గూగుల్ ఇండియాలో 450 మందికి ఉద్వాసన,,,గురుగ్రామ్ ఉద్యోగి భావోద్వేగ పోస్ట్ వైరల్

నమ్ముకొన్న ఉద్యోగం పోతే పరిస్థితి ఎలావుంటుందో తెలియజేసే పోస్ట్ తాజాగా సోషల్ మీడియాలో వైరల్ అవుతోంది. ప్రముఖ సర్చ్ ఇంజిన్, టెక్ దిగ్గజ సంస్థ గూగుల్ ఇండియాలో లేఆఫ్స్ కలకలం సృష్టిస్తున్నాయి. గురువారం సాయంత్రం సుమారు 453 మంది గూగుల్ ఇండియా ఉద్యోగులకు మెయిల్స్ అందాయి. ఈ క్రమంలో ఏళ్ల తరబడి సంస్థ కోసం పని చేసిన వారికి సైతం పింక్ స్లిప్స్ ఇవ్వడంతో భావోద్వేగానికి గురవుతున్నారు పలువురు ఉద్యోగులు. సంస్థ కోసం 24 గంటలు కష్టపడ్డానని, తన హార్డ్‌ వర్క్‌తో స్పాట్ బోనస్‌లు సైతం అందుకున్నా ఉద్యోగం నుంచి తీసేశారని గూగుల్ మాజీ ఉద్యోగి చేసిన ఓ భావోద్వేగ పోస్ట్ ప్రస్తుతం వైరల్‌గా మారింది. గూగుల్ నుంచి మెయిల్ అందిన మరుసటి రోజున (ఫిబ్రవరి 17న) లింక్డ్ ఇన్‌లో పోస్ట్ చేశారు గురుగ్రామ్‌కు చెందిన ఓ ఉద్యోగి.

గూగుల్ ఇండియాలో స్టాటజిక్ పార్ట్నర్ డెవలప్‌మెంట్ మేనేజర్‌గా పని చేశారు గురుగ్రామ్ వ్యక్తి. గురువారం రాత్రి మొత్తం 453 మందికి ఉద్యోగంలోంచి తొలగిస్తున్నట్లు మెయిల్స్ వెళ్లిన వారిలో ఆయన ఒకరు. ఈ వార్తతో తన జీవితం తలకిందులైందని రాసుకొచ్చారు సదరు వ్యక్తి. ' నిన్న నేను విన్న వార్త ఎప్పుడూ వింటానని ఊహించలేదు. గూగుల్ ఇండియాలో స్ట్రాటజిక్ పార్ట్నర్ డెవలప్‌మెంట్ మేనేజర్ పోస్ట్ నుంచి నన్ను తొలగించారు. రాత్రి 8.34 గంటలకు నా జీవితం తలకిందులైంది. గూగుల్‌ని అమితంగా ఇష్టపడే వ్యక్తిగా కంపెనీ కోసం కష్టపడి పని చేశాను. నా హార్డ్ వర్క్‌తో స్పాట్ బోనస్‌లు సైతం అందుకున్నా.' అని రాసుకొచ్చారు గురుగ్రామ్ వ్యక్తి. భారత్‌లో యూట్యూబ్ లైవ్ షాపింగ్ పెంచేందుకు 24 గంటలు శ్రమించానని భావోద్వేగానికి గురయ్యారు.

నైపుణ్య వంతులను ఉద్యోగాల నుంచి తొలగించడాన్ని చూస్తే గుండె పగిలినంత పనవుతోందన్నారు గూగుల్ మాజీ ఉద్యోగి. ఈ మార్పు నాకు ఒక కొత్త మార్గాన్నిచూపిస్తుందని, నా వ్యక్తిగత ఆవిష్కరణలకు కారణమవుతుందని నమ్ముతున్నట్లు రాసుకొచ్చారు. ఈ సందర్భంగా కొత్త అవకాశాలు కల్పించాలని కోరుతూ తన పోస్టును ముగించారు. అందుకు తన స్నేహితులు, కుటుంబ సభ్యులు, మాజీ సహోద్యోగుల సాయం ఉంటుందని భావిస్తున్నట్లు చెప్పారు.

నేషనల్ మీడియా కథనాల ప్రకారం.. గురువారం సాయంత్రం సుమారు 453 మంది ఉద్యోగులకు సమాచారం అందింది. గూగుల్ ఇండియా వైస్ ప్రెసిడెండ్ సంజయ్ గుప్తా జాబ్స్ కోల్పోతున్న ఉద్యోగులకు ఇ-మెయిల్స్ పంపించినట్లు సమాచారం. అయితే, నెల రోజుల క్రితం గూగుల్ మాతృ సంస్థ ప్రపంచ వ్యాప్తంగా 6 శాతం అంటే 12 వేల మందిని ఉద్యోగాల నుంచి తొలగిస్తున్నట్లు ప్రకటించింది. తాజాగా భారత్‌లో తొలగించిన ఉద్యోగాలు అందులో భాగమేనా? లేదా కొత్తగా కోత పెడుతున్నారా? అనే విషయంపై క్లారిటీ లేదు. సంస్థ సైతం ఎక్కడా ప్రకటించలేదు.