ఔట్‌లెట్ మూసేయడంతో ఆన్‌లైన్‌లో ఆర్డర్,,,పది సెకెన్లలో ఫుడ్ ఆర్డర్ డెలివరీ చేసిన మెక్‌డొనాల్డ్

అంతా ఆన్ లైన్ అయ్యాక సేవలు కూడా సెకెన్ల వ్యవధిలో జరిగిపోతోంది. పది సెకెన్లలో ఫుడ్ ఆర్డర్ డెలివరీ ఇది సాధ్యమయ్యే పనేనా అని ఎవరికైనా సందేహం కలగవచ్చు.. కానీ, ఊహించని విధంగా కేవలం పది సెకెన్లలోనే ఫుడ్ పార్శిల్ డెలివరీ బాయ్ అప్పగించిన ఘటన బెంగళూరులో జరిగింది. అన్నిసార్లు ఇలా జరగకపోవచ్చు కానీ.. అసాధ్యమనుకున్నది సుసాధ్యమైంది. ఫిబ్రవరి మొదటి వారంలో జరిగిన ఈ ఘటన గురించి ఫుడ్ ఆర్డర్ చేసిన కెనడా వ్యక్తి కాలెబ్ ఫ్రీసెన్ ట్విట్టర్‌ ద్వారా తెలియజేశారు. బెంగుళూరులో ఉంటున్న కాలెబ్‌కు అర్ధరాత్రి విపరీతమైన ఆకలి వేసింది. దీంతో కోరమంగళలోని మెక్‌డొనాల్డ్స్ ఔట్‌లెట్‌కు వెళ్లాడు. అయితే, అప్పటికే దాన్ని మూసేసి నో డైనింగ్ బోర్డు పెట్టారు.

పికప్ విండో దగ్గర మాత్రం బాగా రద్దీ ఉండగా.. చాలా మంది డెలివరీ ఏజెంట్లు అక్కడ ఉన్నారు. డైనింగ్ లేకపోయినా డెలివరీ ఆప్షన్ ఉండటంతో వెంటనే స్విగ్గీ యాప్ ఓపెన్ చేసిన కాలెబ్.. ఫుడ్ ఆర్డర్ ఇచ్చాడు. తాను రెస్టారెంట్ దగ్గరే పార్శిల్ తీసుకుంటానని పికప్ పాయింట్ పెట్టాడు. ఆర్డర్ తీసుకోవడం, ఓ డెలివరీ బాయ్‌కు అసైన్ చేయడం, అతడు అర్జెంటుగా పార్శిల్ తీసుకొచ్చి కాలెబ్ చేతుల్లో పెట్టేయడం అంత పది సెకెన్లలోనే జరిగిపోయింది. ప్రపంచంలో ఏ ఫుడ్ పార్శిల్ డెలివరీ సర్వీస్ కూడా ఈ వేగాన్ని ఇకపై అందుకోవడం అసాధ్యం. ఈ రికార్డును ఎవరూ బ్రేక్ చేయలేరు.

ఫుడ్ పార్శిల్ అందుకున్న సంతోషంలో కాలెబ్ ట్వీట్ చేశారు. ‘‘అర్ధరాత్రి ఆకలివేయడంతో ఫుడ్ కోసం కోరమంగళలోని మెక్ డొనాల్డ్స్‌కు వెళ్లాను.. అది మూసేసి ఉంది, కానీ పికప్ విండో రద్దీగా ఉంది… ఏం చేయాలని కాసేపు ఆలోచించి, దాన్నే పికప్ పాయింట్‌గా ఆప్షన్ పెట్టి స్విగ్గీలో ఆర్డర్ చేశాను.. వెంటనే పార్శిల్ నా చేతుల్లోకి వచ్చింది…’’ అని ఆనందం వ్యక్తం చేశాడు.

ఎక్కడైనా టేక్ అవే పాయింట్లు తీసి ఉన్నా సరే, ఇంత వేగంగా పార్శిల్ చేతిలోకి వచ్చేది కాదని చెప్పాడు. అంతేకాదు, తనకు పార్శిల్ తీసుకొచ్చింది సంజయ్ అనే వ్యక్తి అని, అతడు యూట్యూబ్ వీడియోలు చేస్తాడని తెలిపారు. ‘‘నా ఆర్డర్ తెచ్చిన డెలివరీ బాయ్ పేరు సంజయ్. అతను ఖాళీ సమయాల్లో యూట్యూబ్ వీడియోలను చేస్తాడు.. దానినే తన ప్రధాన పనిగా మార్చాలనుకుంటున్నాడు.. హలోసంజయ్‌లో యూట్యూబ్‌లో అతనిని చూడండి’’ అని ట్వీట్ చేశారు.