టీడీపీ, జనసేన కూటమికి భారీ మెజార్టీ.... ఎంపీ రఘురామ కృష్ణరాజు.

రాష్ట్రంలో ఇప్పటికిప్పుడు ఎన్నికలు జరిగితే తెలుగుదేశం, జనసేన పార్టీల కూటమి భారీ మెజార్టీతో విజయం సాధించడం ఖాయమన్నారు ఎంపీ రఘురామ కృష్ణరాజు. వైఎస్సార్‌సీపీ వై నాట్ 175 అని మేకపోతు గాంభీర్యాన్ని ప్రదర్శిస్తున్నప్పటికీ.. కలలో కూడా అది జరిగే అవకాశమే లేదన్నారు. టీడీపీకి అనూహ్య ఆదరణ లభించడం ఆశ్చర్యకర పరిణామమని.. రానున్న ఎన్నికల్లో తమ పార్టీ ఎలా మ్యాజిక్ ఫిగర్ సాధిస్తుందో అర్థం కావడం లేదన్నారు.

ప్రస్తుత ట్రెండ్ పరిశీలిస్తే, తమ పార్టీకి దారుణమైన పరాభవం తప్పేలా లేదని అన్నారు. అబద్దాలతో ఎన్నిరోజులు ఈ నాటకాలను ఆడగలమని.. గత ఎన్నికల్లో అప్రతిహత విజయానికి దోహదపడిన అంశాలు ఎన్నో ఉన్నాయన్నారు. అందులో ఒక్క అవకాశం ఇవ్వండి రాజన్న రాజ్యం చేసి చూపిస్తానని హామీ ఇవ్వడం.. అలాగే ప్రజలు అవకాశమే కదా అని మనకు ఒక అవకాశం ఇచ్చారని అన్నారు. 

12% నుంచి 14% ఎక్కువ మెజార్టీ ఆ పార్టీలకు లభించే అవకాశం ఉంది అన్నారు. కుల, మతాలకతీతంగా అన్ని వర్గాలు ఆ కూటమికి అంగా నిలిచే అవకాశాలు కనిపిస్తున్నాయి అన్నారు. ఇటీవల తాను ప్రాంతాల వారిగా ఫ్లాష్ సర్వే నిర్వహించినట్లు వివరించారు. ఈ సర్వేలో టీడీపీ, జనసేన కూటమికి స్పష్టమైన మెజారిటీ లభిస్తుందని తేటతెల్లమయిందన్నారు. ఉత్తరాంధ్రలో 10% నుంచి 12% టీడీపీ, జనసేనలకు ఎడ్జ్ ఉంటే.. ఉభయగోదావరి జిల్లాలలో 14% నుంచి 16%శాతం.. అలాగే కృష్ణా, గుంటూరు జిల్లాలలో 12% నుంచి 14%.. ఒంగోలు నెల్లూరులలో 8% నుంచి 10%.. అనంతపురం, కర్నూలులలో 10% నుంచి 12%, కడప చిత్తూరులలో 6% నుంచి 8% టీడీపీ, జనసేన కూటమికి ఎడ్జ్ ఉందని తెలిపారు. టీడీపీ, జనసేన కలిసి పోటీ చేస్తాయని తాను మొదటి నుంచి చెబుతున్నాను అన్నారు.

రాష్ట్ర ప్రజలకు మనం ఇచ్చిన హామీలలో 98.7% హామీలను అధికారంలోకి వచ్చిన తర్వాత అమలు చేయలేదంటే ప్రజలు నమ్ముతారని.. అంతేకానీ 98.7% హామీలను అమలు చేశామంటే ఎవరూ నమ్మరన్నారు. చెప్పనివి కూడా చేశామంటే నిజమేనని.. ప్రజలపై చెత్త పన్ను వేస్తామని చెప్పలేదు కానీ వేశారన్నారు. అలాగే ఆస్తి పన్నును పెంచామని.. విద్యుత్ చార్జీలను ఏకంగా ఏడు సార్లు పెంచిన ఘనత ఈ ప్రభుత్వానికే దక్కిందన్నారు. తాను చేయించిన సర్వే ఫలితాల కంటే గొప్పగా ఏమీ ఫలితం కనిపించదని అన్నారు. 45 రోజుల వ్యవధిలో నియోజకవర్గాల వారీగా సర్వే ఫలితాలను వెల్లడిస్తాను అన్నారు. టీడీపీ జనసేన కలవడం, అగ్నికి వాయువు తోడైనట్లయిందని.. అది కారు చిచ్చులా మారుతుందన్నారు.