చిన్నప్పటినుంచి దూకుడు స్వభావం...అతిక్ అహ్మద్ సొంతం

పోలీసుల కళ్ల ముందే మీడియా లైవ్ కవరేజీ సమయంలోనే అతిఖ్‌తోపాటు అతడి సోదరుడు హత్యకు గురయ్యారు. యూపీ బాహుబలిగా పేరొందిన అతిఖ్ అహ్మద్ అంటే ఆ రాష్ట్రంలో ఎవరైనా సరే భయపడాల్సిందే. ఒకప్పుడు పూర్వాంచల్ ప్రాంతం మొత్తం అతడి పేరు మార్మోగింది. అతిఖ్ అహ్మద్ కేసు నుంచి గతంలో పది మంది జడ్జిలు తప్పుకున్నారంటే.. అతడంటే ఎంత భయమో అర్థం చేసుకోవచ్చు. రాజు పాల్, ఉమేశ్ పాల్ హత్య కేసులతోనే అతిఖ్ అహ్మద్ బయటి ప్రపంచానికి ఎక్కువగా తెలిసినప్పటికీ.. అతడికిపై వందకుపైగా కేసులున్నాయి. ప్రయాగ్‌రాజ్‌లోని చకియా చెందిన అతిఖ్ తండ్రి ఫిరోజ్ అహ్మద్ గుర్రపు జట్కా బండి నడిపి కుటుంబాన్ని పోషించేవాడు. పదో తరగతి ఫెయిల్ అయిన అతిఖ్ 17 ఏళ్ల వయసులోనే చెడు సహవాసాల బాట పట్టాడు. ఎక్కువ డబ్బు సంపాదించాలనే ఆశతో 1979లోనే దొంగతనాలు, కిడ్నాప్‌ చేయడం, దోపిడీలు చేయడం మొదలుపెట్టాడు. అదే ఏడాది అతిఖ్‌పై హత్య కేసు నమోదైంది.

ఆ సమయంలో అలహాబాద్ పాత బస్తీలో చాంద్ బాబా అంటే గ్యాంగ్ స్టర్ ఉండేవాడు. అతడంటే అందరికీ భయం. చాంద్ బాబా తీరు పట్ల పోలీసులు, రాజకీయ నాయకులు సైతం విసిగిపోయారు. అలాంటి పరిస్థితుల్లో అతిఖ్ ఎదగడం మొదలుపెట్టాడు. ఏడేళ్లలోనే చాంద్ బాబా కంటే అతిఖ్ ప్రమాదకారిగా మారాడు. యథేచ్ఛగా దొంగతనాలు, కిడ్నాప్‌లు, హత్యలు చేయడం మొదలుపెట్టాడు. అతిఖ్ పోలీసుల కంట్లో నలుసులా మారాడు. 1986లో పోలీసులు అతణ్ని అరెస్ట్ చేశారు. కానీ రాజకీయ నాయకులతో తనకున్న సంబంధాలను ఉపయోగించుకొని అతడు జైలు నుంచి బయటకొచ్చాడు.

ఆ తర్వాత నేర సామ్రాజ్యంలో పేరు మరింత తెలుసొచ్చింది. 1989లో రాజకీయాల్లో అడుగుపెట్టిన అతిఖ్ అలహాబాద్ వెస్ట్ నియోజకవర్గం నుంచి స్వతంత్ర అభ్యర్థిగా బరిలోకి దిగాడు. అతడికి పోటీ చాంద్ బాబా. దీంతో గ్యాంగ్ వార్ తలెత్తింది. ఆ ఎన్నికల్లో అతిఖ్ గెలుపొందాడు అనడం కంటే అతడి పట్ల జనాల్లో ఉన్న భయమే గెలిపించిందని చెప్పొచ్చు. తర్వాత కొద్ది నెలలకే చాంద్ బాబా పట్టపగలు నడిరోడ్డుపై హత్యకు గురయ్యాడు. దాంతో పూర్వాంచల్ ప్రాంతం మొత్తానికి అతిఖ్ గురించి తెలుసొచ్చింది.

1991, 1993ల్లోనూ అతిఖ్ ఇండిపెండెంట్‌గా పోటీ చేసి ఎమ్మెల్యేగా గెలుపొందాడు. 1996లో సమాజ్‌వాదీ పార్టీ తరఫున ఎమ్మెల్యేగా పోటీ చేసిన అతిఖ్ విజయం సాధించాడు. 1999లో అప్నా దల్ తరఫున ప్రతాప్‌గఢ్ నుంచి పోటీ చేసి ఓడిపోయాడు. 2002లో అలహాబాద్ వెస్ట్ నుంచి ఎమ్మెల్యేగా గెలుపొందాడు. అతిఖ్ అంటే భయంతో అహ్మదాబాద్ వెస్ట్ నుంచి అతడిపై పోటీ చేయడానికి రాజకీయ నాయకులెవరూ సాహసించలేకపోయారు. పార్టీలు టికెట్ ఇచ్చినప్పటికీ.. అభ్యర్థులు మాత్రం వెనక్కి ఇచ్చే వారు.