బాబు కాన్వాయ్ పై దాడి గర్హనీయం: తులసిరెడ్డి

యర్రగొండపాలెంలో తెలుగు దేశం పార్టీ అధినేత చంద్రబాబునాయుడు కాన్వాయ్‌పై వైసీపీ నేతలు దాడులు చేయడం కాంగ్రెస్‌ పార్టీ ప్రదేశ్‌ కమిటీ మీడియా ఛైర్మన్‌, మాజీ రాజ్యసభ సభ్యుడు డాక్టర్ ఎన్.తులసి రెడ్డి  గర్హనీయమన్నారు. మంత్రి ఆదిమూలపు సురేష్ రోడ్డు మీద చొక్కా విప్పి వీధి రౌడీలా ప్రవర్తించడం సిగ్గుచేటు అన్నారు.  శాంతి భద్రతలను కాపాడాల్సిన ప్రభుత్వమే శాంతి భద్రతల సమస్యలను సృష్టించడం దురదృష్టకరమని తులసిరెడ్డి అన్నారు. మంత్రి వర్గం నుంచి మంత్రి ఆదిమూలపు సురేష్‌ను ముఖ్యమంత్రి వైఎస్ జగన్మోహన్ రెడ్డి వెంటనే బర్తరఫ్ చేయాలని తులసిరెడ్డి డిమాండ్ చేశారు. ఇక, వీర జవాన్లను రోడ్డు మార్గాన కాకుండా వాయుమార్గాన తరలించేందుకు విమానాలు సమకూర్చి ఉంటే 2019లో పుల్వామా దుర్ఘటనలో 40 మంది జవాన్లు చనిపోయి ఉండేవారు కాదని చెప్పినందుకు మాజీ గవర్నర్ సత్యపాల్ మాలిక్‌పై నరేంద్ర మోదీ ప్రభుత్వం కక్ష సాధించడం శోచనీయమని తులసి రెడ్డి అన్నారు. ఎన్నికల్లో లబ్ధి కోసం జవాన్ల ప్రాణాలను బలి పెట్టడం దుర్మార్గమన్నారు.

దేశంలో ప్రజాస్వామ్యం ప్రమాదంలో పడిందని, బీజేపీ ప్రభుత్వం కక్షపూరిత రాజకీయాలు చేస్తోందని తులసిరెడ్డి విమర్శించారు. కాంగ్రెస్ పార్టీ మాజీ జాతీయ అధ్యక్షుడు రాహుల్‌ గాంధీకి చిన్న కారణానికే రెండేళ్లు శిక్ష పడటం, అనంతరం ఆయన లోక్‌సభ సభ్యత్వం రద్దు చేయడం, చివరికి, బంగ్లా ఖాళీ చేయించడం తదితర చర్యలకు బీజేపీ పూనుకుందని తప్పుబట్టారు. దేశంలోని బడా పారిశ్రామికవేత్తల అవినీతిపై ప్రశ్నించినందుకు ఇలాంటి చర్యలకు దిగడం దారుణమన్నారు. దేశ ప్రజలు అన్నీ గమనిస్తున్నారని, గతంలో ఇందిరా గాంధీపై కుట్రపన్నిన పార్టీలు కాలగర్భంలో కలిసిపోయిన సంగతి తెలుసుకోవాలన్నారు. రాబోయే ఎన్నికల్లో బీజేపీకి ప్రజలు తగిన బుద్ధి చెబుతారని తులసిరెడ్డి అన్నారు.

ఇక, పారిశ్రామికవేత్త గౌతమ్‌ ఆదానీ భారతీయ విరాళం రూపంలో ఎంత ఇచ్చారని తులసి రెడ్డి ప్రశ్నించారు. అలాగే, ప్రధాన మంత్రి నరేంద్ర మోదీ విదేశీ పర్యటన అనంతరం అదానీకి ఎన్ని విదేశీ కాంట్రాక్టులు లభించాయని నిలదీశారు. 2014లో బీజేపీ ప్రభుత్వం అధికారంలోకి రాక ముందు ప్రపంచంలోని సంపన్నుల జాబితాలో వందల సంఖ్య దూరంలో ఉన్న గౌతమ్‌ ఆదానీ.. నరేంద్ర మోదీ ప్రధాని అయ్యాక రెండో ర్యాంకుకు ఎలా చేరుకున్నారని ప్రశ్నించారు. ఈ అంశాలను ప్రధాని నరేంద్ర మోదీ దేశానికి చెప్పాలని తులసిరెడ్డి డిమాండ్ చేశారు.