రాజేష్ మహాసేనకు వ్యతిరేకంగా...టీడీపీ దళిత ఐక్య వేదిక పేరుతో ప్రెస్‌నోట్

మహాసేన రాజేష్ టీడీపీలో చేరికకు ముహూర్తం ఫిక్స్ అయ్యింది. ఈ నెల 17న చంద్రబాబు సమక్షంలో పసుపు కండువా కప్పుకోబోతున్నారు రాజేష్. ఇప్పటికే టీడీపీ అధినేత చంద్రబాబు, ఏపీ పార్టీ అధ్యక్షుడు అచ్చెన్నాయుడిని కలిసి చేరికపై చర్చించారు.. ఆ తర్వాత పార్టీలో చేరికపై అధికారికంగా ప్రకటన చేశారు. అయితే రాజేష్ చేరికపై టీడీపీలో కొందరు వ్యతిరేకిస్తున్నారనే సోషల్ మీడియాలో ప్రచారం జరుగుతోంది. అలాగే తెలుగు దేశం పార్టీ దళిత ఐక్య వేదిక పేరుతో ఓ ప్రెస్‌నోట్ వైరల్ అవుతోంది.

ఆ ప్రెస్‌నోట్‌లో చంద్రబాబును ప్రస్తావిస్తూ.. 'గత కొన్ని రోజులుగా మహాసేన రాజేష్ మన పార్టీలో చేరుతున్నట్లు తన ఫేస్‌బుక్ పోస్టుల ద్వారా తెలియజేయడం జరిగింది. అదే కనుక జరిగితే పార్టీలో ఉన్న మా దళితులందరి మూకుమ్మడి రాజీనామాలు అంగీకరించండి. గతంలో మీపై, లోకేష్‌బాబుపై అనేక ఆరోపణలు చేస్తూ చాలామంది దళితుల్ని మన పార్టీకి దూరం చేసి కొన్ని రోజులు వైఎస్సార్‌సీపీలో, కొన్ని రోజులు జనసేనప పార్టీలో సంచారం చేస్తూ చివరికి మన పార్టీలో జాయిన్ అవ్వడానికి వస్తున్నాడు. అంటే ఏదో ఆశించి వస్తున్నాడు.. ఇన్నేళ్లగా పార్టీ కష్టకాలంలో ఎటువంటి ఫలితం ఆశించకకుండా పని చేస్తున్నాం. రేపు నా వల్లే టీడీపీ గెలిచింది అని తన ఖాతాలో వేసుకుంటాడు. ఇటువంటి టక్కరి దొంగలను పార్టీలో చేర్చరని, టీడీపీ విలువల్ని దిగజార్చవద్దని విన్నవించుకుంటున్నాం. ఒకవేళ అదే జరిగితే దళితులైన తాము ని్ససంకోచంగా రాజీనామా చేస్తామని కూడా హెచ్చరిస్తున్నాం. తెలుగు దేశం పార్టీ అంటే కొన్ని విలువలు, విశ్వసనీయతలు కలిగిన పార్టీ కనుక మా సలహా పాటిస్తారని విశ్వసిస్తూ.. తెలుగు దేశం పార్టీ దళిత ఔక్య వేదిక, విజయవాడ, ఆంధ్రప్రదేశ్' పేరుతో ప్రెస్‌నోట్ వైరల్ అయ్యింది.

అయితే ఈ ప్రెస్‌నోట్ ఫేక్ అంటోంది ఫ్యాక్ట్ చెక్ టీడీపీ. ఫేక్ లెటర్లు సృష్టించేసి అమాయక దళితుల్లో చిచ్చు పెట్టాలని దురాశ ఎప్పటికీ నెరవేరదు అన్నారు. దళితులే వెన్నుముకగా నిలిచిన తెలుగుదేశం దళితులను ఎందుకు దూరం పెడుతుంది అనుకుంటున్నారు ఇలాంటి ఫేక్ లెటర్లు ఎందుకు అంటూ మండిపడింది. ఇలాంటి వాటిని నమ్మొద్దంటోంది.

ఉమ్మడి తూర్పుగోదావరి జిల్లాకు చెందిన సరిపెళ్ల రాజేష్ 2019 ఎన్నికల సమయంలో వైఎస్సార్‌సీపీకి మద్దతు తెలిపారు. జగన్ సమక్షంలో ఆ పార్టీలో చేరి.. ఎన్నికల్లో ప్రచారం కూడా చేశారు. కానీ ఆ తర్వాత పరిస్థితి మొత్తం మారిపోయింది.. రాజేష్ వైఎస్సార్‌సీపీకి దూరమయ్యారు. ప్రభుత్వంపై విమర్శనాస్త్రాలు సంధిస్తున్నారు. మహాసేన పేరుతో ఓ పార్టీని మొదలు పెట్టి.. ఆ తర్వాత ఓ యూట్యూబ్ ఛానల్‌, సోషల్ మీడియా ద్వారా రాష్ట్రంలో తాజా పరిణామాలపై స్పందిస్తున్నారు. రాజేష్ జనసేన పార్టీకి దగ్గరయ్యారు.. ఆ పార్టీలోనే చేరతారని భావించారు. కానీ ఆయన మాత్రం చివరికి టీడీపీవైపు మొగ్గు చూపారు.