నా ఫోన్ ట్యాపింగ్... సీక్రెట్స్ కోసం మరో ఫోన్ వాడుతున్నట్లు వెల్లడి

తనపై ఇంటెలిజెన్స్ అధికారులు నిఘా పెట్టి ఫోన్ ట్యాప్ చేస్తున్నారని నెల్లూరు రూరల్ ఎమ్మెల్యే కోటంరెడ్డి శ్రీధర్ రెడ్డి సంచలన ఆరోపణ చేశారు. ఈ విషయం తనకు ముందే తెలుసునని.., తాను సీక్రెట్స్ మాట్లాడుకునేందుకు వేరే ఫోన్ వాడుతున్నట్లు చెప్పారు. తన వద్ద 12 సిమ్ కార్డులు ఉన్నాయని.., ఫేస్ టైమర్, టెలిగ్రాం కాల్స్‌ను పెగాసస్ రికార్డ్ చేయలేదంటూ కీలక వ్యాఖ్యలు చేశారు. అధికార పార్టీ ఎమ్మెల్యేగా ఉన్న తనపై నిఘా ఎందుకని ఆయన ప్రశ్నించారు. ముగ్గురు అధికారులతో తనపై నిఘా అవసరమా ? అని నిలదీశారు. అవసరమైతే తనపై నిఘా కోసం ఓ ఐపీఎస్ అధికారిని పెట్టుకోండని కోటంరెడ్డి సీరియస్ వ్యాఖ్యలు చేశారు.

ఏపీ రాజకీయాల్లో కోటంరెడ్డి తాజా వ్యాఖ్యలు కలకలం రేపుతున్నాయి. గత కొంత కాలంగా పార్టీపై అసంతృప్తిలో ఉన్న ఆయన.. తన ఫోన్ ట్యాప్ చేస్తున్నారంటూ వ్యాఖ్యనించటం చర్చనీయాంశమైంది. ఏపీ మంత్రివర్గ పునర్వ్యవస్థీకరణలో మంత్రి పదవి ఆశించి కోటంరెడ్డి భంగపడ్డారు. నెల్లూరు జిల్లా నుంచి కాకాణి గోవర్థన్ రెడ్డికి పదవి ఇవ్వటంతో గత కొంత కాలంగా ఆయన పార్టీపై అసంతృప్తిలో ఉన్నారు. అప్పట్లో మాజీ మంత్రి అనిల్ కుమార్ యాదవ్‌తో భేటీ కావటం చర్చనీయాంశమైంది. ఆ తర్వాత వీలు చిక్కినప్పుడల్లా.. సొంత పార్టీతో పాటు అధికారులపైనా విమర్శలు గుప్పిస్తున్నారు.

ఈ నేపథ్యంలో కొన్ని రోజుల క్రితం.. కోటంరెడ్డిని తాడేపల్లికి పిలిపించుకన్న సీఎం జగన్.. ఆయనతో మాట్లాడారు. జిల్లా రాజకీయాలతో పాటు తన అసంతృప్తికి గల కారణాలపై కోటంరెడ్డి శ్రీధర్ రెడ్డి సీఎం జగన్‌కు వివరించారు. అధికారులపై తాను ఎందుకు విమర్శలు చేయాల్సి వచ్చిందో చెప్పుకొచ్చారు. అనంతరం స్తబ్దుగానే ఉన్న కోటంరెడ్డి తాజాగా.. తన ఫోన్ ట్యాప్ చేస్తున్నారంటూ కీలక వ్యాఖ్యలం చేయటం ఏపీ రాజకీయాల్లో కలకలం రేపుతోంది. కోటంరెడ్డి వ్యాఖ్యలు ప్రస్తుతం పొలిటికల్ సర్కిల్‌లో హాట్ టాఫిక్‌గా మారాయి.