అమ్మాయి కోసం ఏకంగా 138 ఏళ్ల నిరీక్షించారు...ఎట్టకేలకు కరోలినాకు రెండో సంతానంగా పాప

ఇంట్లో అమ్మాయి లేకపోతే ఆ ఇంటికి అందం ఉండదంటారు. అందుకే ఓ వంశం ఏకంగా శతాబ్ధానికిపైగా ఆడపిల్ల పుట్టుకకోసం వేచిచూసింది. ఆ కుటుంబంలో కొన్ని తరాలుగా ఆడపిల్ల పుట్టుక ప్రస్తావనే లేదు. వంశంలో అందరికీ మగ సంతానమే. ఒకటి రెండు కాదు శతాబ్దానికిపైగా ఆడపిల్లలే లేరు. అమ్మాయి కోసం ఏకంగా 138 ఏళ్ల నిరీక్షించారు. వారి నిరీక్షణకు తెరదించుతూ ఓ పాపాయి పుట్టింది. చివరిసారిగా 1885లో ఆ వంశంలో ఆడపిల్ల పుట్టడం గమనార్హం. దీంతో ఆ కుటుంబసభ్యుల సంతోషానికి పట్టపగ్గాల్లేకుండా పోయింది. అమెరికా మిషిగాన్‌‌లోని కలడోనియాలో నివసిస్తోన్న క్లార్క్‌ కుటుంబంలో 1885 నుంచి అమ్మాయే జన్మించలేదు. ఇటీవల కరోలిన్‌, ఆండ్రూ క్లార్క్‌ దంపతులకు రెండో సంతానంగా ఆడపిల్ల పుట్టింది. దీంతో ఆ కుటుంబంలో ఆనందం వెల్లివిరిసింది.

కరోలిన్ ఓ వార్తా సంస్థతో మాట్లాడుతూ.. నా భర్త తరఫు కుటుంబంలో 1885 నుంచి ఆడపిల్ల పుట్టలేదని తెలిసి ఆశ్చర్యానికి గురయ్యాయని అన్నారు. ఆడపిల్ల కోసం తమ కుటుంబం చూస్తున్న ఎదురుచూపుల గురించి ఆండ్రూ చెప్పినప్పుడు తాను నమ్మలేదని చెప్పారు. ‘ప్రతిసారి 50/50 శాతం అవకాశాలు ఉంటాయి కదా..!’ అని వాదించినట్లు గుర్తుచేసుకుంది. ఈ విషయం గురించి అత్తమామల వద్ద ప్రస్తావిస్తే ఇతర కుటుంబసభ్యులకు ఆడపిల్లలు ఉన్నారు కానీ, తమ వంశంలో పుట్టలేదంటూ బాధపడేవారని వెల్లడించింది.

‘రెండోసారి గర్భం ధరించానని తెలిసినప్పుడు.. పుట్టేది అబ్బాయా? లేక అమ్మాయా? అనేది పట్టించుకోలేదు. కానీ, పాప పుట్టడం నిజంగా చాలా ఆనందంగా ఉంది’ అని ఆమె తెలిపారు. ఇంతకుముందు ఎప్పుడూ అమ్మాయి పేరు గురించి ఆలోచించలేదని, దీంతో చిన్నారికి పేరు పెట్టడం కూడా కష్టంగా తోచిందని ఆండ్రూ తెలిపారు. ఈ చిన్నారికి ఆడ్రీ అని పేరు పెట్టినట్టు తెలిపారు. గత సెప్టెంబర్‌లో నిర్వహించిన లింగనిర్ధారణ స్కాన్‌లో అమ్మాయి పుడుతోందని తెలిసినా ఈ విషయం రహస్యంగా ఉంచామని ఆండ్రూ చెప్పారు. మార్చి 17న ఆండ్రూ పండింటి పాపకు జన్మనిచ్చారు. తొలి కాన్పులో బాబు పుట్టాడని, వాడికి ప్రస్తుతం నాలుగేళ్లని ఆమె పేర్కొన్నారు. చిన్నారి మరింత ప్రత్యేకమైంది ఎందుకంటే మా వంశం 138 ఏళ్ల నిరీక్షణకు ఫలితం అన్నారు.