మోడీ భద్రతలో అలజడి...కమాండో వేషంలో దూరిన వ్యక్తి

ప్రధాని నరేంద్ర మోడీ భద్రత విషయంలో ఆందోళనకర పరిణామం నెలకొంది. ఎన్‌ఎస్‌జీ కమాండో వేషంలో ఓ వ్యక్తి.. ప్రధాని నరేంద్ర మోదీ భద్రతకు సంబంధించిన హై సెక్యూరిటీ జోన్‌లోకి ప్రవేశించేందుకు ప్రయత్నించాడు. పోలీసులు, భద్రతా సిబ్బంది అప్రమత్తమై అతడిని అదుపులోకి తీసుకున్నాడు. ప్రధాని మోదీ అక్కడికి చేరుకునేందుకు 90 నిమిషాల ముందే అతడిని అదుపులోకి తీసుకున్న భద్రతా సిబ్బంది.. మరో చోటకు తరలించి విచారిస్తున్నారు. దేశ ఆర్థిక రాజధాని ముంబైలో చోటు చేసుకున్న ఈ ఘటన కలకలం రేపింది. ఇండియన్ ఆర్మీలో ‘నాయక్’ కేడర్‌లో పనిచేస్తున్నట్లుగా నిందితుడు చెప్పుకున్నాడు. అతడి వద్ద నకిలీ ఎన్‌ఎస్‌జీ ఐడీ కార్డును కూడా స్వాధీనం చేసుకున్నట్లు అధికారులు తెలిపారు.

నిందితుడిని నవీ ముంబైకి చెందిన రామేశ్వర్ మిశ్రాగా గుర్తించినట్లు ముంబై పోలీసులు తెలిపారు. అతడు నేషనల్ సెక్యూరిటీ గార్డ్ (ఎన్‌ఎస్‌జీ) సిబ్బందిగా నటిస్తూ.. ప్రధానమంత్రి నరేంద్ర మోదీకి భద్రత కల్పించిన బీకేసీ ప్రాంతంలోకి ప్రవేశించే ప్రయత్నం చేశాడని వెల్లడించారు. ముంబైలోని బాంద్రా కుర్లా కాంప్లెక్స్ (BKC) వద్ద హై సెక్యూరిటీ వీవీఐపీ జోన్‌లోకి ప్రవేశించేందుకు ప్రయత్నించిన అతడిని ప్రధాని మోదీ రాకకు 90 నిమిషాల ముందే అరెస్టు చేసినట్లు తెలిపారు.

ప్రధాని మోదీకి సంబంధించిన హై సెక్యూరిటీ జోన్ వద్ద ఎస్‌పీజీ కమాండో వేషధారణలో కనిపించిన అతడి ప్రవర్తన అనుమానాస్పదంగా ఉండటంతో కాసేపు అనుసరించి, అదుపులోకి తీసుకున్నామని ముంబై పోలీసులు వివరించారు. రామేశ్వర్ మిశ్రాను ఐపీసీ సెక్షన్ 171, 465, 468, 471 కింద అరెస్ట్ చేసినట్లు పోలీసులు తెలిపారు. అతడిని బాంద్రా కోర్టులో హాజరుపరిచి కస్టడీ కోరినట్లు తెలిపారు. కోర్టు అతడిని జనవరి 24 వరకు పోలీసు కస్టడీకి అప్పగించింది. అతడు చెప్పిన వివరాలను పరిశీలిస్తున్నట్లు పోలీసులు తెలిపారు.