మేనిఫెస్టో ప్రకారం పింఛన్ పెంపు,,,ఏపీ బడ్జెట్‌లో భారీగా కేటాయింపులు

ఏపీ అసెంబ్లీలో ఆర్థిక మంత్రి బుగ్గన రాజేంద్రనాథ్ రెడ్డి బడ్జెట్‌ను ప్రవేశపెట్టారు. ఈ బడ్జెట్‌లో పింఛన్ తీసుకునేవారికి శుభవార్త చెప్పారు. మేనిఫెస్టోలో చెప్పిన హామీకి అనుగుణంగా, రాష్ట్రవ్యాప్తంగా వివిధ కేటగిరీలలోని 64.45 లక్షల మంది పింఛనుదారులకు జనవరి 1, 2023 నుంచి ప్రభుత్వం వై.ఎస్‌.ఆర్‌. పెన్షన్‌ కానుకను నెలకు రూ.2,750కు పెంచిందన్నారు మంత్రి.. మేనిఫెస్టోలో హామీ ఇచ్చిన విధంగా మున్ముందు ఈ పింఛన్‌ను రూ.3,000 పెంచడానికి తాము కట్టుబడి ఉన్నామన్నారు. 2023-24 ఆర్థిక సంవత్సరానికి వై.ఎస్‌.ఆర్‌. పెన్షన్‌ కానుక కోసం రూ.21,434 కోట్లు కేటాయింపుల్ని ప్రతిపాదించారు.

అలాగే కాపు, బలిజ, తెలగ మరియు ఒంటరి వర్గాలకు చెందిన 45 నుంచి 60 వయసు గల మహిళల ఆర్థిక అభ్యున్నతి కోసం వై. ఎస్‌.ఆర్‌. కాపు నేస్తం పథకం క్రింద ఇప్పటి వరకు రూ.1,997 కోట్లు సహాయం అందించిన విషయాన్ని గుర్తు చేశారు. 2023-24 ఆర్థిక సంవత్సరంలో కూడా అర్హులైన మహిళా లబ్టిదారులకు ఒక్కొక్కరికి రూ. 15,000 చొప్పున ఆర్థిక సహాయం అందించబడుతోంది అన్నారు. 2023-24 ఆర్దిక సంవత్సరంలో వై.ఎస్‌.ఆర్‌. కాపు నేస్తం కోసం రూ.550 కోట్లు కేటాయింపును ప్రతిపాదించారు.

ఆర్థికంగా వెనుకబడిన కులాలకు చెందిన మహిళలు ఎదుర్కొంటున్న ఆర్థిక ఇబ్బందులను గుర్తించి వారి స్వయం ఉపాధికి మార్గాలు కల్పించడం కోసం 45 నుంచి 60 సంవత్సరాల మధ్య వయస్సు గల మహిళలకు సంవత్సరానికి రూ.15,000 కేటాయిస్తున్న విషయాన్ని గుర్తు చేశారు. 2023-24 ఆర్థిక సంవత్సరానికి గాను వై.ఎస్‌.ఆర్‌. ఈ.బి.సి. నేస్తం కోసం రూ.610 కోట్లు కేటాయింపును ప్రతిపాదించారు.

వివిధ పథకాలకు కేటాయింపులు ఇలా ఉన్నాయి..

జగనన్న తోడు- రూ.35 కోట్లు

ఈబీసీ నేస్తం-రూ.610 కోట్లు

వైఎస్సార్‌ కల్యాణమస్తు-రూ.200 కోట్లు

వైఎస్సార్‌ ఆసరా-రూ.6700 కోట్లు

వైఎస్సార్‌ చేయూత-రూ.5000 కోట్లు

అమ్మ ఒడి-రూ.6,500 కోట్లు

మొత్తంగా డీబీటీ స్కీంలకు రూ.54,228.36 కోట్లు

ధర స్థిరీకరణ నిధి-రూ.3,000 కోట్లు

వ్యవసాయ యాంత్రీకరణ- రూ. 1,212 కోట్లు నిధుల్ని ప్రతిపాదించారు.

రాష్ట్రంలో అన్ని వర్గాల సంక్షేమంతో పాటు సమగ్రాభివృద్ధే లక్ష్యంగా అసెంబ్లీలో బడ్జెట్ ప్రవేశ పెట్టామన్నారు మంత్రి బుగ్గన. 2023–24 ఆర్థిక ఏడాదికి మొత్తం రూ.2 లక్షల 79వేల 279 కోట్ల రూపాయలతో వార్షిక బడ్జెట్‌ను ప్రవేశ పెట్టారు. రెవెన్యూ వ్యయం 2,28,540 కోట్లు.. మూలధన వ్యయం 31,061 కోట్లు.. రెవెన్యూ లోటు 22,316 కోట్లు.. ద్రవ్య లోటు 54,587 కోట్లు గా ఉన్నాయి.