శివరాత్రి తిరునాళ్లకు వెళ్లి తిరిగొస్తు్ండగా,,, ఘోర రోడ్డు ప్రమాదం,,ఐదుగురు మృతి

ఏపీలోని బాపట్ల జిల్లాలో అర్ధరాత్రి రోడ్డు రక్తమోడింది. ఆ జిల్లాలో ఘోర రోడ్డు ప్రమాదం చోటు చేసుకుంది. లారీ, కారు ఢీకొన్న ఘటనలో ఐదుగురు స్పాట్‌లోనే ప్రాణాలు కోల్పోయారు. కొరిశపాడు మండలం మేదరమెట్ల బైపాస్‌లో జాతీయ రహదారిపై ఈ రోడ్డు ప్రమాదం చోటు చేసుకుంది. పోలీసులు తెలిపిన వివరాల ప్రకారం... చినగంజాం నుంచి అద్దంకి వెళ్తున్న కారు.. అదుపుతప్పి డివైడర్‌ను ఢీకొట్టింది. అనంతరం కారు రోడ్డు అవతలివైపు పడిపోవటంతో అట్నుంచి వేగంగా వస్తున్న లారీ కారును ఢీ కొట్టింది. ఈ ఘోర ప్రమాదంలో కారు డ్రైవర్‌తో సహా నలుగురు మహిశలు అక్కడికక్కడే మృతి చెందారు.

మృతులు అద్దంకి పోలీసు స్టేషన్‌లో ఎస్‌ఐగా విధులు నిర్వహిస్తున్న సుందర్ వలీ కుటుంబ సభ్యులుగా గుర్తించారు. సుందర్ వలీ డ్యూటీ రిత్యా అద్దంకిలో ఉంటుండగా.. కుటుంబసభ్యులు మాత్రం గుంటూరులో నివాసం ఉంటున్నారు. చినగంజాంలో జరగుతున్న శివరాత్రి తిరునాళ్ల ఉత్సవాలను చూసేందుకు గానూ వీరు గత రాత్రి అద్దంకకి వచ్చారు. చినగంజాంలో ఉత్సవాలు ముగిసిన తర్వాత.. వీరంతా కారులో అద్దంకిలో ఉంటున్న ఎస్ఐ సుందర్ వలీ నివాసానికి బయల్దేరారు. అక్కడ కాసేపు విశ్రాంతి తీసుకుని అక్కడి నుంచి గుంటూరుకు బయల్దేరాలని అనుకున్నారు.

ఈ క్రమంలో అద్దంకికి వస్తున్న క్రమంలోనే మార్గ మధ్యలో ప్రమాదం చోటు చేసుకుంది. రోడ్డు ప్రమాదంలో ఎస్‌ఐ సుందర్ వలీ భార్య, కూతురుతో పాటు గుంటూరులో నివాసముంటున్న ఆయన భార్య కుటుంబం నివాసానికి ఇరుగు పొరుగున ఉన్న ఇద్దరు మహిళలు, డ్రైవర్ కలిపి మొత్తం ఐదుగురు స్పాట్‌లోనే ప్రాణాలు కోల్పోయారు. మృతులు అయేషా, గుర్రాల జయశ్రీ, గుర్రాల దివ్య, కొండమీది వీరబ్రహ్మచారిగా గుర్తించారు.

యాక్సిడెంట్ సమాచారం తెలుసుకున్న వెంటనే పోలీసులు హూటాహుటిన ఘటనాస్థలానికి చేరుకుని సహాయక చర్యలు చేపట్టారు. మృతదేహాలను శవపరీక్షల నిమిత్తం అద్దంకి ప్రభుత్వ ఆసుపత్రికి తరలించారు. రోడ్డు ప్రమాదంపై కేసు నమోదు చేసుకొని దర్యాప్తు చేస్తున్నారు. ప్రమాదానికి గల కారణాలపై ఆరా తీస్తున్నారు.