ఠాకూర్ సమాాజం సంచలనాత్మక తీర్మానాలు,,,ప్రజాప్రతినిధి సమక్షంలోనే నిర్ణయాలు

గుజరాత్ లోని గ్రామ ఠాకూర్లు మహిళల విషయంలో సంచలన నిర్ణయాలు తీసుకొన్నారు. ఆకాశంలో సగం అవకాశాల్లో సగం అంటున్నా సమాజంలో మహిళల పట్ల ఇంకా వివక్షే. ఈ ఆధునిక యుగంలోనూ ఆడపిల్లలను ఆంక్షల ఛట్రంలో బంధిస్తున్న ఘటనలు అక్కడక్కడా వెలుగుచూస్తూనే ఉన్నాయి. తాజాగా, ప్రధాని నరేంద్ర మోదీ సొంత రాష్ట్రం గుజరాత్‌లో యువతుల పట్ల వివక్ష ప్రతిబింబించే ఘటన చోటుచేసుకుంది. పెళ్లికాని అమ్మాయిలు మొబైల్ ఫోన్ వినియోగానికి అనుమతి ఇవ్వొద్దంటూ విచిత్రమైన నిబంధన పెట్టిన ఠాకూర్ సమాజ్‌ సభ్యులు.. దీనితోపాటు మొత్తం 11 సంస్కరణలను రూపొందించారు.

బనాస్‌కాంత జిల్లాలోని భాభర్‌ తాలూకా లున్‌సేలా గ్రామంలో జరిగిన సంత్‌ శ్రీ సదారామ్‌ బాపూ విగ్రహ ప్రతిష్ఠాపన మహోత్సవంలో ఈ నిర్ణయం తీసుకున్నారు. తమ సామాజికవర్గ ప్రజలు తీర్మానానికి కట్టుబడి ఉండాలని అందరూ ప్రతిజ్ఞ‌ చేశారు. వివాహాల్లో డీజేలపై పూర్తిగా నిషేధం.. బహుమతులకు బదులుగా నగదును కానుకగా ఇవ్వాలి.. నిశ్చితార్థానికి 11 మంది, పెళ్లికి 51 మంది అతిథులు మాత్రమే హాజరు కావాలి.. చదువుకోడానికి వెళ్లే బాలికలకు ప్రత్యేక రవాణా ఏర్పాట్లు.. మత్తుపదార్థాలకు అలవాటైన వారికి డీ-అడిక్షన్ క్యాంపులు సహా పలు సంస్కరణలు ఉన్నాయి.

వావ్‌ నియోజకవర్గ కాంగ్రెస్‌ ఎమ్మెల్యే గనిబెన్‌ ఠాకూర్‌ ఆధ్వర్యంలో ఈ సంస్కరణలను రూపొందించడం గమనార్హం. నిబంధనలను విడుదల చేసిన ఆయన.. తక్కువ సమయంలో ఠాకూర్ సమాజం రూ.40 లక్షలకుపైగా నగదు సమకూర్చినట్టు తెలిపారు. అయితే, ఈ సంస్కరణలు అన్నీ బాగానే ఉన్నా.. ఒక్క అమ్మాయిల విషయంలోనే కాస్త కఠినంగా ఉన్నాయి. కానీ, వారి వాదన మాత్రం మరోలా ఉంది. సెల్‌ఫోన్ వాడకం వల్ల అమ్మాయిలు తప్పుదారి పడతారని అందుకే దానిపై నిషేధం విధిస్తున్నట్లు చెప్పడం గమనార్హం.

ఇదిలావుంటే గతంలో ఠాకూర్ సమాజం కులాంతర వివాహం విషయంలో తీసుకున్న నిర్ణయం వివాదస్పదమయ్యింది. తమ గ్రామంలోని అమ్మాయి, అబ్బాయిలెవరైనా వారి కుటుంబసభ్యుల అనుమతి లేకుండా పెళ్లి చేసుకుంటే దాన్ని నేరంగా పరిగణిస్తామని తీర్మానించారు. ఠాకూర్ వంశానికి చెందిన యువతీ యువకులు వేరే వర్గానికి చెందిన అమ్మాయిని పెళ్లాడితే రూ.2లక్షలు జరిమానా చెల్లించాలని 2019లో చేపట్టిన తీర్మానంపై విమర్శలు వెల్లువెత్తాయి.