బ్యాంక్ తీరును తప్పబట్టిన ఏపీ హైకోర్టు,,విద్యార్థి లోన్ విషయంలో సీరియస్

లోన్ ఎగ్గొట్టిన ధనికులను వదిలేసి సామాన్యులపై మాత్రం బ్యాంకులు రువాబు ప్రదర్శస్తాయి. ఇదిలావుంటే  విద్యార్థికి ఎడ్యకేషన్ లోన్ విషయంలో బ్యాంకు తీరుపై ఏపీ హైకోర్టు ఆగ్రహం వ్యక్తం చేసింది. 2019 జనవరి 17న మచిలీపట్నానికి చెందిన నిశ్చల్‌ ఎడ్యుకేషన్‌ లోన్‌ కోసం ఆంధ్ర బ్యాంక్‌ (యూనియన్‌ బ్యాంక్‌‌లో విలీనం)లో ధరఖాస్తు చేసుకున్నారు. అతడి తల్లి ఇచ్చిన ఆస్తి ఒరిజినల్‌ గిఫ్ట్‌ డీడ్‌ను బ్యాంకు అధికారులకు సమర్పించారు. కోలేటరల్‌ సెక్యూరిటీగా ఉంచిన ఆస్తికి సంబంధించిన ఒరిజనల్‌ డాక్యుమెంట్‌ సమర్పించలేదనే బ్యాంక్ అధికారులు లోన్‌ను తిరస్కరించారు.

అయితే లోన్‌ ధరఖాస్తుతో పాటు సమర్పించిన ఒరిజినల్‌ గిఫ్ట్‌ డీడ్‌ను మాత్రం తమ వద్దే ఉంచుకున్నారని విద్యార్థి ఆరోపించాడు. వెనక్కు ఇవ్వాలని కోరినా బ్యాంక్ అధికారులు స్పందించలేదని.. గిఫ్ట్‌ డీడ్‌ తమకు అందజేయలేదన్నారు. తాను సమర్పించిన ఒరిజినల్‌ పత్రాలను తిరిగిచ్చేలా బ్యాంకు అధికారులను ఆదేశించాలని కోరుతూ నిశ్చల్ హైకోర్టును ఆశ్రయించారు.

దరఖాస్తుతో పాటు ఒరిజినల్‌ గిఫ్ట్‌ డీడ్‌ను సమర్పించినా ఇవ్వలేదని బ్యాంక్ అధికారులు చెప్పడం దారుణమన్నారు పిటిషనర్ తరపు లాయర్. దరఖాస్తుతో పాటు ఒరిజినల్‌ డీడ్‌ను సమర్పించామని ఆధారాలను కోర్టుకు సమర్పించారు. పూర్తివివరాలను తెలుసుకుని కోర్టు ముందుంచేందుకు గడువు కోరారు బ్యాంక్ తరపు లాయర్. దీంతో విచారణ వాయిదా వేయగా.. తాజాగా మరోసారి విచారణ జరిగింది.

విద్యార్థి దరఖాస్తుతో పాటు పిటిషనర్‌ ఒరిజినల్‌ డీడ్‌ను సమర్పించారని బ్యాంక్ తరపు లాయర్ తెలిపారు. పిటిషనర్‌కు సంబంధించిన ఒరిజినల్‌ గిఫ్ట్‌ డీడ్‌ బ్యాంక్‌ వద్దే ఉందని.. వాటిని తిరిగి ఇచ్చేందుకు బ్యాంకు సిద్ధంగా ఉందని.. ఆ డీడ్‌ ద్వారా తనఖాపెట్టిన ఆస్తిని 15 రోజుల్లో విడిపిస్తామన్నారు. ఇటీవలే ఈ విషయం తెలిసిందని.. తనఖా పెట్టిన ఆస్తిని విడిపించేందుకు సిద్ధంగా ఉన్నామన్నారు. విద్యార్థి తనఖా కింద సమర్పించిన ఒరిజినల్‌ గిఫ్ట్‌డీడ్‌ను బ్యాంకు అధికారులు విడుదల చేయకపోవడంపై హైకోర్టు ఆగ్రహం వ్యక్తం చేసింది. బ్యాంక్‌ అధికారుల చర్యలతో పిటిషనర్‌ను వేధింపులకు గురిచేశారని.. ఆయన కోర్టును ఆశ్రయించే పరిస్థితికి తీసుకొచ్చారని అభిప్రాయపడింది.

తనఖా నుంచి ఆస్తిని విడుదల చేయకపోవడాన్ని తప్పుబట్టింది. పిటిషనర్‌కు అయిన కోర్టు ఖర్చుల నిమిత్తం రూ.25000 చెల్లించాలని బ్యాంక్‌ అధికారులను ఆదేశించింది. తీర్పు కాపీ అందిన 15 రోజుల్లో ఈ మొత్తాన్ని డీడీ రూపంలో రిజిస్ట్రార్‌ జ్యుడీషియల్‌ వద్ద జమ చేయాలని తీర్పు ఇచ్చింది. తమ ఆదేశాల అమలుకు చట్టప్రకారం చర్యలు తీసుకోవాలని రిజిస్ట్రార్‌కు స్పష్టం చేసింది. విద్యార్థికి సంబంధించిన ఈ వ్యవహారంలో బ్యాంక్ అధికారుల తీరును హైకోర్టు తప్పుబట్టింది.