పాంగాంగ్‌లో మారథాన్ నిర్వహించి,,,చైనాకు సవాల్ విసిరిన భారత్ సైన్యం

గాల్వాన్ లోయలో భారత సైన్యం దూకుడు ప్రదర్శించి చైనాకు సవాల్ విసురుతోంది. ఇదిలావుంటే గాల్వాన్ లోయ సమీపంలో భారత సైన్యం నిర్మాణాలు, నిఘా కార్యకలాపాలను వేగవంతం చేసింది. లోయలో గుర్రాలపై పెట్రోలింగ్ చేపట్టింది. దీనికి సంబంధించిన వీడియోను ఏఎన్ఐ వార్తా సంస్థ షేర్ చేసింది. గడ్డుకట్టుకుపోయే చలిని సైతం లెక్కచేయకుండా వాస్తవాధీన రేఖ వెంబడి పెట్రోలింగ్ పాయింట్స్ వద్ద గుర్రాలపై సైనికులు పహారా కాస్తూ నదిని దాటడం ఈ వీడియోలో కనిపిస్తోంది. ఇప్పటికే గల్వాన్ లోయలో భారత సైనికులు క్రికెట్ ఆడుతున్న ఫోటోలను ఇండియన్ ఆర్మీ షేర్ చేసిన విషయం తెలిసిందే. తాజాగా, ఈ వీడియో బయటకు వచ్చింది.

గాల్వాన్ లోయ సమీపంలో మోహరించిన భారత సైన్యం ఇటీవలి నెలల్లో గుర్రాలు, పోనీలపై వాస్తవాధీన రేఖకు సమీపంలో ఉన్న ప్రాంతాలను సర్వే చేయడం, ఘనీభవించిన పాంగాంగ్ సరస్సుపై హాఫ్ మారథాన్ వంటి కార్యకలాపాలను చేపట్టింది. ప్రస్తుతం ఈ వీడియో సోషల్ మీడియాలో వైరల్ అవుతోంది. తూర్పు లడఖ్‌లోని గాల్వాన్ లోయలో 2020 జూన్ 15న భారత్, చైనా సైనికుల మధ్య ఘర్షణలు చోటుచేసుకున్న విషయం తెలిసిందే. ఈ ఘటనలో 20 మందికిపైగా భారత సైనికులు అమరులయ్యారు.

అటు, చైనాకు సైతం పెద్ద సంఖ్యలో నష్టం జరిగింది. బయటకు చెబితే పరువు పోతుందని తమ సైనికులెవరూ చనిపోలేదని డ్రాగన్ బుకాయించింది. కానీ, అంతర్జాతీయ నివేదికలు, మీడియా మాత్రం 40 మందికిపైగా చైనా సైనికులు గాల్వాన్ లోయ ఘర్షణల్లో చనిపోయినట్టు పేర్కొన్నాయి. ఘటన తర్వాత భారత్, చైనాలు ఉద్రిక్తతలను తగ్గించడానికి చర్చలు, దౌత్యమార్గాలను అనుసరించాయి.

కార్ప్స్ కమాండర్ స్థాయిలో 17 రౌండ్ల చర్చలు జరిగినప్పటికీ.. ఇరు దేశాలూ పరస్పర అంగీకరానికి రాలేదు. ఉద్రిక్తతలు తలెత్తిన ప్రాంతాల నుంచి పాక్షికంగా సైన్యాలను వెనక్కి మళ్లించాయి. ఘర్షణ జరిగిన పెట్రోలింగ్ పాయింట్ 14 వద్ద ప్రస్తుతం పెట్రోలింగ్ చేపట్టడం లేదు. కానీ ఇప్పటికీ ఆ ప్రాంతానికి దగ్గరగా పెద్ద సంఖ్యలో చైనా సైనికులు ఉంటున్నారు. ఇదే సమయంలో తాము గాల్వన్‌లోకి తిరిగి అడుగుపెట్టామని గతేడాది జనవరి 1న చైనా సైన్యం ఓ వీడియోను పోస్టు చేసింది. కానీ అది ఘర్షణలు జరిగిన ప్రాంతానికి దాదాపు ఒకటిన్నర కిలోమీటర్ దూరంలో ఉన్న వీడియోగా గుర్తించారు. చైనా సైన్యం కదలికలను గమనించడం కోసం భారత సైన్యం తాజాగా ఎల్ఏసీ సమీపంలో పెట్రోలింగ్‌ను ప్రారంభించింది.

ఘర్షణ తలెత్తిన ప్రాంతానికి కేవలం 4 కిలోమీటర్ల దూరంలో.. గడ్డ కట్టించే చలిలో.. 14 వేల అడుగుల ఎత్తులో భారత జవాన్లు క్రికెట్ ఆడుతున్న ఫొటోలు సోషల్ మీడియాలో వైరల్ అయ్యాయి. పాటియాలా బ్రిగేడ్‌కు చెందిన త్రిశూల్ డివిజన్ అత్యంత ఎత్తయిన, అతి శీతల ప్రాంతంలో ఈ క్రికెట్ పోటీలను నిర్వహించిందని ఆర్మీకి చెందిన 14 కార్ప్స్ వెల్లడించింది. అసాధ్యాన్ని సుసాధ్యం చేస్తామని 14 కార్ప్స్ వెల్లడించింది.