అవినాష్ రెడ్డి అరెస్ట్ తప్పదు: ఆదినారాయణ రెడ్డి

మాజీ మంత్రి వైఎస్ వివేకానందరెడ్డి హత్య కేసులోె కడప వైఎస్సార్ కాంగ్రెస్ పార్టీ ఎంపీ వైఎస్ అవినాష్ రెడ్డి అరెస్టు కాక తప్పదని భారతీయ జనతా పార్టీ (బీజేపీ) సీనియర్ నేత, మాజీ మంత్రి ఆదినారాయణ రెడ్డి వ్యాఖ్యానించారు. ఈ కేసులో  సంబంధం ఉన్న ప్రతి ఒక్కరూ బయటికొస్తారని ఆయన  అన్నారు. సెంట్రల్ బ్యూరో ఆఫ్ ఇన్వెస్టిగేషన్ (సీబీఐ) అరెస్టు చేస్తారని భయపడే ముందస్తు బెయిల్ కోసం అవినాష్ రెడ్డి పిటిషన్లు వేస్తున్నారని ఆరోపించారు. ఈ కేసులో మహా కుట్ర ఉందని.. సంబంధం ఉన్న వాళ్లందరికీ శిక్ష తప్పదన్నారు. ఈ కేసులో త్వరలోనే సీబీఐ యాక్షన్ తీసుకుంటుందని చెప్పారు.

ఈ మేరకు ఢిల్లీలో మంగళవారం మాజీ మంత్రి ఆదినారాయణ రెడ్డి మీడియాతో మాట్లాడుతూ.. వైఎస్ జగన్మోహన్ రెడ్డి ప్రతిపక్ష నేతగా ఉన్నప్పుడు సీబీఐ విచారణ కావాలని కోరారని, కానీ అధికారంలోకి వచ్చిన తర్వాత వద్దు అంటున్నారని విమర్శించారు. వీళ్ల వాలకం చూస్తుంటే.. వివేకా హత్య కేసును దర్యాప్తు చేయాలని అమెరికాకు వెళ్తారా? అని ఎద్దేవా చేశారు. కోర్టు తీర్పులన్నీ వారికి అనుకూలంగానే రావాలా? అని ప్రశ్నించారు. సీబీఐ కాబట్టే నిజనిజాలు బయటపడుతున్నాయని చెప్పారు. ఈ కేసులో సీబీఐపై ఒత్తిడి ఉండే అవకాశమే లేదన్నారు.

‘‘వివేకా హత్యకు ముందు కుక్కను ఎవరు చంపారు? గొడ్డలి ఎక్కడ కొన్నారో అందరికీ తెలుసు. సీఐ వద్దంటున్నా.. వివేకా ఇంటిని క్లీన్ చేశారు. ఆయన శరీరంపై ఉన్న గాయాలకు కుట్లు వేశారు. ఇది మా కుటుంబ సమస్య అని సీఐతో సీఐతో ఎంపీ అవినాష్ రెడ్డి అన్నారు’’ అని ఆది నారాయణ రెడ్డి పేర్కొన్నారు.

ఇక, వివేకానందరెడ్డి ఉదయం చనిపోతే సాయంత్రం 4 గంటలకు సీఎం జగన్మోహన్ రెడ్డి వచ్చారని.. అయితే, ఇంట్లో కప్‌బోర్డుకు రక్తం అంటిందని, 5 గొడ్డలి పోట్లు పడ్డాయని ఎలా చెప్పారని ఆదినారాయణ రెడ్డి ప్రశ్నించారు. ఈ కేసులో వైఎస్ భాస్కర్ రెడ్డితో మాట్లాడి కథ అల్లారన్నారని ఆరోపించారు. అలాగే, వివేకా ఇంటి చుట్టూ కెమికల్స్ చల్లారని సీబీఐ చెప్పిందన్నారు. ‘‘స్పాట్‌లో ఉండే వైఎస్ అవినాష్‌రెడ్డి గుండెపోటు అంటారు. మధ్యాహ్నం ఒంటి గంట తర్వాత ప్రొద్దుటూరు, కమలాపురం ఎమ్మెల్యేలు హత్య అంటారు. 4 గంటలకు జగన్మోహన్ రెడ్డి వచ్చి 5 గొడ్డలి పోట్లు పడ్డాయని చెబుతారు. ఇవన్నీ ఎవరు చెప్పారు? చేసినోళ్లు, చేయించినోళ్లు మాట్లాడుకుని కథలు చెప్పారు. ఉదయం 6.30 గంటలకు ఘటన గురించి బయటికి తెలిస్తే.. సినిమా అంతా అయిపోయాక సీఎం జగన్ అమాయకంగా వచ్చి సాయంత్రం మా మీద నిందలు వేశారు’’ అని ఆరోపించారు.

ఈ కేసులో వైఎస్ అవినాష్ రెడ్డి నిందితుడు అని సీబీఐ చెప్పిందని ఆదినారాయణరెడ్డి తెలిపారు. ఈ కేసులో ఇప్పటికే వైఎస్ భాస్కర్ రెడ్డి, ఉదయ్ కుమార్ రెడ్డిని సీబీఐ అధికారులు అరెస్ట్ చేశారని.. అతి త్వరలో వైఎస్ అవినాష్ రెడ్డిని అరెస్టు చేస్తారని పేర్కొన్నారు. ఒకే తప్పును రెండు మూడు సార్లు చెప్తే నిజం అవుతుందని సీఎం జగన్ అనుకుంటున్నారని ఫైరయ్యారు.

ముఖ్యమంత్రి వైఎస్ జగన్మోహన్ రెడ్డి ఎన్ని కోట్లు సంపాదించినా అసంతృప్తితో ఉంటారని ఆదినారాయణ రెడ్డి అన్నారు. ముఖ్యమంత్రి జగన్ ఇప్పటికే రూ. లక్ష కోట్లు సంపాదించారని.. ఇప్పడు రూ. 10 లక్షల కోట్లు సంపాదించాలని అనుకుంటున్నారని ఆరోపించారు. జగన్మోహన్ రెడ్డికి ముఖ్యమంత్రి పదవి వచ్చిందని తృప్తి లేదని.. ప్రధాన మంత్రి పదవి కూడా కావాలని ఆయనకు ఆశ పుట్టిందన్నారు.