గడిచిన 24 గంటల్లో 10 వేలకుపైగా కరోనా పాజిటివ్ కేసులు

మనదేశంలో రోజువారీ కరోనా కేసులు రోజురోజుకు పెరుగుతూ వస్తోన్నాయి. రోజూ 10 వేలకుపైగా పాజిటివ్ కేసులు దేశంలో నమోదవుతుండటం కలవరపెడుతోంది. వివిధ రాష్ట్రాల్లో కరోనా తీవ్రత మరింత ఎక్కువగా ఉంది. దీంతో రానున్న రోజుల్లో కరోనా కేసులు మరింత పెరిగే అవకాశం ఉందని వైద్య నిపుణులు హెచ్చరిస్తున్నారు.  గడిచిన 24 గంటల్లో 10 వేలకుపైగా పాజిటివ్ కేసులు దేశంలో నమోదయ్యాయి. వీటితో కలిపి క్రియాశీల కేసుల సంఖ్య 63,562కు చేరుకుంది. గడిచిన 24 గంటల్లో 24 మంది కరోనాతో మృత్యువాత పడ్డారు. మహారాష్ట్ర నుంచి ఎక్కువ కేసులు, మరణాలు నమోదయ్యాయి. బుధవారం కేంద్ర ఆరోగ్యశాఖ విడుదల చేసిన డేటా ప్రకారం.. గడిచిన 24 గంటల్లో 10,542 కొత్త కరోనా కేసులు నమోదయ్యాయి. ముందు రోజే కంటే 38 శాతం ఎక్కువగా పాజిటివ్ కేసులు నమోదయ్యాయి. 8,175 మంది కరోనా నుంచి కోలుకోగా.. రికవరీ రేటు 98.68 శాతంగా ఉన్నట్లు కేంద్ర ఆరోగ్యశాఖ తన బులిటెన్‌లో పేర్కొంది.

గడిచిన 24 గంటల్లో 2,40,014 మందికి కరోనా టెస్టులు చేసినట్లు కేంద్ర ఆరోగ్య మంత్రిత్వశాఖ స్పష్టం చేసింది. కొత్తగా నమోదైన 24 మరణాల్లో ఎక్కువగా మహారాష్ట్ర నుంచి వచ్చినట్లు తెలిపింది. ఇప్పటివరకు దేశవ్యాప్తంగా కరోనా బారిన పడి 5,31,190 మంది మరణించారు. మరణాల రేటు 1.19 శాతంగా ఉండగా.. మహారాష్ట్ర తర్వాత కర్ణాటక, ఢిల్లీ, ఛత్తీస్‌గఢ్ రాష్ట్రాల్లో ఎక్కువగా మరణాలు సంభవిస్తున్నాయి. ఇక దేశవ్యాప్తంగా ఇప్పటివరకు 2,20,66,27,758 డోసుల వ్యాక్సిన్ పంపిణీ చేశారు. కరోనా కేసులు పెరుగుతున్న నేపథ్యంలో కేంద్ర ప్రభుత్వం అలర్ట్ అయింది. కరోనా కట్టడికి జాగ్రత్తలు తీసుకుంటోంది. అన్ని రాష్ట్ర ప్రభుత్వాలను అప్రమత్తం చేసింది. కేసులు పెరుగుతున్న క్రమంలో జాగ్రత్తగా ఉండాలని, తగిన చర్యలు తీసుకోవాలని సూచించింది. వ్యాక్సిన్ల పంపిణీని కొనసాగించాలని ఆదేశాలు జారీ చేసింది.

అయితే కరోనా మళ్లీ వేగంగా వ్యాప్తి చెందుతున్న క్రమంలో రాష్ట్ర ప్రభుత్వాలు అలర్ట్ అయ్యాయి. బూస్టర్ డోస్ పంపిణీని చేపడుతున్నాయి. తెలంగాణ ప్రభుత్వం నేటి నుంచి బూస్టర్ డోస్‌లను వేయాలని నిర్ణయించింది. ఇందుకు అన్ని ఏర్పాట్లు చేస్తోంది. రాష్ట్రవ్యాప్తంగా ఉన్న అన్ని వ్యాక్సిన్ సెంటర్లలో ఉచితంగా వ్యాక్సిన్ వేయనున్నారు. దీనికి 5 లక్షల డోస్‌లను సిద్దం చేసింది. కొన్ని రోజుల పాటు ఈ వ్యాక్సిన్ డ్రైవ్‌ను కొనసాగించనున్నట్లు ఆరోగ్యశాఖ వర్గాలు చెబుతున్నాయి.