గృహ నిర్మాణ లక్ష్యాన్ని పూర్తి చేయాలి: ఓఎస్డీ

పేదలకు పంపిణీ చేసే గృహ నిర్మాణ పనులను లక్ష్యం మేరకు త్వరితగతిన పూర్తి చేయాలని పాడా ఓఎస్డీ అనిల్ కుమార్ రెడ్డి అధికారులను ఆదేశించారు. గురువారం స్థానిక ఎంపిడిఓ కార్యాలయంలో ఆర్డీఓ వెంకటేషు, హౌసింగ్ డీఈ బాల గంగన్న, మండల స్పెషల్ ఆఫీసర్ రవీంద్రనాథ్ రెడ్డి, ఎంపిపి ఎన్. లక్ష్మిగాయిత్రీ లతో కలిసి సచివాలయ ఉద్యోగులు, ప్రజాప్రతినిధులతో సమీక్షా సమావేశం నిర్వహించారు.

ప్రభుత్వం చేపట్టే గృహ నిర్మాణ పనుల పురోగతిపై ఇంజనీరింగ్ అసిస్టెంట్లతో ఆరాతీసారు. ఈ సందర్భంగా ఆయన మాట్లాడుతూ మండల వ్యాప్తంగా జగనన్న కాలనీలో గృహా నిర్మాణాల ప్రక్రియను మరింత వేగవంతం చేయాలని సూచించారు. జగనన్న గృహ నిర్మాణాలలో ఎలాంటి లోటుపాట్లకు తావు లేకుండా పూర్తి అవగాహనతో లక్ష్యాలను అధిగమించాలన్నారు. పేదలకు పంపిణీ చేసే గృహ నిర్మాణాలకు రాష్ట్ర ప్రభుత్వం అత్యధిక ప్రాధాన్యత ఇస్తుందనే విషయాన్ని ప్రతి ఒక్కరూ దృష్టిలో పెట్టుకుని పనిచేయాలని ఆదేశించారు. ముఖ్యమంత్రి ఆశయాలకు అణుగుణంగా సచివాలయాల ఉద్యోగులు తమ విధులను సక్రమంగా నిర్వహించాలన్నారు.

సంబంధిత శాఖల అధికారులు సమన్వయంతో పనిచేసి లబ్ధిదారులతో త్వరితగతిన గృహ నిర్మాణాలు పూర్తి చేసేలా చర్యలు చేపట్టాలన్నారు. అలాగే మండల స్థాయి అధికారులు లేఔట్ లపై ప్రత్యేక దృష్టి సారించి, లేఔట్ లను సందర్శించాలని సూచించారు. ముఖ్యంగా వేంపల్లె సచివాలయం 1, 3, 7, 8 పరిధిల్లోని మంజూరైన గృహ లబ్ధిదారులు వేగవంతంగా ఇళ్ల నిర్మాణాలు చేసేందుకు సమీక్ష సమావేశాలు నిర్వహించాలని, అందుకు తగిన విధంగా చర్యలు తీసుకోవాలని సూచించారు. అంతేకాకుండా ఇంజనీరింగ్ అసిస్టెంట్లు లబ్ధిదారులు గృహ నిర్మాణ పనులు త్వరితగతిన పూర్తి చేసేందుకు ప్రత్యేక చొరవ చూపాలని ఆదేశించారు.

ఈ కార్యక్రమంలో ఎంపిడిఓ మల్లికార్జునరెడ్డి, తహసీల్దార్ ఎన్. చంద్రశేఖర్ రెడ్డి, హౌసింగ్ ఏఈ సుక్రమరెడ్డి, ఏపిఎం బాలస్వామి, ఎంపిటిసిలు కటిక చంద్రశేఖర్, మణి గోపాల్ రెడ్డి, చంద్ర ఓబుల్ రెడ్డి, హబిబుల్లా, శివశంకర్ రెడ్డి, సర్పంచులు మధు ప్రభాకర్ రెడ్డి, నాగరాజు, సచివాలయ ఉద్యోగులు తదితరులు పాల్గొన్నారు.