వ్యర్థాల శుద్ధి ప్లాంట్‌లో చెలరేగిన మంటలు,,,గాల్లోకి భారీగా చేరిన దట్టమైన విషవాయువులు

మనదేశంలో వాయు కాలుష్యం ఎంతగా ఉందో ప్రత్యేకించి చెప్పనక్కర్లేదు. తాజాగా కోచిలోని వ్యర్థాలను శుద్ది చేసే ప్లాంట్‌లో వారం రోజుల కిందట అగ్ని ప్రమాదం చోటుచేసుకున్న విషయం తెలిసిందే. ప్రస్తుతం ఆ ప్రాంతమంతా విషవాయువులతో నిండిపోయి గ్యాస్ ఛాంబర్‌గా మారిపోయింది. బ్రహ్మపురం ప్రాంతంలోని వ్యర్థాల శుద్ధి ప్లాంట్‌లో చెలరేగిన మంటలను రెండు రోజుల పాటు తీవ్రంగా శ్రమించి అగ్నిమాపక సిబ్బంది అదుపులోకి తీసుకొచ్చారు. మంటలు అదుపులోకి వచ్చినా దట్టమైన పొగలు ఆ ప్రాంతాన్ని కమ్మేశాయి. దీంతో స్థానికులు ఊపిరి పీల్చుకోడానికి తీవ్ర ఇబ్బందులకు గురవుతున్నారు. ప్లాస్టిక్, మెటల్, ఇంతర పదార్థాలు కాలిబూడిదవడంతో విషవాయువులు వెలువడి చుట్టుపక్కల కాలనీలను ఉక్కిరిబిక్కిరి చేస్తున్నాయి. దీని కారణంగా కళ్లు మంటలు, గొంతునొప్పి వంటి సమస్యలతో సతమతమవుతున్నారు.

ఈ నేపథ్యంలో కేరళ ప్రభుత్వం కీలక సూచనలు చేసింది. బయటకు వెళ్లేటప్పుడు ఎన్95 మాస్క్‌లను తప్పనిసరిగా ధరించాలని, అక్కడ పరిస్థితి సాధారణ స్థితికి చేరే వరకూ వాకింగ్‌లు, జాంగింగ్‌లు మానుకోవాలని సూచించింది. జిల్లా వైద్య అధికారులు 24 గంటల కంట్రోల్ రూమ్‌ను ఏర్పాటుచేశారు. కోచిలోని అన్ని విద్యా సంస్థలను మూసివేశారు. పక్కనే ఉన్న యర్నాకుల సిటీలోని కొన్ని చోట్ల కాలేజీలు, స్కూల్స్‌కు సెలవులు ప్రకటించారు.

కొచ్చిలో ప్రస్తుత పరిస్థితి కోవిడ్-19 లాక్‌డౌన్‌ను పోలి ఉంది. రోడ్లపై కొద్ది మంది మాత్రమే మాస్క్‌లు వేసుకుని బయటకు వస్తున్నారు. పిల్లలు, వృద్ధులు బయటకు అడుగు పెట్టడం లేదు. కనీసం 50,000 టన్నుల వ్యర్థాలకు మంటలు అంటుకున్నాయి. అగ్నిమాపక శాఖ అధికారులు మాట్లాడుతూ.. ప్రభావిత ప్రాంతంలోని 70 శాతం వరకూ వెలువడే పొగలను నియంత్రించగలిగామని చెప్పారు. మిగిలిన 30 శాతం పొగను పూర్తిగా నియంత్రించడానికి కృషి చేస్తున్నామని, ఇక్కడ ప్లాస్టిక్ వ్యర్థాలను తగలుబెట్టడం చాలా పెద్ద సమస్య అని అన్నారు.

‘‘మొదట్లో మంటలు ప్రారంభమైనప్పుడు మేము పెద్దగా ప్రభావితం కాలేదు.. ఒక్కసారిగా మంటలు చెలరేగి, దట్టమైన పొగలు రావడంతో మాకు చాలా కష్టంగా మారింది.. ఈరోజు నా ఇల్లు కూడా పొగతో నిండిపోయింది.. నిన్న, హాస్టల్‌లో నివసించే నా స్నేహితులు మాస్క్‌లతో పడుకోవలసి వచ్చింది. వారు పొగ, దుర్వాసన వస్తున్నట్టు ఫిర్యాదు చేశారు’’ అని ప్లాంట్‌కు కిలోమీటర్ల దూరంలో నివసించే లిజ్ బిజు అనే కాలేజీ విద్యార్థి తెలిపారు. కనీసం ఊపిరికూడా ఆడటంలేదని, అధికారులు చర్యలు తీసుకోవాలని కోరాడు.

మంటలను అదుపుచేయడానికి కనీసం 30 అగ్నిమాపక బృందాలు, నేవీ హెలికాప్టర్లు పనిచేశాయి. కోచిలోని బ్రహ్మపురలో ఉన్న వ్యర్థాల శుద్ధి ప్లాంట్.. కేరళలోనే అతిపెద్దది. ఈ ఘటనపై కేరళ హైకోర్టు తీవ్రంగా స్పందించింది. నగరాన్ని గ్యాస్ ఛాంబర్‌గా మార్చేశారని కోచి మున్సిపల్ యంత్రాంగంపై ఆగ్రహం వ్యక్తం చేసింది. ప్రమాదానికి గల కారణాలు, నివారణకు చేపట్టిన చర్యలపై నివేదికను సమర్పించాలని ఆదేశించింది. అయితే, ఈ ఘటనకు కారణాలపై దర్యాప్తు కొనసాగిస్తున్నామని కోచి మున్సిపాల్టీ తెలిపింది.