ఇంటర్నల్ బ్లీడింగ్ కారణంగా స్టంట్ వేయలేదు: తారకరత్న ఆరోగ్యంపై బాలయ్య

గుండెపోటుగు గురైన సినీ హీరో తారకరత్న ఆరోగ్య పరిస్థితిని ఎప్పటికపుడు ఆయన బాబాయ్, హీరో బాలకృష్ణ దగ్గరుండి పరిశీలిస్తున్నారు.  ప్రస్తుతం బెంగళూరులోని హృదయాలయ ఆసుపత్రిలో ఆయనకు చికిత్స అందుతుండగా.. కన్నడ సినీ హీరో శివరాజ్ కుమార్‌తో కలిసి తారకరత్న ఆరోగ్య పరిస్థితిపై మీడియాతో మాట్లాడారు. తారకరత్నకు ఇంటర్నల్ బ్లీడింగ్ కారణంగా స్టంట్ వేయలేదన్నారు. ఇప్పుడు స్టంట్ వేస్తే మళ్లీ హార్ట్ అటాక్ వచ్చే ప్రమాదం ఉందని చెప్పారు. నిన్నటితో పోలిస్తే.. ఆరోగ్యం మెరుగ్గానే ఉన్నట్లు వెల్లడించారు.

"తారకతర్న ఆరోగ్య పరిస్థితి ప్రస్తుతం నిలకడగా ఉంది. నారాయణ హృదయాలలో బెటర్ ఐసీయూ కేర్ ఉందని తారకరత్నను ఇక్కడుకు తీసుకొచ్చాం. హైదరాబాద్ డాక్టర్లు కూడా ఈ ఆసుపత్రిని రికమండ్ చేశారు. అభిమానుల దీవెనలతో ప్రస్తుతం తారకరత్న ఆరోగ్యం నిలకడగా ఉంది. అందరి ఆశీస్సులతో తారకరత్న త్వరగా కోలుకుంటాడని ఆశిస్తున్నా. ఆర్గాన్స్ అన్ని బానే ఉన్నాయి. కాకపోతే బ్లడ్ క్లాట్ అయ్యింది.

ఇంటర్నల్ బ్లీడింగ్ కారణంగా స్టంట్ వేయటం కుదరలేదు. స్టంట్ వేస్తే మళ్లీ అటాక్ రావొచ్చు. డాక్టర్లు చాలా జాగ్రత్తగా మానిటరింగ్ చేసుకుంటూ ట్రీట్‌మెంట్ అందిస్తున్నారు. ప్రస్తుతం స్పర్శజ్ఞానం ఉంది. రెస్పాండ్ అవుతున్నాడు. నిన్నటికి ఇవాళ్టికి మెరుగయ్యాడు. బ్రెయిన్ డ్యామేజ్ గురించి తర్వాత తెలుస్తుంది. అభిమానులకు ధన్యవాదాలు. మీ ప్రార్థనలు ఫలించి తారకరత్న త్వరగా కోలుకుంటాడు." అని బాలకృష్ణ అన్నారు.

ఇదిలావుంటే.. తారకతర్న ఆరోగ్య పరిస్థితి విషమంగా ఉందని గత రాత్రి వైద్యులు వెల్లడించటంతో ఆయన సోదరులు టాలీవుడ్ స్టార్ హీరో జూ. ఎన్టీఆర్‌తో పాటు కల్యాణ్ రామ్ బెంగళూరు చేరుకున్నారు. హైదరాబాద్ నుంచి ప్రత్యేక విమానంలో బెంగళూరు చేరుకున్న సోదరులు.. తారకరత్న ఆరోగ్య పరిస్థితిపై డాక్టర్లను అడిగి వివరాలు తెలుసుకున్నారు. అయితే.. తారక రత్న అరుదైన మెలెనా వ్యాధితో బాధపడుతున్నట్లు వైద్యులు వెల్లడించారు. ఈ వ్యాధి కారణంగా చిన్న ప్రేగు వద్ద అధికంగా బ్లీడింగ్ అవుతుందని అన్నారు. బ్లీడింగ్ కారణంగా పలు శరీర భాగాలకు రక్త ప్రసరణ ఆగిపోయినట్లు చెప్పారు. మెలైనా వ్యాధి కారణంగా తారకరత్న అధిక ఆయాసంతో బాధపడుతున్నట్లు చెప్పారు.