సవాళ్లు ప్రతి సవాళ్లతో యుద్ధ వాతావరణం

ప్రశాంతంగా ఉన్న పుట్టపర్తి పట్టణంలో వైసిపి టిడిపి వర్గాల మధ్య ఘర్షణలతో దద్దరిల్లింది. యుద్ధ వాతావరణం తలపించింది. ఒకరిపై ఒకరు చెప్పులతో రాళ్లతో టెంకాయలతో దాడులు చేసుకోన్నారు. సవాళ్లు ప్రతి సవాళ్ల మధ్య శనివారం ఈ సంఘటన చోటుచేసుకుంది. లోకేష్ యువగళం పాదయాత్రలో ఎమ్మెల్యే దుద్దుకుంట శ్రీధర్ రెడ్డి పై అవినీతి ఆరోపణలు ఓ డి సి బహిరంగ సభలో ప్రస్తావించిన నేపథ్యంలో శ్రీధర్ రెడ్డి తీవ్రంగా స్పందించి తాను చేసిన అభివృద్ధి గురించి మీడియాకు వివరించారు. పట్టణంలోని సత్యమ్మ గుడి దగ్గరకు మాజీ మంత్రి పల్లె రఘునాథరెడ్డి రావాలని ఇరువురు ప్రమాణం చేద్దామని, లేదా టీడీపీ కార్యాలయం వద్దకు రావాలా, లోకేష్ పాదయాత్ర క్యాంపు కు రావాలా చెప్పాలని సవాలు చేశారు. దీంతో మాజీ మంత్రి పల్లె శనివారం సత్యమ్మ గుడి వద్దకు రావాలని పుట్టపర్తి నియోజకవర్గంలో ఎవరు అభివృద్ధి చేశారు ఎవరు దోచుకోన్నారో తేల్చుకొందామని పల్లె ప్రతి సవాలు చేశారు. అప్పటినుంచి రెండు పార్టీల మధ్య కుంపటి రాసుకుంది. అయితే శుక్రవారం రాత్రి పోలీసులు నియోజకవర్గంలో పోలీస్ యాక్ట్ 30 నీ విధించామని ఎవరు సత్యమ్మ గుడి వద్దకు రాకూడదని హెచ్చరించారు. టిడిపి కార్యాలయం వద్ద పల్లెను, ఇతర ముఖ్య నాయకులను శనివారం ఉదయమే గృహనిర్బంధం చేశారు. అయితే పోలీసుల కళ్ళు కప్పి ఎమ్మెల్యే శ్రీధర్ రెడ్డి వాహనం టిడిపి కార్యాలయం ముందు నుంచి కేకలు వేసుకుంటూ సత్యమ్మ గుడి వద్దకు చేరుకుంది. దీంతో టీడీపీ కార్యాలయంలో నిర్బంధంలో ఉన్న పల్లె కార్యాలయం వెనుక వైపు పైకప్పు నుంచి క్రింద ఉన్న షెడ్డుపైకి దుమికి కారులో సత్యమ్మ గుడికి చేరుకున్నారు. దీంతో అక్కడే ఉన్న వైసీపీ నాయకులు కార్యకర్తలు చెప్పులతో రాళ్లతో అక్కడ ఉన్న టెంకాయలతో దాడులు చేసుకున్నారు. ఇరువురి వాహనాల అద్దాలు పగిలాయి. పోలీసులు అక్కడికి చేరుకొని ఇరు వర్గాలను చదరగొట్టారు. ఇదంతా పోలీసుల వైఫల్యమే అంటూ వైసీపీ నాయకులకు ప్రభుత్వానికి వ్యతిరేకంగా పోలీస్ స్టేషన్ ముందు అనంతరం సత్యమ్మ గుడి వద్ద పల్లెతోపాటు నాయకులు బైఠాయించి నినాదాలు చేశారు. ఆ తరువాత ఇరువర్గాల వారు వారి పార్టీ కార్యాలయాలకు చేరుకున్నారు. ప్రస్తుతం పుట్టపర్తి నివురు గప్పిన నిప్పులా ఉంది. ఈ కార్యక్రమంలో డిఎస్పి యశ్వంత్, సీఐ లు బాలసుబ్రమణ్యం రెడ్డి, నిరంజన్ రెడ్డి, జయ నాయక్, ప్రత్యేక పోలీసులు పాల్గొన్నారు.