నేడు భారత్, న్యూజిలాండ్ మధ్య చివరి వన్డే

నేడు భారత్, న్యూజిలాండ్ మధ్య చివరి వన్డే జరగనుంది. 3 మ్యాచ్ ల వన్డే సిరీస్ లో భాగంగా మూడో వన్డే నేడు ఇండోర్ లో మధ్యాహ్నం 1:30 గంటల నుంచి జరగనుంది. క్లీన్ స్వీప్ లక్ష్యంగా భారత్, పరువు కోసం న్యూజిలాండ్ బరిలోకి దిగుతున్నాయి. ఈ మ్యాచ్ లో ఉమ్రాన్ మాలిక్ ఆడే అవకాశం కనిపిస్తోంది. భారత్ జట్టులో 1,2 మార్పులు జరిగే అవకాశం ఉంది. టాస్ గెలిచిన జట్టు బౌలింగ్ ఎంచుకునే అవకాశముంది.

రెండో వన్డేలో కివీస్ పతనాన్ని శాసించిన వెటరన్ పేసర్ మహమ్మద్ షమీకి మూడో వన్డేలో విశ్రాంతి ఇవ్వాలని టీమ్ ఇండియా మేనేజ్‌మెంట్ భావిస్తోంది. తొలి రెండు వన్డేల్లో అవకాశం దక్కించుకోని జమ్మూ ఎక్స్‌ప్రెస్‌కు చెందిన ఉమ్రాన్ మాలిక్‌ను మూడో వన్డేలో తీసుకోనున్నట్లు సమాచారం. తొలి రెండు వన్డేల్లో ఉమ్రాన్‌ను తీసుకోకపోవడం అభిమానులకు ఏమాత్రం నచ్చలేదు. శ్రీలంకపై అద్భుతంగా ఆడిన అతడికి కివీస్‌పై కూడా అవకాశం ఇవ్వాలని అభిమానులు డిమాండ్ చేస్తున్నారు. టీమిండియా స్టార్ ఆల్ రౌండర్ హార్దిక్ పాండ్యా ఫిట్ నెస్ పై బీసీసీఐ ప్రత్యేక దృష్టి సారించిన సంగతి తెలిసిందే. పరిమిత ఓవర్ల క్రికెట్‌లో టీమిండియాకు పాండ్యా చాలా కీలకం. కివీస్‌తో టీ20 సిరీస్ కూడా ఆడాల్సి ఉంది. దీంతో మూడో వన్డేలో అతనికి విశ్రాంతి ఇవ్వాలని టీమ్ ఇండియా భావిస్తోంది. అతని స్థానంలో బెంగాల్ ఆల్ రౌండర్ షాబాజ్ అహ్మద్‌కు అవకాశం కల్పించనున్నట్లు సమాచారం. బంగ్లాదేశ్‌తో వన్డే సిరీస్‌లో పెద్దగా ఆకట్టుకోలేకపోయిన షాబాజ్.. కివీస్‌పై సత్తా చాటాలని తహతహలాడుతున్నాడు. టీమిండియా స్టార్ విరాట్ కోహ్లీ స్పిన్ బౌలింగ్‌తో ఇబ్బంది పడ్డాడు. కివీస్‌తో జరిగిన రెండు వన్డేల్లో కోహ్లిని మిచెల్ సాంట్నర్ అవుట్ చేశాడు. అంతే కాకుండా బోర్డర్ గవాస్కర్ ట్రోఫీకి ముందు భారత జట్టు ఆటగాళ్లు రంజీ ఆడాలని మాజీ ఆటగాళ్లు చెబుతున్నారు. రవిశాస్త్రి తన వ్యాఖ్యానం సమయంలో కోహ్లీకి అదే సలహా ఇచ్చాడు. ఒకవేళ నిజంగానే కోహ్లీ ఢిల్లీ తరఫున రంజీ ఆడాలని నిర్ణయించుకుంటే, అతని స్థానంలో రజత్ పటీదార్ వచ్చే అవకాశం ఉంది. జడేజా, పుజారా ఇప్పటికే రంజీలు ఆడుతున్నారు. కోహ్లి కూడా అలాగే చేస్తాడనే టాక్ వినిపిస్తోంది. టీమ్ ఇండియాకు పాటిదార్ అరంగేట్రం చేయనున్నాడని సమాచారం.