శ్రీశైలం వద్ద సుమారు 5 కిలో మీటర్ల మేర భారీగా ట్రాఫిక్ జామ్

శ్రీశైలం టోల్ గేట్ ల వద్ద సుమారు 5 కిలో మీటర్ల మేర భారీగా ట్రాఫిక్ జామ్ అయింది. మహా శివరాత్రి సందర్భంగా శైవక్షేత్రాలు భక్తులతో కిటకిటలాడుతున్నాయి. శనివారం రాత్రంతా జాగరణ ఉన్న భక్తులు ఆదివారం ఉదయం శివుడిని దర్శించుకున్నారు. అనంతరం ప్రయాణికులు తిరుగు ప్రయాణం కావడంతో ప్రముఖ శైవక్షేత్రం శ్రీశైలంలో భారీగా ట్రాఫిక్ జామ్ ఏర్పడింది. శ్రీశైలం టోల్ గేట్ నుంచి ముఖద్వారం వరకు సుమారు 5 కిలో మీటర్ల మేర భారీగా ట్రాఫిక్ జామ్ అయింది. శ్రీశైలం రోడ్లపై ఎటుచూసినా కార్లు, బస్సులు, ఆటోలు, జీపులు అడ్డదిడ్డంగా నిలిపివేశారు. శ్రీశైలం సమీపంలో రామయ్య టర్నింగ్ వద్ద పోలీసు వాహనాలు వెళ్లేందుకు కూడా సందు లేకుండా పోవడంతో శ్రీశైలం వచ్చే భక్తులు వెళ్లే భక్తులు ట్రాఫిక్ జామ్‌లో ఇరుక్కుపోయారు.

భక్తులు తమ వాహనాలు ఎటూ పోలేకపోవడంతో ఆందోళన చెందుతున్నారు. శనివారం మహాశివరాత్రి పర్వదినం కావడంతో శ్రీశైలానికి లక్షలాదిగా భక్తులు తరలివచ్చార. మహాశివరాత్రి పర్వదినం ముగియడంతో శ్రీస్వామి అమ్మవార్ల దర్శనం అనంతరం భక్తులు సొంత ఊర్లకు బయల్దేరారు. శనివారం పోలీసులు ట్రాఫిక్ జామ్ కాకుండా పకడ్బందీ చర్యలు తీసుకున్నప్పటికీ.. ఆదివారం భక్తులు తిరుగు ప్రయాణంలో ట్రాఫిక్ జామ్ పెరిగిపోయింది.

మరోవైపు శ్రీశైలం నుంచి కర్నూలు- గుంటూరు రోడ్డులో భారీగా వాహనాల రద్దీ పెరిగిపోయింది. అటు హైదరాబాద్ రోడ్డులో కూడా వాహనాల రద్దీ బాగా పెరిగింది. సుమారు మూడు గంటల నుంచి భక్తులు రోడ్లపై ట్రాఫిక్ లో ఇరుక్కుపోయి పడిగాపులు పడుతున్నారు. ట్రాఫిక్ క్లియర్ చేసేందుకు పోలీసులు విశ్వప్రయత్నాలు చేశారు. శ్రీశైలం ఘాట్ రోడ్‌లో సుమారు 5 కిలో మీటర్ల మేర రోడ్లపై వాహనాలు నిలిచిపోయాయి.