రూపాయిల్లో చెల్లింపులతో భారీగా భారతీయ కరెన్సీ

మా బ్యాంకుల్లో పోగులుపడి ఉన్న బిలియన్ల కొద్దీ భారతీయ కరెన్సీ వల్ల ఎటువంటి ఉపయోగం లేకుండాపోతోందని రష్యా విదేశాంగ మంత్రి సెర్గీ లావ్రోవ్ సంచలన వ్యాఖ్యలు చేశారు. గోవా వేదికగా జరుగుతోన్న షాంఘై సహకార సంస్థ సమావేశానికి హాజరైన లవ్రోవ్.. శుక్రవారం ఈ వ్యాఖ్యలు చేశారు. తమ దేశంలో బిలియన్ల కొద్దీ భారతీ కరెన్సీ ఉన్నా వినియోగించులేకపోతున్నామని ఆయన వ్యాఖ్యానించారు. ‘‘ఈ నగదును వినియోగించుకోవాలంటే మరో కరెన్సీ రూపంలో బదిలీ చేయాలి. ఈ అంశంపై ప్రస్తుతం చర్చలు జరుపుతున్నాం’ అని ఆయన పేర్కొన్నారు.

2022-23 ఆర్థిక సంవత్సరంలో రష్యాకు భారత్ ఎగుమతులు కేవలం 2.8 బిలియన్ డాలర్లకు పరిమితం కాగా.. దిగుమతులు ఏకంగా ఐదు రెట్లు పెరిగి 41.56 బిలియన్ డాలర్లకు చేరుకున్నాయి. ఉక్రెయిన్‌తో యుద్ధం నేపథ్యంలో రష్యాపై అమెరికా సహా పశ్చిమ దేశాలు ఆంక్షలు విధించాయి. దీంతో, రష్యా నుంచి తక్కువ ధరకే భారత్ చమురు కొనుగోలు ప్రారంభించింది. ఈ నేపథ్యంలో రష్యా నుంచి భారత్ చమురు దిగుమతులు భారీగా పెరిగాయి. మరోవైపు, డాలర్లలో చెల్లింపులపై కూడా ఆంక్షలు కారణంగా రష్యాకు రూపాయిల్లో భారత్ చెల్లింపులు ప్రారంభించింది.

ప్రస్తుతం భారత్‌లోని ఆయిల్ రిఫైనరీలు రష్యా దిగుమతులపై యూఏఈ దిర్హామ్స్, రూబుల్స్, రూపాయిల్లో చెల్లింపులు జరుపుతున్నాయి. ఇందుకోసం రష్యన్ బ్యాంకుల్లో ప్రత్యేక వాస్ట్రో అకౌంట్లు తెరిచాయి. డేటా ఇంటెలిజెన్స్ సంస్థ వోర్టెక్సా లిమిటెడ్ ప్రకారం.. రష్యా నుంచి భారత్ క్రూడాయిలు దిగుమతులు ఏప్రిల్‌లో రికార్డు స్థాయిలో 1.68 మిలియన్ బ్యారెళ్లకు చేరుకున్నాయి. రష్యన్ బ్యాంకులపై ఆంక్షలు, స్విఫ్ట్‌ వ్యవస్థను ఉపయోగించే లావాదేవీలపై నిషేధం తర్వాత భారతదేశాన్ని జాతీయ కరెన్సీలలో వ్యాపారం చేయమని క్రెమ్లిన్ ప్రోత్సహించింది.

ఆంక్షలు కారణంగా రష్యా వాణిజ్యంలో అసమతుల్యత ఏర్పడిందని, ఫ్రీజ్ చేసిన నిధుల పరిమాణం పదివేల బిలియన్ల డాలర్లకు చేరుకుంటుందని ఆర్థిక అభివృద్ధి మంత్రిత్వ శాఖ ఇనిస్టిట్యూట్ ఆఫ్ ఇంటర్నేషనల్ ఎకనామిక్స్ అండ్ ఫైనాన్స్ డైరెక్టర్ అలెగ్జాండర్ నోబెల్ అన్నారు. ‘భారతదేశం చారిత్రాత్మకంగా అధిక మొత్తం వాణిజ్య లోటు కారణంగా పరిస్థితి తీవ్రతరం చేసింది.. ఇది మూడో దేశంతో పరిష్కారాలను క్లియర్ చేసే అవకాశాలను తగ్గిస్తుంది.’ అని వ్యాఖ్యానించారు.