పిడుగులతో కూడిన వర్షాలు కురిసే సూచన.... గంగోత్రి, యమునోత్రి యాత్రికులకు ఐఎండీ హెచ్చరికలు

అకాల వర్షాలకు ఉత్తరాఖండ్‌ చిగురుటాకులా వణుకుతోంది.‌ పితోర్‌గఢ్ జిల్లాలో కొండచరియలు విరిగిపడి 300 మందికిపైగా చిక్కుకున్నారు. లఖన్‌పూర్‌లోని లిపులేఖ్-తవాఘాట్ రహదారిపై కొండచరియలు విరిగిపడటంతో 100 మీటర్ల రహదారి కొట్టుకుపోయి.. ధార్చుల, గుంజికి వెళ్లే మార్గం పూర్తిగా ధ్వంసమైంది. భారీ వర్షాలతో వరదలు సంభవించి, కొండచరియలు విరిగిపడుతున్నాయి. దీంతో అనేక నదులు ప్రమాదకరంగా ప్రవహిస్తున్నాయి. కొండచరియలు విరిగిపడటంతో యమునోత్రి, గంగోత్రిలకు వెళ్లే చార్‌ధామ్ యాత్రికులు సహా వందలాది మంది చిక్కుకున్నారు. ఈ క్రమంలో యాత్రికులను తాత్కాలిక ఆశ్రయాల్లో ఉంచి వారికి ఆహారం, తాగు నీరు అందిస్తున్నారు.

పితోర్‌గఢ్ శివార్లలో ధార్చులపైన 45 కిలోమీటర్ల దూరంలో ఉన్న లిపులేఖ్-తవాఘాట్ రహదారిపై లఖన్‌పూర్ సమీపంలో కొండచరియలు విరిగిపడి 100 మీటర్లు మేర రోడ్డు కొట్టుకుపోయింది. దీంతో 300 మందికిపైగా ధార్చుల, గుంజిలో చిక్కుకుపోయారని తెలుస్తోంది. మరోవైపు, విరిగిపడ్డ కొండచరియలను తొలగించి, రహదారిని పునరుద్దరించేందుకు రెస్క్యూ బృందాలు రంగంలోకి దిగాయి. అయితే దీనికి చాలా రోజులు పట్టే అవకాశం ఉంది.

మరోవైపు, ఉత్తరాఖండ్‌లోని అల్మోరా, బాగేశ్వర్, చమోలి, చంపావత్, డెహ్రాడూన్, గర్వాల్, హర్‌ద్వార్, నైనిటాల్, పితోర్‌ఘర్, రుద్రప్రయాగ్, తెహ్రీ గర్వాల్, ఉధమ్ సింగ్ నగర్ ఉత్తరకాశీతో సహా పలు జిల్లాలకు ఐఎండీ తుఫాను హెచ్చరికలు చేసింది. ఉరుములు, పిడుగులతో కూడిన భారీ వర్షాలు కురుస్తాయని పేర్కొంది. ఈ నేపథ్యంలో యమునోత్రి, గంగోత్రి ధామ్ యాత్రకు వెళ్లే భక్తులకు వాతావరణ సూచనలను చేసిన అధికారులు.. ఆయా ప్రాంతాలకు వెళ్లేవారు రెయిన్ కవర్లు, గొడుగులు, వెచ్చని దుస్తులతో సిద్ధంగా ఉండాలని సూచించారు.

అలాగే, యాత్రికులు సురక్షిత ప్రదేశాలలో ఉండాలని, అనవసరంగా ప్రయాణించవద్దని కోరుతున్నారు. ‘యాత్రికులు సురక్షిత ప్రదేశాల్లో ఉండాలి.. అనవసర ప్రయాణాలు చేయొద్దు.. వాహనాలను సురక్షిత ప్రాంతాల్లో నిలిపి ఉంచాలి.. వాతావరణం అనుకూలించన తర్వాత మాత్రమే ప్రయాణం మొదలుపెట్టాలి..’అని అధికారులు స్పష్టం చేశారు.