వారు గెలిచోస్తే.. నేను రాజకీయాలను మానేస్తా: అనిల్ కుమార్ యాదవ్
Andhra Pradesh Telugu | Suryaa Desk | Published : Tue, Mar 28, 2023, 04:57 PM
ముగ్గురు ఎమ్మెల్యేలు వెళ్లడం వల్ల.. నెల్లూరు జిల్లాలో వైసీపీకి ఊడిందేమీ లేదని.. మాజీ మంత్రి, నెల్లూరు సిటీ ఎమ్మెల్యే అనిల్ కుమార్ యాదవ్ స్పష్టం చేశారు. వైసీపీ బహిష్కృత ఎమ్మెల్యేలకు అనిల్ కుమార్ యాదవ్ సవాల్ విసిరారు. 2024 ఎన్నికల్లో కోటంరెడ్డి శ్రీధర్ రెడ్డి, ఆనం రామనారాయణ రెడ్డి, మేకపాటి చంద్రశేఖ్ రెడ్డికి ఓటమి తప్పదని జోస్యం చెప్పారు. వచ్చే ఎన్నికల్లో ఈ ముగ్గురు గెలిచి అసెంబ్లీకి వస్తే.. తన రాజకీయాన్ని మూసేస్తానని అనిల్ కుమార్ యాదవ్ ఛాలెంజ్ చేశారు.
'నేను గెలిచి అసెంబ్లీకి వస్తే.. మీరు రాజకీయాల నుంచి వెళ్లిపోతారా. 2024 ఎన్నికల్లో ఎవరు అసెంబ్లీకి వస్తారో తేల్చుకుందాం. ఈ సారి అనిల్ను శాసనసభకు రానీయమంటూ కొందరు మంగమ్మ శపథాలు చేస్తున్నారు. ఇటీవల పసుపు కండువా కప్పుకున్న కొందరు.. జిల్లాలో పదికి పది స్థానాలు సాధిస్తామని చెబుతున్నారు. పది స్థానాలు కాదు.. వెళ్లిన ముగ్గురు ముందు గెలవండి. వచ్చే ఎన్నికల్లో జగన్ బొమ్మతోనే నేను ఎన్నికల్లో పోటీ చేస్తా.. గెలుస్తా.. నన్ను ఆపండి.. చూద్దాం.. కార్యకర్తలు, ప్రజలు జగన్ వెంటే ఉన్నారు. వచ్చే ఎన్నికల్లోను జగన్కు ఓట్లు వేసేందుకు సిద్ధంగా ఉన్నారు' అని అనిల్ కుమార్ యాదవ్ స్పష్టం చేశారు.
|
|