బీ1, బీ2 వీసాదారులకు ఉద్యోగాలకు దరఖాస్తు చేసే ఛాన్స్.

లేఆఫ్‌ల కారణంగా ఉద్యోగాలను కోల్పోతున్న విదేశీయులకు ఊరటనిచ్చేలా అమెరికా కీలక ప్రకటన చేసింది. ట్రావెల్  బిజినెస్ వీసాలతో తమ దేశానికి వచ్చే వ్యక్తులు ఉద్యోగాలకు దరఖాస్తు చేసుకోవచ్చని, ఇంటర్వ్యూలకు హాజరు కావొచ్చని అమెరికా సిటిజెన్‌షిప్ అండ్ ఇమ్మిగ్రేషన్ సర్వీసెస్ వెల్లడించింది. అయితే, ఉద్యోగంలో చేరేముందే ఆ వీసాను మార్చుకోవాల్సి ఉంటుందని స్పష్టం చేసింది. బిజినెస్ పనుల కోసం వచ్చేవారికి బీ1 వీసా.. పర్యాటకులను బీ2 వీసాను అమెరికా జారీ చేస్తుంటుంది. తాజా నిర్ణయంతో ఈ రెండు వీసాల కేటగిరీల వ్యక్తులు ఉద్యోగాలకు దరఖాస్తు చేసుకోవచ్చు.

టెక్ దిగ్గజాలు ఇటీవల భారీగా ఉద్యోగాల్లో కోత విధించడం వల్ల వేలాది మంది విదేశీయులు కొలువులకు దూరమవుతున్నారు. అమెరికా ఫెడరల్ ప్రభుత్వ నిబంధనల ప్రకారం.. ఈ లేఆఫ్‌ల కారణంగా ఉద్యోగం పోగొట్టుకున్నవారు 60 రోజుల వ్యవధిలో మరో ఉద్యోగం చూసుకోవాల్సి ఉంటుంది. ఆ సమయంలోగా ఉద్యోగం లభిస్తే అమెరికాలో ఉండవచ్చు. లేకపోతే స్వదేశానికి తిరిగి వెళ్లిపోవాల్సిందే. ఈ ఆందోళనల నేపథ్యంలో ఉద్యోగం వెతుక్కునేందుకు చాలా మార్గాలు ఉన్నాయంటూ టూరిస్టు, బిజినెస్‌ వీసాలకు సంబంధించి యూఎస్‌సీఐఎస్‌ ట్విట్టర్‌ ద్వారా బుధవారం కీలక ప్రకటన చేసింది.

‘60 రోజుల్లోగా ఉద్యోగం రానివారు దేశం విడిచి వెళ్లాలన్న నిబంధనను కొన్నిసార్లు తప్పుగా అర్థం చేసుకుంటున్నారు.. వారికి అనేక మార్గాలున్నాయి.. హెచ్‌1బీ వీసా ఉన్నవారు ఉద్యోగం కోల్పోయినా వారికి పలు అవకాశాలున్నాయి.. ఆ వీసాను మార్చుకోవడం, హోదాను సర్దుబాటు చేసుకునేందుకు దరఖాస్తు చేసుకోవడం, తప్పనిసరి పరిస్థితుల్లో ఉద్యోగ ధ్రువీకరణ పత్రాలకు దరఖాస్తు చేసుకోవడం, సరైన కారణాలు చూపుతూ ఉద్యోగం మారేందుకు పాత సంస్థను వదిలేస్తున్నానని దరఖాస్తు చేసుకోవడం వంటి అవకాశాలు ఉన్నాయి.. ఇలాంటి దరఖాస్తులను 60 రోజుల్లోగా చేసుకుని ఉంటే హెచ్‌1బీ వీసాలున్నవారు ఉద్యోగం కోల్పోయినా అమెరికాలో ఉండొచ్చు.

చాలామంది బీ1, బీ2 వీసాలుంటే ఉద్యోగం చేసుకోవచ్చా అని అడుగుతున్నారు. దీనికి మా సమాధానం అవును అనే. బీ1, బీ2తో ఉద్యోగాలను వెతుక్కోవడానికి అనుమతి ఉంది’ అని యూఎస్‌సీఐఎస్‌ వెల్లడించింది. బీ1, బీ2తో ఉద్యోగాలను వెతుక్కున్నవారు ఉద్యోగంలో చేరేముందే ఉద్యోగ వీసాకు అనుమతి తీసుకోవాలని స్పష్టం చేసింది. ‘వలసేతర కార్మికుల ఉపాధిని స్వచ్చందంగా లేదా అసంకల్పితంగా రద్దయినప్పుడు వారు సాధారణంగా యునైటెడ్ స్టేట్స్‌లో నిర్దేశిత వ్యవధిలో ఉండటానికి అర్హత ఉన్నట్లయితే అనేక చర్యలలో ఒకదాన్ని తీసుకోవచ్చని పేర్కొంది.