పైలెట్ సీటు కింద పాము.... అత్యవసరంగా జోహన్స్‌బర్గ్ విమానాశ్రయంలో ల్యాండింగ్

మనసీటు కింద పాముంటే  మనం ఒక్క సెకండ్ పాటు కూడా కూర్చోలేం. కానీ  ఎగిరిన విమానంలో పైలెట్ సీటు కింద పాము మకాం వేస్తే... విమానం టేకాఫ్ అయిన తర్వాత గాల్లో ఉండగా పైలట్ సీటు కింద నాగుపాము గుర్తించడం కలకలం రేగింది. అయితే, పైలట్ భయపడకుండా చాకచక్యంగా వ్యవహరించడంతో విమానంలో ఉన్నవారంతా సురక్షితంగా బయటపడ్డారు. అత్యవసర ల్యాండింగ్ చేసి ప్రయాణికులను దింపేసి తనిఖీలు చేయగా.. పైలట్ సీటు కింద పాము హాయిగా నిద్రపోవడం గుర్తించారు. ఈ ఘటన దక్షిణాఫ్రికాలో చోటుచేసుకుంది. నలుగురు ప్రయాణికులతో చిన్న విమానం వార్సెస్టర్‌ నుంచి నెల్సుప్రీట్‌కు బయలుదేరింది. టేకాఫ్ తర్వాత ప్రయాణం సాఫీగా సాగుతోంది.

కొద్ది సేపట్లో విమానం గమ్యానికి చేరుతుందనగా కలకలం మొదలైంది. టేకాఫ్‌ అయిన కొద్దిసేపటికి పైలట్‌ రుడాల్ఫ్ ఎరామస్‌కు తన నడుము వద్ద ఏదో కదులుతున్నట్టు అనుమానం వచ్చింది. దీంతో ఏమై ఉంటుందని పరిశీలించిన అతడు ఒక్కసారిగా షాక్ తిన్నాడు. అత్యంత విషపూరిత నాగుపాము ఆ సీటు కిందకు దూరుతూ కనిపించింది. అయితే, ఎరామస్‌ భయపడకుండా సంయమనం పాటించాడు. అది సీటు కిందకి చేరడంతో ధైర్యం కూడదీసుకుని గ్రౌండ్‌ కంట్రోల్‌ సిబ్బందికి సమాచారం ఇచ్చాడు.

ఏటీసీ సూచనలతో విమానాన్ని జోహాన్నెస్‌బర్గ్‌లో అత్యవసరంగా దింపడంతో ప్రయాణికులకు ప్రాణాపాయం తప్పింది. విమానంలోని వారంతా దిగిపోయిన తర్వాత పైలట్‌ కూర్చున్న సీటును పైకి ఎత్తి చూడగా దానికింద నాగుపాము చుట్ట చుట్టుకొని ఉంది. వాస్తవానికి ప్రయాణానికి ముందు రోజే వార్సెస్టర్ ఎయిర్‌పోర్టు సిబ్బంది విమానం రెక్కల కింద నాగుపామును గుర్తించారు. దాన్ని పట్టుకునేందుకు వారు ప్రయత్నించినా పాము తప్పించుకుంది. అనూహ్యంగా మర్నాడు కాక్‌పిట్‌లో ప్రత్యక్షమైంది.

జోహాన్నెస్‌బర్గ్‌ విమానాశ్రయంలో ల్యాండింగ్ తర్వాత కూడా పామును పట్టుకునేందుకు అక్కడ సిబ్బంది మరోసారి ప్రయత్నించి విఫలమయ్యారు. విమానంలో అణువణువుగా గాలించినా పాము జాడ కనిపించలేదు. రాత్రి బాగా పొద్దుపోవడంతో సెర్చ్ ఆపరేషన్ నిలిపివేసి, పామును బయటకు రప్పించేందుకు విమానం చుట్టూరా ఆహారాన్ని ఎరగా వేశారు. మర్నాడు ఉదయం చూడగా ఆ ఆహారం కోసం పాము వచ్చిన దాఖలాల్లేవు. దీంతో.. పాము వెళ్లిపోయి ఉంటుందని భావించారు.

ఘటన గురించి పైలట్ రుడాల్ఫ్ ఎరామస్ మాట్లాడుతూ.. ‘నేను నా ఎడమవైపుకు తిరిగి కిందికు చూసినప్పుడు నా సీటు కింద పాము తల వెనక్కి తగ్గడం నాకు కనిపించింది.. ఆ సమయంలో ఒక క్షణం నా గుండె ఆగిపోయినట్టయ్యింది.. విమానాన్ని వెల్కామ్‌కి సమీపంలోని విమానాశ్రయంలో అత్యవసర ల్యాండింగ్ చేయాలని నిర్ణయించుకున్నాను.. ఏమి జరుగుతుందో లోపల ప్రయాణీకులకు తెలియజేశాను ... కానీ అందరూ ప్రశాంతంగా ఉన్నారు’ అని తెలిపారు. ఆ పాము కాటు వేస్తే గంటలోపే మనిషి చనిపోతాడు. కానీ, నేను లోపలి ఉన్న ప్రయాణికుల గురించే ముందు ఆలోచించాను అని చెప్పారు.

మరోవైపు, ఇలాంటి ఘటన తాము ఎప్పుడూ చూడలేదని విమాన రంగ నిపుణులు చెబుతున్నారు. పైలట్‌ ధైర్యంగా వ్యవహరించడంతో ప్రయాణికులకు ప్రాణాపాయం తప్పిందని, లేదంటే విమానం అదుపు తప్పి ఘోర ప్రమాదం జరిగి ఉండేదని చెప్పుకొచ్చారు. ఈ సంఘటన 2006లో వచ్చిన హాలీవుడ్ సినిమా కల్ట్‌ను తలపించింది. అందులో ఎఫ్‌బీఐ ఏజెంట్‌గా నటించిన శామ్యూల్ ఎల్ జాక్సన్.. తాను ప్రయాణించిన విమానం విషపూరితమైన పాములతో నిండి ఉందని తెలుసుకున్నప్పుడు అతడి పరిస్థితి ఎలా ఉంటుందో తనకూ అలాగే అనిపించిందని పైలట్ తెలిపాడు.