గంజాయి సాగును చట్టబద్ధం చేసే యోచనలో హిమాచల్ ప్రదేశ్
national | Suryaa Desk | Published : Wed, Apr 19, 2023, 10:40 PM
హిమాచల్ ప్రదేశ్ రాష్ట్రం తాజాగా కీలక నిర్ణయం తీసుకొనే దిశగా అడుగులేస్తోంది. గంజాయి అనేది ఓ మత్తు పదార్థం. నిషేధిత మత్తు పదార్థాల జాబితాలోనిది. దీన్నే కేనాబిస్ అని కూడా అంటారు. ఇప్పుడు గంజాయి సాగును రాష్ట్రంలో అనుమతించాలా? అన్నది హిమాచల్ ప్రదేశ్ పరిశీలించనుంది. చట్టప్రకారం నిషేధం ఉన్నా, అక్రమంగా సాగవుతూనే ఉంది. దీంతో దీన్ని చట్టబద్ధం చేయడం వల్ల ఆదాయం పెంచుకోవచ్చన్నది హిమాచల్ ప్రదేశ్ రాష్ట్ర సర్కారు భావిస్తోంది.
దీనిపై ముఖ్యమంత్రి సుఖ్ వీందర్ సింగ్ సుఖు మాట్లాడుతూ.. గంజాయి సాగును చట్టబద్ధం చేసే అంశాన్ని నిపుణుల కమిటీ పరిశీలిస్తుందని ప్రకటించారు. గంజాయిని ఔషధాల తయారీతోపాటు, పారిశ్రామిక అవసరాలకు ఉపయోగిస్తుండడం తెలిసిందే. ప్రభుత్వం నియమించిన కమిటీ అన్ని అంశాలను పరిగణనలోకి తీసుకుని ఓ నిర్ణయానికి రానుంది. ‘‘కేనాబిస్ ఆకులు, విత్తనాల వినియోగానికి సంబంధించిన సమాచారం ఆధారంగా మన చట్టం ఉంటుంది. రాజస్థాన్, మధ్యప్రదేశ్, ఉత్తరప్రదేశ్ లోని కొన్ని జిల్లాల్లో ఇప్పటికే దీని సాగును కేంద్ర ప్రభుత్వం చట్టబద్ధం చేసింది’’ అని సుఖు చెప్పారు.
|
|