వైసీపీలో కొనసాగుతున్న రాజీనామాల పర్వం
Andhra Pradesh Telugu | Suryaa Desk | Published : Thu, Apr 06, 2023, 03:04 PM
కృష్ణాజిల్లా, అవనిగడ్డ నియోజకవర్గంలో వైసీపీకి బిగ్ షాక్ తగిలింది అనే చెప్పొచ్చు. నియోజకవర్గం లోని నేత పరుచూరి సుభాష్ చంద్ర బోస్.. వైఎస్సార్ కాంగ్రెస్ పార్టీకి రాజీనామా చేశారు. ఈ సందర్భంగా ఆయన మాట్లాడుతూ.... ముందు చూపు లేని ప్రభుత్వ విధానాలతో విసిగి పార్టీకి రాజీనామా చేస్తున్నట్లు ప్రకటించారు. ఘంటసాల, చల్లపల్లి మండలాలను ప్రభావితం చేయగల నేత పార్టీని వీడటంతో ఆ పార్టీ శ్రేణులు ఆందోళనలో ఉన్నారు. జగన్మోహన్ రెడ్డితో సుభాష్ చంద్రబోస్ కలసి రాష్ట్ర వ్యాప్తంగా పాదయాత్ర చేసి జగన్‌కు ముఖ్య అనుచరుడిగా గుర్తింపు పొందారు. వైఎస్ రాజశేఖర్ రెడ్డిలా జగన్ పరిపాలన చేస్తారని ఆశిస్తే మోసపు మాటలతో ప్రజలను వంచించారని ఆవేదన వ్యక్తం చేశారు. గృహ నిర్మాణంలో జగన్ ప్రభుత్వం పూర్తిగా విఫలమైందని విమర్శించారు. పేదల బ్రతుకు భారం కావడంతో పార్టీని విడుతున్నానని ఆయన ప్రకటించారు. కాగా సుభాష్ చంద్రబోస్‌తో పాటు ఆయన అనుచరులు, 50 మంది ముఖ్య నేతలు వైసీపీని వీడుతున్నారు.
|
|