విశాఖ స్టీల్ బిడ్ లో పాల్గొన్నాలన్న నిర్ణయంపై.... కేసీఆర్‌కు జేడీ లక్ష్మీనారాయణ ధన్యవాదాలు తెలిపారు

విశాఖ స్టీల్ ప్లాంట్ నిర్వహణకు సంబంధించిన ఎక్స్‌ప్రెషన్‌ ఆఫ్‌ ఇంట్రెస్ట్‌(ఈవోఐ) ప్రతిపాదనల బిడ్డింగ్‌లో తెలంగాణ ప్రభుత్వం సిద్ధమైనట్లు వార్తలొస్తున్నాయి. ఈ నిర్ణయంపై సీబీఐ మాజీ జేడీ లక్ష్మీనారాయణ స్పందించారు. ‘వైజాగ్ స్టీల్ ప్లాంట్ యొక్క ఈవోఐప్రక్రియలో పాల్గొనాలని నిర్ణయం తీసుకున్నందుకు కేసీఆర్‌కు చాలా ధన్యవాదాలు. ఏపీ సీఎంతోపాటు  ఎస్ఏఐఎల్ కూడా ఈవోఐలో భాగస్వామ్యానికి ఇదే విధమైన ఆసక్తిని చూపుతాయని ఆశిస్తున్నాను’ అన్నారు.

విశాఖ ఉక్కు పరిశ్రమకు సంబంధించి ఈవోఐ బిడ్డింగ్‌కు కేసీఆర్ ఆసక్తి చూపుతోందని తెలుస్తోంది. ప్రధానంగా స్టీల్ ప్లాంట్ ప్రైవేటీకరణకు వ్యతిరేకత వ్యక్తం చేయడంతో పాటుగా కేంద్రంపై ఒత్తిడి తేవడం, తెలంగాణలోని ప్రాజెక్టులకు ఉక్కు సమకూర్చుకునేందుకు ఈ నిర్ణయం తీసుకున్నట్లు సమాచారం. ఒకటి రెండు, రోజుల్లో క్లారిటీ వచ్చే అవకాశం ఉంది.. అలాగే అధికారులు కూడా విశాఖ వెళతారని చెబుతున్నారు. ఇటు విశాఖ స్టీల్ ప్లాంట్‌ ప్రైవేటీకరణకు వ్యతిరేకంగా జరుగుతున్న పోరాటానికి కూడా బీఆర్ఎస్ మద్దతు ఇస్తోంది. ఏపీ అధ్యక్షుడు తోట చంద్రశేఖర్‌తో పాటూ మాజీ మంత్రి రావెల కిషోర్‌బాబులు విశాఖలో ప్లాంట్ సిబ్బంది కార్మికులు చేస్తున్న నిరసనకు సంఘీభావం తెలిపారు.

గత నెల 27న విశాఖ స్టీల్ ప్లాంట్‌కు అవసరమైన ఈవోఐ కోసం రాష్ట్రీయ ఇస్పాత్‌ నిగం లిమిటెడ్‌.. ప్రైవేట్‌, ఇతర స్టీల్‌ అనుబంధ రంగాల కంపెనీల నుంచి టెండర్లను ఆహ్వానించింది. ఈ నిర్ణయాన్ని తెలంగాణ మంత్రి కేటీఆర్ తప్పుబట్టారు.. ఈ మేరకు ఒక లేఖ కూడా రాసిన సంగతి తెలిసిందే. స్టీల్ ప్లాంట్‌ను కార్పొరేట్ కంపెనీలకు అప్పగించే ప్రక్రియలో తొలి అడుగు అంటూ వ్యాఖ్యానించారు.

ఇటు సీబీఐ మాజీ జేడీ లక్ష్మీనారాయణ కూడా విశాఖ స్టీల్ ప్లాంట్ ప్రైవేటీకరణ నిర్ణయాన్ని తప్పుబట్టారు. ఆయన ఈ నిర్ణయాన్ని సవాల్ చేస్తూ హైకోర్టును ఆశ్రయించారు.. ఈ పిటిషన్‌పై విచారణ కూడా కొనసాగుతోంది. ఇటు లక్ష్మీనారాయణ కూడా 2019లో విశాఖ నుంచి ఎంపీగా పోటీచేసి ఓడిపోయారు. వచ్చే ఎన్నికల్లో కూడా విశాఖ నుంచే పోటీ చేస్తానని ఇప్పటికే ప్రకటించిన సంగతి తెలిసిందే.