గృహలక్ష్మీ పథకంకు ప్రతిపాదనలు రూపొందించిన కర్ణాటక సర్కార్

ఎన్నికల్లో ఇచ్చిన హామీల అమలు దిశగా కర్నాటక  సర్కార్ అడుగులేస్తోంది. గృహలక్ష్మీ పథకం కింద ప్రతి ఇంటిలోని మహిళా కుటుంబ పెద్దకు నెల నెల రూ.2,000 చొప్పున ఆర్ధిక సాయం అందజేసే పథకానికి కర్ణాటక ప్రభుత్వం ప్రతిపాదనలు చేసింది. అయితే, ఈ పథకం చాలా ఇళ్లలో అత్తాకోడళ్ల మధ్య చిచ్చుపెడుతోంది. ప్రభుత్వం అందజేసే రూ.2,000 ఎవరికి అందుతుందనేది పెద్ద సమస్యగా మారింది. మహిళా కుటుంబ పెద్దకు నెలవారీ ఆర్ధిక సాయం అందజేస్తామని హామీ ఇచ్చిన కాంగ్రెస్ ఎన్నికల మేనిఫెస్టోలో స్పష్టమైన అర్హత ప్రమాణాలు లేకపోవడం వల్ల కుటుంబాల్లో గందరగోళం మరింత పెరిగింది.

ఈ విషయమై మహిళా, శిశు అభివృద్ధి శాఖ మంత్రి లక్ష్మీ హెబ్బాల్కర్‌ను ప్రశ్నించగా.. ఆర్ధిక సాయం ఎవరికి చెందుతుందనేది కుటుంబం తీసుకునే నిర్ణయం అని చెప్పారు. అయితే భారతీయ సంప్రదాయం మహిళా కుటుంబ పెద్దగా అత్తను పరిగణిస్తున్నందున ఆమె అర్హురాలని మంత్రి స్పష్టం చేశారు. ఒకవేళ ఆమె అంగీకరిస్తే కోడలికి ఇవ్వొచ్చని హెబ్బాల్కర్ అన్నారు. పీడబ్ల్యూడీ మంత్రి సతీశ్ జార్ఖిహోళి కూడా ఇదే అభిప్రాయం వ్యక్తం చేశారు. మహిళా, శిశు అభివృద్ధి సంక్షేమ శాఖ మంత్రి అభిప్రాయంతో ఏకీభవించారు.

కుటుంబ పెద్ద ఎవరు అనే విషయంలో ఏకాభిప్రాయం లేకపోతే సాయాన్ని అత్త, కోడలు సమానంగా పంచుకోవాలని మహిళా హక్కుల కార్యకర్తలు చెబుతున్నారు. ఇలా చేస్తే కుటుంబంలో సమస్యలు ఉండవని మహిళా హక్కుల కార్యకర్త సి నాగరత్న అన్నారు. ఈ విషయంలో ఏకపక్షంగా నిర్ణయం తీసుకోవడం చాలా కష్టమని, అత్త, కోడలు ఇద్దరికీ ప్రభుత్వం సొమ్ము ఇవ్వాలని మరో కార్యకర్త తెలిపారు.

మరోవైపు, శిశు అభివృద్ధి శాఖ ఇంకా విధివిధానాలపై చర్చించనందున పథకం అమలులో నిబంధనలు, షరతుల గురించి మాట్లాడటం చాలా తొందరపాటు అవుతుందని హెబ్బాల్కర్ అన్నారు. గురువారం నాటి కేబినెట్ సమావేశం తర్వాత కొంత స్పష్టత వస్తుందని ఆమె తెలిపారు. ఇదిలా ఉండగా ఎన్నికల సమయంలో ప్రకటించిన ‘గ్యారెంటీ’ హామీలపై మేధోమథనం మొదలైంది. ఆ పథకాలను అమలు చేయడానికి కాంగ్రెస్‌ సర్కారు పడుతున్న పాట్లు అన్నీ ఇన్నీ కావు. ప్రభుత్వం ఏర్పాటైన తొలిరోజే ఈ పథకాలను అమలు చేస్తామన్న సిద్ధరామయ్య సర్కారు.. ఆర్థిక వ్యవహారాల కారణంగా సాహసించలేకపోయింది. ఆపై తొలి క్యాబినెట్ సమావేశం ఏర్పాటు చేసినా అప్పటికి పూర్తిస్థాయి మంత్రివర్గం రూపుదిద్దుకోలేదు. ఓవైపు, విపక్షాల విమర్శలు, ప్రజల నుంచి పెరుగుతున్న ఒత్తిడి నుంచి బయటపడేందుకు తీవ్రంగా శ్రమిస్తున్న సర్కారు ఆ ప్రకటన చేసే ముందు లోతైన విశ్లేషణ చేస్తోంది. జూన్‌ నుంచే ఉచిత పథకాలు పట్టాలెక్కుతాయని రాష్ట్ర ప్రజలు ఆశించినా ఇంకా ముహూర్తం కలిసిరాలేదు.