రష్యా...ఉక్రెయిన్ఇరు దేశాల నుంచి లబ్ధికి పాక్ యత్నం

పాకిస్తాన్ తన వక్రబుద్దీని ప్రతి విషయంలోనూ ప్రదర్శిస్తోంది. ఇదిలావుంటే  దాదాపు ఏడాది కాలంగా ఉక్రెయిన్, రష్యా మధ్య యుద్ధం నడుస్తోన్న సంగతి తెలిసిందే. ఉక్రెయిన్‌ను తేలిగ్గా స్వాధీనం చేసుకోవచ్చని తొలుత రష్యా భావించింది. కానీ మాస్కో అంచనాలకు భిన్నంగా.. కీవ్ సేనల నుంచి ప్రతిఘటన ఎదురవుతోంది. ఉక్రెయిన్‌కు ప్రపంచ దేశాల నుంచి ముఖ్యంగా.. అమెరికా, ఇతర పశ్చిమ దేశాల నుంచి సాయం అందుతోంది. అందుకే రష్యా దళాలను ఉక్రెయిన్ సమర్థవంతంగా ఎదుర్కోగలుగుతోంది. ఈ క్రమంలోనే పాకిస్థాన్ తాజాగా కీవ్‌కు 10 వేలకుపైగా రాకెట్ లాంఛర్లను సరఫరా చేసింది.

జర్మనీ పోర్టు మీదుగా.. పోలాండ్ నుంచి ఈ రాకెట్ లాంఛర్లను ఉక్రెయిన్‌ను పంపినట్లు తెలుస్తోంది. ఆర్థిక సంక్షోభంలో చిక్కుకుపోయిన పాకిస్థాన్ తమకు చౌక ధరకే ఇంధనం విక్రయించాలని ఓవైపు రష్యాను కోరుతూనే.. మరోవైపు ఆ దేశంతో యుద్ధం చేస్తున్న ఉక్రెయిన్‌కు నిరంతరం ఆయుధాలను సరఫరా చేస్తుండటం గమనార్హం.

కరాచీలోని షిప్పింగ్ కంపెనీ ‘ప్రాజెక్ట్ షిప్పింగ్’ గత నెలలో పాకిస్థాన్ ఆర్డనెన్స్ ఫ్యాక్టరీల నుంచి 146 కంటైనర్లను ఉక్రెయిన్‌కు తరలించింది. గత నెలలో పాకిస్థాన్ ఆర్డనెన్స్ ఫ్యాక్టరీలు 50 వేల డిఫెన్స్ స్టోర్లను కరాచీ మీదుగా పంపించాయి. వీటిని కరాచీ నుంచి పోలాండ్లోని గాన్స్‌ పోర్ట్‌కు తరలించి.. అక్కడి నుంచి ఉక్రెయిన్‌కు చేరవేసినట్లు తెలుస్తోంది.

ఉక్రెయిన్‌తో సరిహద్దును పంచుకుంటున్న తూర్పు యూరోప్ దేశాల గుండా.. పాకిస్థాన్ తయారు చేసిన సైనిక పరికరాలను ఉక్రెయిన్‌ను చేరవేస్తున్నారు. ఉక్రెయిన్ సైన్యం ఆర్డర్ చేసిన ఆయుధాలను తూర్పు యూరప్‌లోని ఆయుధ సంస్థలకు పంపడానికి ఇస్లామాబాద్‌కు చెందిన ఆయుధ సరఫరాదారు డీఎంఐ అసోసియేట్స్.. ఆయా సంస్థలతో కలిసి పని చేస్తోంది. ఈ సాయానికి బదులుగా ఎంఐ-17 హెలికాప్టర్లను అప్‌గ్రేడ్ చేయడంలో సహకరిస్తామని పాకిస్థాన్‌కు ఉక్రెయిన్ హామీ ఇచ్చింది. పాకిస్థాన్ హెలికాప్టర్లను అప్‌‌గ్రేడ్ చేయడంలో ఉక్రెయిన్‌కు చెందిన ఎయిర్‌క్రాఫ్ట్ ఇంజిన్లు, ఇండస్ట్రియల్ మెరైన్ గ్యాస్ టర్బైన్ల తయారీ సంస్థ ఒకటి నిమగ్నమైందని తెలుస్తోంది.

గత ఏడాది యూకే తరఫున ఉక్రెయిన్‌‌కు ఆయుధాలు చేరవేయడంలో పాకిస్థాన్ ముఖ్య పాత్ర పోషించింది. రావల్పిండిలోని నూర్ ఖాన్ ఎయిర్ బేస్ నుంచి మధ్యధరా ప్రాంతంలోని బ్రిటిష్ ఎయిర్‌బేస్ మీదుగా.. రొమేనియాలోని అవ్రమ్ ఇయాన్‌కూ క్లజ్ ఇంటర్నేషనల్ ఎయిర్‌పోర్ట్‌కు మిలటరీ హెలికాప్టర్ల ద్వారా ఆయుధాలను తరలించారు. ఇరాన్, అప్ఘానిస్థాన్‌ గగనతలం మీదుగా వెళ్తే త్వరగా ఉక్రెయిన్ చేరే అవకాశం ఉన్నప్పటికీ.. రష్యా దాడి చేస్తుందనే భయంతో ఆ దేశాల మీదుగా ఆయుధాలను తరలించే సాహసం చేయలేదు. గ్లోబ్‌మాస్టర్ విమానం ద్వారా పాక్ నుంచి ఉక్రెయిన్‌ను ఆయుధాలను తరలించారని తెలుస్తోంది.

ఉక్రెయిన్, పాకిస్థాన్ మధ్య బలమైన సైనిక, పారిశ్రామిక సంబంధాలున్నాయి. ఉక్రెయిన్ నుంచి పాకిస్థాన్ 320కిపైగా టీ-80యూడీ ట్యాంక్‌లను కొనుగోలు చేసింది. 1991-2020 మధ్య ఇరు దేశాలు 1.6 బిలియన డాలర్ల విలువైన ఆయుధ ఒప్పందాలను కుదుర్చుకున్నాయి. టీ-80యూడీ ఫ్లీట్ మరమ్మతులకు ఉక్రెయిన్‌తో పాక్ 85.6 మిలియన్ డాలర్ల విలువైన ఒప్పందం చేసుకుంది.