ఆ నోటిఫికేషన్ నకిలీది...వాటిని నమ్మోద్దు... తెలుగు, సంస్కృత అకాడమీ డైరెక్టర్
Andhra Pradesh Telugu | Suryaa Desk | Published : Sat, Apr 08, 2023, 09:55 PM
ఆంధ్రప్రదేశ్‌ రాష్ట్రానికి సంబంధించిన తెలుగు అకాడమీలో ఉద్యోగాల భర్తీ అంటూ చలామణీ అవుతున్న నోటిఫికేషన్ నకిలీదని తెలుగు, సంస్కృత అకాడమీ డైరెక్టర్ వి.రామకృష్ణ వెల్లడించారు. ఇలాంటి నోటిఫికేషన్ల పట్ల అభ్యర్థులు అప్రమత్తంగా ఉండాలని సూచించారు. ఈ మేరకు శనివారం ఆయన ఓ ప్రకటన విడుదల చేశారు.
విజయవాడలోని తెలుగు అకాడమీ పేరుతో ఇటీవల ఓ నోటిఫికేషన్ బయటకొచ్చింది. అకడమిక్‌ సర్వీసెస్‌లో 78 పోస్టులు, అడ్మినిస్ట్రేషన్‌ సర్వీసెస్‌లో 156 పోస్టుల భర్తీకి నోటిఫికేషన్ అంటూ ఒకటి వాట్సాప్‌ గ్రూపుల్లో, సోషల్ మీడియాలో సర్క్యులేట్‌ అవుతోంది. కొందరు గుర్తు తెలియని వ్యక్తులు అకాడమీ పేరుతో ఓ ఫేక్ వెబ్సైట్ను సృష్టించి అందులో ఆ నకిలీ నోటిఫికేషన్‌ను అందుబాటులో ఉంచారు. దరఖాస్తు చేసుకునేందుకు ఫీజును రూ. 500గా ప్రకటించారు.
ఎలాంటి రాత పరీక్ష లేకుండానే నియామకాలు నిర్వహిస్తున్నట్లు ఆ నోటిఫికేషన్‌లో పేర్కొన్నారు. దీంతో కొంత మంది అభ్యర్థులకు సందేహం వచ్చి.. ఈ విషయాన్ని తెలుగు అకాడమీ దృష్టికి తీసుకెళ్లారు. వెంటనే స్పందించిన అకాడమీ సిబ్బంది విజయవాడ పోలీస్‌ కమిషనర్‌కు ఫిర్యాదు చేశారు. ఏపీలో కొత్తగా ఏర్పాటైన తెలుగు అకాడమీకి ఇంకా వెబ్సైట్ను కూడా సిద్ధం చేయలేదని డైరెక్టర్ రామకృష్ణ పేర్కొన్నారు. అలాగే, అకాడమీకి సంబంధించి ఏ రకమైన ఉద్యోగాల భర్తీకి నోటిఫికేషన్ కూడా ఇవ్వలేదని ప్రకటనలో స్పష్టం చేశారు. ఇలాంటి నోటిఫికేషన్ల పట్ల అభ్యర్థులు అప్రమత్తంగా ఉండాలని సూచించారు.
|
|