తిరుమల దివ్య దర్శనం టికెట్లుపై పలు మార్పులు చేసిన టీటీడీ

కాలానుగుణంగా పలు మార్పులకు శ్రీకారం చుట్టిిన టీటీడీ తాజాగా టిక్కెట్ల విషయంలోనూ మార్పులు చేర్పులు చేసింది. తిరుమల శ్రీవారి దర్శనానికి వెళ్లే భక్తులకు ముఖ్యగమనిక.. నిన్నటి వరకు అలిపిరి నుంచి కాలినడకన వచ్చే భక్తులకు గాలి గోపురం దగ్గర దివ్య దర్శనం టికెట్లు ఇస్తున్నారు. ఇప్పుడు దివ్య దర్శన టోకెన్ల జారీ కేంద్రాన్ని టీటీడీ మార్పు చేసింది. శుక్రవారం నుంచి అలిపిరి భూదేవి కాంప్లెక్స్‌లో టికెట్టలను జారీ చేయనున్నారు. టోకెన్లు పొందిన భక్తులు అలిపిరి కాలినడక మార్గంలోని గాలిగోపురం దగ్గర ఉన్న కేంద్రంలో స్కాన్‌ చేసుకోవాల్సి ఉంటుంది.

భక్తులు ఎవరైనా ఒకవేళ స్కాన్‌ చేసుకోకపోయినా.. ఇతర మార్గాల్లో తిరుమల చేరుకున్నా.. స్వామివారి దర్శనానికి అనుమతించరు. ఇటు మరో నడకమార్గం శ్రీవారి మెట్టు మార్గంలో జారీ చేస్తున్న దివ్య దర్శన టోకెన్లను అక్కడే ఇస్తారు. అంటే శ్రీవారి మెట్టు మార్గం లో వెళ్లే భక్తులకు యధాప్రకారం దివ్యదర్శనం టోకెన్లు 1240వ మెట్టు వద్ద ఇస్తారు. అలిపిరి భూదేవి కాంప్లెక్స్‌లో ఇప్పటివరకు జారీ చేస్తున్న టైం స్లాట్ సర్వదర్శన టోకెన్ల (ఎస్‌ఎస్‌డీ) కేంద్రాన్ని విష్ణునివాసం యాత్రికుల వసతి సముదాయానికి మార్చింది టీటీడీ.

ఇక వాహనాల్లో తిరుమలకు చేరుకోవాలనుకునేవారు.. తిరుపతిలో స్వామి దర్శనం కొరకు, ఎస్.ఎస్.డి టోకెన్స్ జారీ చేయడం జరుగుతుంది అని టీటీడీ తెలిపింది. 01) శ్రీనివాసం, ఆర్.టి.సి. బస్టాండ్ ఎదురుగా 02) విష్ణునివాసం, రైల్వేస్టేషన్ ఎదురుగా.. 03) గోవిందరాజసత్రాలు, తిరుపతి రైల్వేస్టేషన్ వెనుకాల ఉంది. భక్తులు ఈ విషయాలను గమనించి టీటీడీకి సహకరించాలని కోరారు.

మరోవైపు మరో భక్తుడు తిరుమల శ్రీవారికి విరాళం అందించారు. అనంతపురం కు చెందిన శ్రీ పి.శ్రీధర్ దంపతులు గురువారం టీటీడీ వేద పరిరక్షణ ట్రస్ట్ కు రూ 10,11,116 విరాళం అందజేశారు. ఈ మేరకు డీడీని గురువారం టీటీడీ పరిపాలన భవనంలో ఈవో ధర్మా రెడ్డికి అందజేశారు. ఎస్వీబీసీ సిఈవో శ్రీ షణ్ముఖ్ కుమార్ ఈ కార్యక్రమంలో పాల్గొన్నారు. శ్రీ వేంకటేశ్వర వేద విశ్వవిద్యాలయం అకడమిక్ కౌన్సిల్ సమావేశం జరిగింది. వర్సిటీ ఉపకులపతి ఆచార్య రాణి సదాశివమూర్తి అధ్యక్షతన జరిగిన ఈ సమావేశంలో టీటీడీ జేఈవో సదా భార్గవి, జాతీయ సంస్కృత వర్సిటీ ఉపకులపతి ఆచార్య కృష్ణమూర్తి, డిఈవో శ్రీ భాస్కర్‌రెడ్డి ఉన్నారు. త్వరలో విశ్వవిద్యాలయం ఏడవ స్నాతకోత్సవాన్ని నిర్వహించి ఇద్దరు బహుముఖ వేద పండితులకు మహా మహోపాధ్యాయ బిరుదు ప్రదానం చేస్తారు. టీటీడీలోని అన్ని వేదపాఠశాలలను వర్సిటీ పరిధిలోకి తీసుకొస్తారు. ఇంటర్మీడియట్ స్థాయిలో ఆగమ అభిగ్న, పౌరోహిత్య అభిగ్న కోర్సులను ప్రవేశపెడతారు. IKS-ఇండియన్ నాలెడ్జ్ సిస్టమ్ కోర్సులను ప్రవేశపెడతారు. ఢిల్లీకి చెందిన అక్షరధామ్ స్వామి నారాయణ్ ట్రస్ట్‌తో ఒప్పందం కుదుర్చుకుని విజ్ఞానాన్ని పంచుకుంటారు.