నాటి ఘటనకు నేటికి నాలుగేళ్లు...పుల్వామా ఘటన గుర్తులు

మనదేశంలో పుల్వామా ఘటన గురించి తెలియని వారుండరు. అది 2019 ఫిబ్రవరి 14. జమ్మూ - శ్రీనగర్ జాతీయ రహదారి మీదుగా సెంట్రల్ రిజర్వ్‌డ్ ఫోర్స్ వాహనాలు వెళ్తున్నాయి. 78 వాహనాల్లో సుమారు 2500 మంది సైనికులు వెళ్తున్నారు. ఆ కాన్వాయ్ పుల్వామాలోని అవంతిపురా సమీపంలోకి చేరుకోగానే ఒక్కసారిగా భారీ పేలుడు. ఉగ్రవాదులు ఆత్మాహుతి దాడికి పాల్పడ్డారు. పేలుడు దాటికి జవాన్ల శరీర భాగాలు ఎగిరిపడి ఆ ప్రాంతమంతా రక్తసిక్తమైంది. ఈ దాడిలో 42 మంది సీఆర్‌పీఎఫ్ జవాన్లు అమరులయ్యారు. ఈ ఘటన యావత్ భారతీయులను దిగ్భ్రాంతికి గురిచేసింది. నాటి ఘటనలో ఎంత మంది ఉగ్రవాదులు పాల్గొన్నారు? ప్రతీకారంగా భారత్ ఏం చేసింది. పుల్వామా దాడి ఘటనకు నేటితో నాలుగేళ్లు పూర్తవుతున్న సందర్భంగా దేశం నాటి చేదు జ్ఞాపకాలను గుర్తు చేసుకుంటోంది.

ఈ ఘోరమైన దాడిలో పాల్గొన్న ఉగ్రవాదుల్లో నలుగురు మినహా మిగిలిన వారందరికీ శిక్ష పడిందని కాశ్మీర్ జోన్ ఏడీజీపీ విజయ్ కుమార్ మంగళవారం (ఫిబ్రవరి 14) తెలిపారు. జైష్-ఎ-మహ్మద్ (కు చెందిన 19 మంది ఉగ్రవాదులు.. పుల్వామా దాడిలో పాల్గొన్నట్లు గుర్తించారు. వీరిలో 8 మందిని భారత సైన్యం మట్టుబెట్టింది. ఇప్పటివరకూ జరిగిన వివిధ ఎన్‌కౌంటర్లలో వీరంతా హతమయ్యారు. మరో 7 మందిని అరెస్టు చేసి న్యాయస్థానం ముందు హాజరు పరిచారు. ప్రస్తుతం ఈ ఏడుగురు జైలు శిక్ష అనుభవిస్తున్నారు. మిగిలిన నలుగురు ఉగ్రవాదులు మాత్రం పాకిస్థాన్‌లో తలదాచుకున్నారు. వారిని కూడా త్వరలోనే పట్టుకుంటామని ఇండియన్ ఆర్మీ అధికారులు చెబుతున్నారు.

పుల్వామా ఉగ్రవాద కేసును విచారిస్తున్న జాతీయ దర్యాప్తు సంస్థ ఈ కుట్రకు ప్రధాన సూత్రధారులు జేఈఎం చీఫ్ మసూద్ అజర్, అతడి సోదరుడు అబ్దుల్ రవూఫ్ అస్గర్, మహ్మద్ ఉమర్ ఫరూక్ అని గుర్తించింది. వీరిలో ఉమర్ ఫరూక్‌ను భారత భద్రతా దళాలు మట్టుబెట్టాయి. ఆత్మాహుతి బాంబర్‌ను ఆదిల్ అహ్మద్ దార్‌గా గుర్తించారు.

పుల్వామా దాడి జరిగిన కొన్ని రోజులకే భారత్ ఈ ఘటనకు ప్రతీకారం తీర్చుకుంది. 2019 ఫిబ్రవరి 26న భారత యుద్ధ విమానాలు పాకిస్తాన్‌లోని బాలాకోట్‌పై బాంబుల వర్షం కురిపించాయి. నాటి ఎయిర్ స్ట్రైక్స్ లో జైషే మహ్మద్‌కు చెందిన అతిపెద్ద ఉగ్రవాద శిక్షణా శిబిరం నేలమట్టమైంది. ఈ దాడుల్లో జైషే మహ్మద్ కీలక కమాండర్లు సహా 100 మంది ఉగ్రవాదులు హతమైనట్లు అంతర్జాతీయ మీడియా కథనాల్లో పేర్కొన్నారు.

మరుసటి రోజు భారత గగనతలం వైపు దూసుకొచ్చిన పాకిస్తాన్ యుద్ధ విమానాలను సరిహద్దు వద్దే అడ్డుకొని తిప్పికొట్టాయి మన మిగ్ -21 యుద్ధ విమానాలు. పాక్ యుద్ధ విమానాలను వెంబడిస్తూ.. ఒక మిగ్ 21 విమానం పాక్ ఆక్రమిత కశ్మీర్ భూభాగంలో పడిపోయింది. వింగ్ కమాండర్ అభినందన్ వర్థమాన్ పాక్ సైన్యానికి చిక్కారు. అనంతరం భారత్ అంతర్జాతీయంగా తీసుకొచ్చిన ఒత్తిడి ఫలితంగా అభినందన్ వర్ధమాన్‌ను పాక్ తప్పనిసరి పరిస్థితుల్లో భారత్‌కు అప్పగించింది.

కాశ్మీర్‌లో ప్రస్తుతం 37 మంది ఉగ్రవాదులు క్రియాశీలంగా ఉన్నారని ఏడీజీపీ విజయ్ కుమార్ తెలిపారు. శ్రీనగర్‌లో ఉగ్రవాద సంస్థలు ఇటీవల కొత్తగా ఉగ్రవాదులను రిక్రూట్ చేసుకోలేదని ఆయన చెప్పారు. గత కొంతకాలంగా భారత ప్రభుత్వం, ఇండియన్ ఆర్మీ తీసుకుంటున్న చర్యలతో జమ్మూ కాశ్మీర్‌లో ఉగ్రవాద కార్యకలాపాలు తగ్గుముఖం పట్టాయని ఆయన వివరించారు.

ప్రస్తుతం పుల్వామాలో 7, 8 మంది స్థానిక యువకులు జైషే మహ్మద్ ఉగ్రవాద సంస్థ కోసం పనిచేస్తున్నారని, వీరితో పాటు మూసా సులేమాని, మరో ఐదుగురు పాకిస్థానీ ఉగ్రవాదులు ఉన్నారని కశ్మీర్ ఏడీజీపీ తెలిపారు. త్వరలోనే వీరిని న్యూట్రలైజ్ చేస్తామని (పట్టుకోవడం లేదా హతమార్చడం) ఆయన చెప్పారు. కశ్మీర్‌లో జైషే మహ్మద్ గత 6 నెలలుగా రిక్రూట్‌మెంట్‌ను పెంచిందని.. ఇప్పుడిక వారి ఆటలు సాగనివ్వబోమని ఆయన హెచ్చరించారు.