యం చేసుకుంటే, మేజిస్ట్రేట్ల తప్పులను సమర్థించినట్లవుతుందని తెలిపారు. అందువల్ల నారాయణ దాఖలు చేసిన క్వాష్‌ పిటిషన్‌ను కొట్టేయాలని కోరారు. ఈ క్రమంలో నారాయణ బెయిల్‌ రద్దు పిటిషన్‌పై చిత్తూరు సెషన్స్‌ కోర్టు ఇచ్చిన ఉత్తర్వులను హైకోర్టు రద్దు చేసింది. ఈ కేసును మళ్లీ విచారించి 4 వారాల్లో నిర్ణయం తీసుకోవాలని సెషన్స్‌ కోర్టును హైకోర్టు ఆదేశించింది.