అదే లక్ష్యంగా ‘ప్రపంచ తెలుగు ‌సాహితీ బ్రహ్మోత్సవాలు

ఏది  చేసినా అందరికీ  గుర్తుండేలా చేయాలంటారు. ఈ క్రమంలోనే ‘గిన్నిస్ బుక్ ఆఫ్ వరల్డ్ రికార్డు’ లక్ష్యంగా తిరుపతిలో ఈ నెల 9,10 తేదీల్లో 48 గంటల పాటు నిర్విరామంగా ‘ప్రపంచ తెలుగు ‌సాహితీ బ్రహ్మోత్సవాలు’ జరగనున్నాయి. తిరుపతిలోని మహతి ఆడిటోరియంలో ప్రతిష్టాత్మకంగా ఈ సాహితీ బ్రహ్మోత్సవాలు నిర్వహిస్తున్నారు. ఐఎస్ఓ గుర్తింపు పొందిన అంతర్జాతీయ సంస్థ ‘శ్రీశ్రీ కళా వేదిక’ ఆధ్వర్యంలో ఈ ఉత్సవాలు అత్యంత వైభవంగా నిర్వహించనున్నారు.

ప్రపంచ తెలుగు ‌సాహితీ బ్రహ్మోత్సవాల్లో పాల్గొనాల్సిందిగా ప్రకాశం జిల్లా ఒంగోలుకు చెందిన ప్రముఖ కవి, టీవీ పాటల రచయిత డాక్టర్ మొగిలి దేవప్రసాద్‌కు ఆహ్వానం అందింది. ఈ ప్రతిష్టాత్మక కార్యక్రమంలో డాక్టర్ మొగిలి దేవప్రసాద్‌ను కవితా గానం, పాటల కళా ప్రదర్శన చేయాల్సిందిగా ఆహ్వాన పత్రికను పంపించారు. డాక్టర్ మొగిలి దేవ గతంలో కేంద్ర ప్రభుత్వ ఆజాదీ కా అమ్రృత్ మహోత్సవ్ పోటీల్లో దేశభక్తి గీత రచన పోటీల్లో ఉమ్మడి ప్రకాశం జిల్లా ప్రథమ విజేతగా నిలిచి.. రూ.10 వేల నగదు బహుమతి గెలుపొంది, అవార్డు కూడా సాధించారు.

డాక్టర్ మొగిలి దేవ ఇప్పటి వరకు ఎన్నో ప్రభుత్వ, పేరున్న కళా సంస్థల అవార్డులు, సత్కారాలు అందుకున్నారు. డా.మొగిలి సాహిత్య రంగంలో, తెలుగు భాష వికాసానికి చేస్తున్న సేవలను గుర్తించిన ‘శ్రీ శ్రీ కళావేదిక’ ఎంతో ప్రతిష్టాత్మకంగా నిర్వహిస్తున్న ప్రపంచ తెలుగు ‌సాహితీ బ్రహ్మోత్సవాల్లో పాల్గొనాలని ఆహ్వానించింది. ఈ ఆహ్వానంపై డాక్టర్ మొగిలి దేవప్రసాద్ హర్షం వ్యక్తం చేశారు. తనకు ఈ అవకాశం కల్పించిన శ్రీశ్రీ కళా వేదిక చైర్మన్ డాక్టర్ కత్తిమండ ప్రతాప్, చిట్టే లలిత, ఇతర నిర్వాహకులకు క్రృతజ్ణతలు తెలిపారు.