మండోలి జైలులో సుకేశ్ నుంచి లగ్జరీ వస్తులు లభ్యం

కాసులుంటే  చాలు  జైలు కూడా ఎలాంటి సౌకర్యాలైన దొరుకుతాయన్న విమర్శలకు బలంచేకూరేలా తాజాగా ఓ ఘటన వెలుగులోకి వచ్చింది. మనీలాండరింగ్ కేసులో అరెస్టయి నిందితుడు జైల్లో విలాసవంతమైన జీవితం గడుపుతున్న ఓ వీడియో బయటకు వచ్చింది. రూ.200 కోట్ల మనీలాండరింగ్ కేసులో ఢిల్లీ మండోలి జైలులో ఉన్న సుకేశ్ చంద్రశేఖర్‌కు సంబంధించిన సీసీటీవీ ఫుటేజ్ బయటకు రావడంతో కలకలం రేగుతోంది. నిందితుడు ఉండే సెల్‌లో జైలు అధికారులు ఆకస్మిక తనిఖీలు చేసినట్టు వీడియోలో కనిపిస్తోంది. ఆ సమయంలో అక్కడ విలాసవంతమైన వస్తువులను స్వాధీనం చేసుకున్నారు. అయితే సుకేష్ ఏడుస్తూ కన్నీళ్లు తుడుచుకోవడం కూడా వీడియోలో రికార్డు అయ్యింది.

ఇదిలావుంటే  ఈ వీడియో ఫుటేజ్ లీక్‌పై జైలు అధికారులు తీవ్రంగా స్పందించారు. విచారణ జరిపి, బాధ్యులపై కఠిన చర్యలు తీసుకుంటామని స్పష్టం చేశారు. ఏఎన్ఐ కథనాల ప్రకారం.. జైలు అధికారులు సుకేష్ సెల్ నుంచి రూ.1.5 లక్షల విలువైన గూచీ చెప్పులు, రూ.80,000 విలువైన రెండు జతల జీన్స్‌లను స్వాధీనం చేసుకున్నారు. సుకేశ్ చంద్రశేఖర్ సెల్‌లో ఆకస్మిక సోదాల సమయంలో జైలు అధికారులతో పాటు సీఆర్పీఎఫ్ సిబ్బంది కూడా ఉన్నారు.

రూ.200 కోట్ల మోసాలకు పాల్పడిన కేసులో సుకేశ్ (32)ని ఢిల్లీ పోలీసులు అరెస్ట్ చేశారు. అతడిపై దేశవ్యాప్తంగా 20కి పైగా కేసులు నమోదయ్యాయి. 2017లో జయలలిత నెచ్చెలి శశికళ వర్గానికి అన్నాడీఎంకే పార్టీ గుర్తు రెండు ఆకుల చిహ్నాన్ని ఇవ్వకుండా మోసానికి పాల్పడిన కేసులో అరెస్ట్‌తో సుకేశ్ వెలుగులోకి వచ్చాడు. ఢిల్లీ క్రైమ్ బ్రాంచ్ పోలీసులు అతడి గదిలో సుమారు రూ.1.25 కోట్ల నగదును స్వాధీనం చేసుకున్నారు.

2021లో రెలిగేర్ మాజీ ప్రమోటర్ మల్వీందర్ సింగ్ భార్యను కేంద్ర హోం, లా సెక్రటరీలుగా చూపించి రూ.200 కోట్ల మేర టోకరా వేసిన మనీలాండరింగ్ కేసులో ఎన్‌ఫోర్స్‌మెంట్ డైరెక్టరేట్ ఇటీవల చంద్రశేఖర్‌ను అరెస్టు చేసింది. గతవారంం అతడ్ని స్థానిక జైలు నుంచి మనీలాండరింగ్ నిరోధక చట్టం  క్రిమినల్ సెక్షన్ల కింద అదుపులోకి తీసుకున్నారు. అనంతరం ఢిల్లీ కోర్టు తొమ్మిది రోజుల ఈడీ కస్టడీకి పంపింది. సుకేష్ చంద్రశేఖర్ మనీలాండరింగ్ కేసు దర్యాప్తులో జాక్వెలిన్ ఫెర్నాండెజ్, నోరా ఫతేహా, నిక్కీ తంబోలి, సోఫియా సింగ్, అరుషా పాటిల్, చాహత్ ఖన్నాతో సహా పలువురు సెలబ్రిటీలు పేర్లు బయటపడ్డాయి. కాగా, సుకేష్ నేర చరిత్ర కర్ణాటక రాజధాని బెంగళూరులోనే ప్రారంభమైంది. చిన్నతనంలో నేరాల బాట పట్టి 19 ఏళ్ల వయస్సులోనే జైలుకు వెళ్లాడు. మూడు పదుల వయసులోనే కాకలుతీరిన నేతలను బోల్తాకొట్టించే నైపుణ్యం సాధించాడు.