ఏడాది కాలంలో చాలా కేసులు తగ్గించగలిగాం: ఏపీ డీజీపీ

గత ఏడాది కాలంలో 77 వేల కేసులు తగ్గించామన్నారు. ఏపీ పోలీసు శాఖకు ఇది చాలా పెద్ద ఘనత అని డీజీపీ కె.వి.రాజేంద్రనాథ్ రెడ్డి పేర్కొన్నారు. ఆంధ్రప్రదేశ్‌లో పోలీసుల పని తీరు మెరుగుపడిందని డీజీపీ తెలిపారు. పోలీసులు బెనిఫిట్స్ గురించి ఎక్కువగా చింతించవద్దని.. అన్నింటినీ ప్రభుత్వం త్వరలోనే పరిష్కరిస్తుందని చెప్పారు. రాజమండ్రిలో నూతనంగా ఏర్పాటు చేసిన పోలీస్ కన్వెన్షన్ సెంటర్‌ను బుధవారం డీజీపీ రాజేంద్రనాథ్ రెడ్డి ప్రారంభించారు. ఈ సందర్భంగా డీజీపీ మాట్లాడుతూ.. మహిళా పోలీసుల ద్వారా చిన్న చిన్న గొడవలు పరిష్కారం అవుతున్నాయని తెలిపారు. 

అలాగే, కాకినాడ జిల్లాలో యువతిని నడిరోడ్డుపై నరికిన వాడికి నాలుగు నెలల్లో శిక్ష వేయించామని డీజీపీ రాజేంద్రనాథ్ రెడ్డి వెల్లడించారు. ఏపీ పోలీసు శాఖపై విశ్వసనీయత పెరిగిందని, దిశ చట్టం వచ్చేలోపు ఆ స్ఫూర్తితో మరింతగా ముందుకు వెళ్తున్నామని వివరించారు. ప్రతి సీఐ, ఎస్ఐకి 10 కేసుల చొప్పున దర్యాప్తు పూర్తి చేసేలా అప్పగిస్తున్నామని పేర్కొన్నారు. హెల్మెట్ లేని వారికి జరిమానాలు వేయకుండా కౌన్సిలింగ్ మాత్రమే ఇవ్వాలని డీజీపీ సూచించారు.

అలాగే, ప్రతిపక్ష పార్టీలు చేస్తున్న విమర్శలకు డీజీపీ రాజేంద్రనాథ్ రెడ్డి కౌంటర్ ఇచ్చారు. ప్రతిపక్షాలు గొంతుక తామెందుకు నొక్కుతామని ప్రశ్నించారు. ఎలాంటి ప్రమాదాలు జరగకుండా ఉండేందుకు పోలీసులు నిర్దేశించిన ప్రకారం ఖాళీ ప్రదేశాల్లోనే బహిరంగ సభలు పెట్టుకోవాలని సూచించారు. ఇరుకైన ప్రదేశాల్లో సభలు అంగీకరించబోమని స్పష్టం చేశారు. ప్రతిపక్ష నేత చంద్రబాబునాయుడు నిబంధనలను అతిక్రమించి అనపర్తిలో సభ నిర్వహించారని తెలిపారు. అనపర్తి కేసులపై దర్యాప్తు వివరాలు వెల్లడిస్తామన్నారు.