జగన్‌ ఎక్కడ ఉంటే.. అక్కడ శని...చంద్రబాబు

సీఎం జగన్‌ ఎక్కడ ఉంటే.. అక్కడ శని అని టీడీపీ అధినేత నారా చంద్రబాబు నాయుడు అన్నారు. జగన్‌ ఓ ఐరన్‌లెగ్‌ అని.. అమరావతిని నాశనం చేశారని దుయ్యబట్టారు. ఇప్పుడు విశాఖపట్నం నుంచి పారిపాలిస్తానని చెబుతున్నారని.. ఆయన్ను చూసి విశాఖ వాసులు భయపడుతున్నారని చెప్పారు. జగన్‌ పదవికి ఎక్స్‌పైరీ డేట్‌ వచ్చేసిందని.. ఇకపై జన్మలో ఆయన ముఖ్యమంత్రి కాలేరని వ్యాఖ్యానించారు.

తెలుగు దేశం పార్టీ కార్యకర్తలు వచ్చే ఎన్నికల్లో గెలుపే ధ్యేయంగా ఐకమత్యంతో పని చేయాలని ఆ పార్టీ అధినేత చంద్రబాబునాయుడు పిలుపునిచ్చారు. వైఎస్సార్‌ జిల్లా బద్వేలులో నిర్వహించిన కార్యకర్తల సమావేశంలో చంద్రబాబు మాట్లాడుతూ.. బంధువులు, రక్త సంబంధీకులు వదిలేసినా పార్టీ వెంట ఉంటుందని కార్యకర్తలకు సూచించారు. టీడీపీ పాలన వల్ల విదేశాల్లో స్థిరపడ్డ వారంతా పార్టీకి విరాళాలు ఇవ్వాలని ఈ సందర్భంగా చంద్రబాబు పిలుపునిచ్చారు. రూ. 5 వేలు విరాళం ఇచ్చిన వారికి జీవితకాల సభ్యత్వం ఇస్తామని చెప్పారు. ఇక, కార్యకర్తలను ఆదుకునే బాధ్యత పార్టీదే అని స్పష్టం చేశారు.

ఈ సందర్భంగా ముఖ్యమంత్రి వైఎస్ జగన్మోహన్ రెడ్డిపై చంద్రబాబు తీవ్ర విమర్శలు చేశారు. 

సీఎం జగన్మోహన్ రెడ్డి పరిపాలనపై ప్రజలు కోపంగా ఉన్నారని చంద్రబాబు చెప్పారు. ఇచ్చేది 10 రూపాయలు అయితే.. తీసుకునేది వంద రూపాయలని విమర్శించారు. బటన్ నొక్కి రూ. 2 లక్షల కోట్లు ఇచ్చానంటున్న సీఎం జగన్.. మరో రూ. 2 లక్షల కోట్లు దోచేశారని చంద్రబాబు ఆరోపించారు.

ఇక, శాసనమండలి ఎన్నికల్లో టీడీపీ ఘన విజయం సాధించడంతో వైసీపీలో భూకంపం పుట్టించిందని, వీటి పరిధిలోని 108 నియోజకవర్గాల్లో ముందున్నామని చంద్రబాబునాయుడు పేర్కొన్నారు. ముఖ్యమంత్రి జగన్మోహన్‌రెడ్డి 175 నియోజకవర్గాల్లో వైసీపీ గెలుపు వైనాట్‌ అంటున్నారని, గత ఎన్నికల్లో బీటెక్‌ రవి, ఇటీవల జరిగిన ఎమ్మెల్సీ ఎన్నికల్లో రాంగోపాల్‌ రెడ్డి, రాబోయే ఎన్నికల్లో పులివెందుల్లో గెలుపు వైనాట్‌ అని తాను అంటున్నానని పేర్కొన్నారు.

‘నా పార్టీనే.. నా భవిష్యత్’ నినాదంతో ముందుకు వెళ్లాలని చంద్రబాబు అన్నారు. దివంగత ముఖ్యమంత్రి ఎన్టీ రామారావు సాగునీటికి ప్రాధాన్యత ఇచ్చారని.. తెలుగుగంగ, హంద్రీనీవా, గాలేరు, నగరి.. ప్రాజెక్టులను ప్రారంభించిన ఘనత ఎన్టీఆర్‌దే అని కొనియాడారు. హైదరాబాద్ అభివృద్ధిలో టీడీపీ పాత్ర ఎంతో కీలకమన్నారు.

ఇదిలావుంటే చంద్రబాబు 73వ పుట్టిన రోజు సందర్భంగా ప్రత్యేక గీతం ఆవిష్కరణ జరిగింది. చంద్రబాబు జీవిత ప్రస్థానంపై ప్రత్యేక కథాగానం చేశారు. ఈ కథాగానాన్ని టీడీపీ నాయకులు కేశినేని చిన్ని, వెనిగండ్ల రాము రూపొందించారు. చంద్రబాబు జీవిత చరిత్రపై 6.50 నిమిషాల గీతం రూపకల్పన చేశారు. ఈ గీతాన్ని విజయవాడలో టీడీపీ సీనియర్ నేతలు దేవినేని ఉమా, గద్దె రామ్మోహన్, బుద్దా వెంకన్న, వర్ల రామయ్య, నాగుల్ మీరా తదితరులు గీతాన్ని ఆవిష్కరించారు.