జాతీయ పతకానికి అవమానంపై కేంద్రం సీరియస్... దిగొచ్చిన బ్రిటన్

లండన్ లో జాతీయ పతానికి జరిగిన అవమానంపై భారత  ప్రభుత్వం తీవ్రంగా స్పందించింది. ఇదిలావుంటే పంజాబ్‌లో ఖలిస్థాన్ వేర్పాటువాద నాయకుడు అమృత్‌పాల్‌ సింగ్‌ జాడ కోసం పోలీసులు గాలింపు చర్యలు చేపడుతున్న సంగతి తెలిసిందే. ఈ నేపథ్యంలో విదేశాల్లోని ఖలిస్థాన్ అనుకూల మూకలు రెచ్చిపోతున్నాయి. లండన్‌లోని భారత హై కమిషన్ వద్ద ఆదివారం ఖలిస్థాన్ మద్దతుదారులు దాడికి దిగారు. భారత రాయబార కార్యాలయంపై ఉన్న త్రివర్ణ పతాకాన్ని కిందకు దించి అవమానించడంతోపాటు.. ఖలిస్థాన్ జెండా ఎగరేశారు. అమెరికా, ఆస్ట్రేలియాల్లోనూ ఖలిస్థాన్ మద్దతుదారులు రెచ్చిపోతున్నారు.

లండన్‌లోని భారత రాయబార కార్యాలయం వద్ద త్రివర్ణ పతకాన్ని కిందికి దించిన విషయాన్ని కేంద్రం సీరియస్‌గా తీసుకుంది. బ్రిటన్ ప్రభుత్వం సరైన భద్రత కల్పించకపోవడం కూడా ఈ పరిస్థితికి దారి తీయడానికి కారణమనే భావనలో భారత ప్రభుత్వం ఉంది. మన దేశంలోని బ్రిటిష్ డిప్యూటీ హై కమిషనర్‌కు సమన్లు జారీ చేసింది. భద్రతా సిబ్బంది ఎవరూ లేకపోవడం పట్ల వివరణ ఇవ్వాలని డిమాండ్ చేసింది. అక్కడితో సరిపెట్టకుండా.. బ్రిటన్ ప్రభుత్వానికి కూడా నొప్పి తెలిసొచ్చేలా.. బుధవారం దేశ రాజధాని న్యూ ఢిల్లీలోని బ్రిటిష్ హై కమిషన్ కార్యాలయం, హై కమిషనర్ నివాసం ముందున్న బ్యారికేడ్లను తొలగించింది.

బ్రిటన్ రాయబార కార్యాలయం బయట ఉన్న బారికేడ్లు, బంకర్లు, పీసీఆర్ వ్యాన్లను కూడా పోలీసులు తొలగించారు. బ్రిటిష్ హై కమిషన్ భద్రత కోసం ఏర్పాటు చేసిన బ్యారికేడ్ల కారణంగా అటుగా వెళ్లే ప్రయాణికులకు ఇబ్బందులు తలెత్తుతున్నాయని పోలీసులు తెలిపారు. భారత్ తీవ్ర అసంతృప్తిని వ్యక్తం చేయడంతోపాటు.. బ్రిటన్ హై కమిషనర్ ఆఫీసు ముందు బారికేడ్లను తొలగించడంతో.. యూకే ప్రభుత్వం అప్రమత్తమైంది. లండన్‌లోని భారత రాయబార కార్యాలయం ముందు బారికేడ్లను ఏర్పాటు చేయడంతో మూడంచెల భద్రత వ్యవస్థను ఏర్పాటు చేసింది. భారత హై కమిషన్ ఆఫీసు ముందు లండన్ మెట్రోపాలిటన్ పోలీసులు పెట్రోలింగ్ నిర్వహించారు. ఆందోళన చేపడుతున్న ఖలిస్థాన్ మద్దతుదారులు బారికేడ్లు దాటి రాయబార కార్యాలయంలోకి వెళ్లకుండా లండన్ పోలీసులు చర్యలు తీసుకున్నారు.