గర్బం తీసేసేందుకు మందులు వాడి...ఆనారోగ్యానికి గురైన యువతి

నంద్యాల జిల్లాలో ఘోరం చోటు చేసుకొంది. తన గర్భాన్ని తొలగించుకొనే ప్రయత్నంలో ఓ యువతి ఉన్నట్టుండీ స్పృహ తప్పి పడిపోయింది. బంధువులు ఆమెను ఆసుపత్రిలో చేర్పించారు. యువతిని పరీక్షించిన వైద్యులు ఆమె గర్భం దాల్చినట్లు తెలిపారు. ఆ విషయం తెలిసి యువతి బంధువులు షాకయ్యారు. అదే గ్రామానికి చెందిన ఓ ఆర్‌ఎంపీ డాక్టర్ ఆమెను ప్రేమ పేరుతో మోసం చేసినట్లు తెలుసుకున్నారు. ప్రెగ్నన్సీ దాల్చిన విషయం తెలియడంతో.. సొంద వైద్యం ఉపయోగించి యువతికి గర్భస్రావం కోసం ఏవో మందులు ఇచ్చాడు. అవి వాడిన యువతి క్రమంగా ఆరోగ్యం క్షీణించి సొమ్మసిల్లి పడిపోయింది. సదరు ఆర్‌ఎంపీకి అప్పటికే పెళ్లై, ఇద్దరు పిల్లలు ఉన్నారు. పెళ్లైందని తెలిసి కూడా అతడిని యువతి ఎలా నమ్మిందనేది బంధువులను ఆశ్చర్యానికి గురిచేస్తోంది. నంద్యాల జిల్లా సంజామల మండలం ఆల్వకొండ గ్రామంలో ఈ ఘటన వెలుగులోకి వచ్చింది.

అల్వకొండ గ్రామానికి చెందిన రాజేష్ స్థానికంగా క్లినిక్ ఏర్పాటు చేసుకొని ఆర్ఎంపీ డాక్టర్‌గా పని చేస్తున్నాడు. అదే గ్రామంలో పొదుపు లక్ష్మి సంఘంలో బుక్ కీపర్‌గా పని చేస్తున్న యువతితో అతడికి పరిచయం ఏర్పడింది. అది కాస్త శారీరక సంబంధానికి దారితీసింది. ప్రేమ పేరుతో ఆర్‌ఎంపీ డాక్టర్ తనను లోబరచుకొని గత మూడు సంవత్సరాలుగా శారీరకంగా వాడుకున్నాడని బాధితురాలు పోలీసులకు ఫిర్యాదు చేశారు.

నంద్యాలలోని ప్రైవేట్ ఆస్పత్రి సిబ్బంది బాధితురాలికి గర్భస్రావం చేసి, ఇంటికి పంపించారు. ఆర్‌ఎంపీ డాక్టర్ ప్రేమ పేరుతో తనను నమ్మించి, శారీరకంగా వాడుకొని, గర్భవతిని చేసి.. ఇప్పుడు వదిలించుకునేందుకు ప్రయత్నిస్తున్నాడని జిల్లా ఎస్పీ, కలెక్టర్‌కు బాధితురాలు ఫిర్యాదు చేశారు. నంద్యాల జిల్లా ఎస్పీ రఘువీర్ రెడ్డి ఆదేశాల మేరకు పోలీసులు నిందితుడిపై కేసు నమోదు చేసి దర్యాప్తు చేస్తున్నారు.