విమానం డోరు తెరిచిన ప్రయాణికుడు..... 9 మంది ప్రయాణికులు ఆస్పత్రి పాలు.

ఇటీవల విమాన ప్రయాణాల్లో వింత ఘటనలు చోటు చేసుకొంటున్నాయి. తాజాగా విమానం గాల్లో ఉండగా.. ఓ ప్రయణికుడు అకస్మాత్తుగా ఎమర్జెన్సీ డోరు తెరిచాడు. విమానం ల్యాండ్ అయ్యేంత వరకూ ఆ డోరు అలాగే ఓపెన్ చేసి ఉంది. పెను ప్రమాదం తప్పింది. అయితే, గాలి బీభత్సంతో ప్రయాణికులు ఉక్కిరిబిక్కిరయ్యారు. ఈ ఘటనలో 9 మంది ప్రయాణికులు అస్వస్థతకు గురయ్యారు. శ్వాస తీసుకునేందుకు ఇబ్బంది పడుతున్న ఆ తొమ్మిది మందిని.. విమానం ల్యాండ్ అయిన వెంటనే ఆస్పత్రికి తరలించారు. సౌత్ కొరియాకు చెందిన ఏషియానా ఎయిర్‌లైన్స్ ఎయిర్ బస్ ఏ321 విమానంలో ఈ ఘటన చోటు చేసుకుంది. ఘటన జరిగిన సమయంలో విమానంలో మొత్తం 194 మంది ప్రయాణికులు ఉన్నారు.

విమానం కాసేపట్లో ల్యాండ్ అవుతుందనగా.. 30 ఏళ్ల ఓ యువకుడు ఉన్నట్టుండీ విమానం ఎమర్జెన్సీ డోర్ ఓపెన్ చేశాడు. దీంతో గాలి దుమారానికి ప్రయాణికులు అల్లాడిపోయారు. ఆ యువకుడు ఏ కారణంగా విమానం డోరు తెరిచాడో తెలియాల్సి ఉంది. ఈ ఘటనతో ప్రయాణికులు భయాందోళనకు గురయ్యారు.

నిందితుడు విమానం డోరు నుంచి కిందకు దూకేందుకు ప్రయత్నించాడని.. ఎయిర్ హోస్టెస్ పెద్దగా అరవడంతో, విమానంలో ఉన్న కొంత మంది ప్రయాణికులు అప్రమత్తమై అతడిని బిగ్గరగా పట్టుకొని బంధించారని ప్రత్యక్ష సాక్షులు తెలిపారు. ఘటనకు సంబంధించిన వీడియోలు సోషల్ మీడియాలో వైరల్ అవుతున్నాయి.  కాసేపటి తర్వాత విమానాన్ని పైలట్ సురక్షితంగా ల్యాండ్ చేశారని అధికారులు తెలిపారు. నిందితుడు ఎందుకలా చేశాడు? డోరు తెరిచి ఉండగా.. గాలిలో విమానం ఎంత సమయం ప్రయాణించింది? తదితర వివరాలు తెలియాల్స ఉంది. ఈ ఘటనపై దక్షిణ కొరియా మంత్రి స్పందించారు. నిందితుడిని పోలీసులు అదుపులోకి తీసుకొని విచారిస్తున్నారని ఆయన తెలిపారు.

డేగ్ నగరం నుంచి జెజూ నగరానికి వెళ్తున్న విమానంలో ఈ ఘటన జరిగిందని అధికారులు తెలిపారు. ఈ విమాన ప్రయాణికుల్లో 48 మంది అథ్లెట్లు ఉన్నారు. ఎలిమెంటరీ, ప్రాథమికోన్నత పాఠశాల విద్యార్థులైన వీరందరూ ఉల్సాన్‌లో జరుగనున్న నేషనల్ స్పోర్ప్ ఈవెంట్‌లో పాల్గొనేందుకు వెళ్తున్నారని వెల్లడించారు.