బంగారు గనిలో షార్ట్ సర్క్యూట్‌తో మంటలు,,,పేలుళ్లు సంభవించి లోపలి చిక్కుకున్న కార్మికులు

బంగారు గనుల్లో అగ్ని ప్రమాదం సంభవించి 27 మంది సజీవదహనమైన ఘటన ఆదివారం పెరూలో చోటుచేసుకుంది. దక్షిణ పెరులోని జరిగిన ఈ ప్రమాదానికి షార్ట్ సర్క్యూట్ కారణమని భావిస్తున్నారు. ఇటీవల పెరూలో జరిగిన ఘోరమైన మైనింగ్ దుర్ఘటనలో ఇదీ ఒకటి. ప్రమాదం గురించి తెలిసిన వెంటే తమవారి ఆచూకీ కోసం పెద్ద సంఖ్యలో బాధితులు అక్కడకు చేరుకున్నారు. ‘షార్ట్ సర్క్యూట్ జరిగిందని, దాని కారణంగా పేలుడు సంభవించిందని మాకు తెలుసు.. జరిగినదంతా చూసి మేము చాలా షాక్ అయ్యాం’ అని బాధితుడి సోదరుడు ఒకరు వ్యాఖ్యానించారు.

యెకేపా ప్రాంతంలోని లా ఎస్పెరాంజా గని -1లోని సొరంగంలో మంటలు చెలరేగాయని, దీనికి షార్ట్ సర్క్యూట్ కారణమని పోలీసులు, పబ్లిక్ ప్రాసిక్యూటర్ కార్యాలయం ధ్రువీకరించింది. పబ్లిక్ ప్రాసిక్యూటర్ జియోవన్నీ మాటోస్ ఛానెల్ ఎన్ టెలివిజన్‌తో మాట్లాడుతూ.. గని ప్రమాదంలో 27 మంది చనిపోయారని చెప్పారు. మారుమూల ప్రావిన్సులు కొండేసుయోస్‌లోని బంగారు గనులలో ప్రమాదం సంభవించినట్టు స్థానిక మీడియా వెల్లడించింది. పేలుడు ధాటికి యానాక్విహువా పట్టణంలోని గనిలోని చెక్క సపోర్టులకు మంటలు అంటుకున్నాయని, బాధితులు భూమికి 100 మీటర్ల దిగువన ఉన్నారని తెలిపింది. ఘటన గురించి పూర్తి వివరాలు తెలియాల్సి ఉంది. మృతుల వివరాల గురించి సమాచారం సేకరిస్తున్నట్టు పోలీసులు తెలిపారు.

లోపలి చిక్కుకున్న మృతదేహాలు బయటకు తీసుకొచ్చేందుకు రెస్క్యూ సిబ్బంది ప్రయత్నిస్తున్నారు. ‘చనిపోయిన వారు ఉన్న ప్రదేశాన్ని మనం సురక్షితంగా ఉంచాలి, తద్వారా మనం అందులోకి ప్రవేశించి మృతదేహాలను వెలికి తీయవచ్చు’ అని పోలీసులు పేర్కొన్నారు. మంటలు చెలరేగిన సమయంలో గనిలో ఎంత మంది ఉన్నారనే దాని గురించి ఎటువంటి నిర్ధారణ లేదు. ప్రాణాలతో బయటపడినట్లు ఎటువంటి నివేదికలు లేవు. యానాక్విహువా మేయర్ జేమ్స్ కాస్క్వినో మీడియాతో మాట్లాడుతూ.. చాలా మంది మైనర్లు ఊపిరాడక, కాలిన గాయాలతో చనిపోయారని చెప్పారు.

గతేడాది పెరులో జరిగిన వేర్వేరు మైనింగ్ ప్రమాద ఘటనల్లో 39 మంది చనిపోయారు. లాటిన్ అమెరికాలోని అత్యధికంగా బంగారం ఉత్పత్తి చేసే పెరూలో తరుచూ ఇటువంటి ఘటనలు చోటుచేసుకుంటున్నాయి. మైనింగ్‌లో చిక్కుకున్న తమ బంధువుల వివరాలను సమీపంలోని పోలీస్ స్టేషన్‌కు కుటుంబసభ్యులు అందజేశారు. ఈ దుర్ఘటన జరిగినప్పటి నుంచి మృతదేహాల వెలికితీత, రవాణాపై అంతర్గత, రక్షణ మంత్రిత్వ శాఖలు సమన్వయంతో పని చేస్తున్నాయి. చట్టబద్ధంగా గనులను నిర్వహిస్తోన్న మైనేరా యానాక్విహువా సంస్థ.. పలుచోట్ల అక్రమ కార్యకలాపాలు కూడా నిర్వహిస్తోంది.