నాకూ బెయిల్ ఇవ్వండి.... కోర్టును ఆశ్రయించిన వై.ఎస్.భాస్కర్ రెడ్డి

మాజీ మంత్రి వైఎస్‌ వివేకానందరెడ్డి హత్య కేసులో ఆరోపణలు ఎదుర్కొంటున్న కడప వైఎస్సార్ గ్రెస్ పార్టీ ఎంపీ వైఎస్ అవినాష్ రెడ్డికి ఇప్పటికే ముందస్తు బెయిల్ మంజూరైంది ఈ క్రమంలో వివేకా హత్య కేసులో అరెస్టయిన ఎంపీ అవినాష్‌ రెడ్డి తండ్రి వైఎస్ భాస్కర్‌ రెడ్డి గురువారం సీబీఐ కోర్టులో బెయిల్‌ పిటిషన్ దాఖలు చేశారు. గత నెల మే 16వ తేదీ నుంచి హైదరాబాద్‌లోని చంచల్‌గూడ జైల్లో ఉన్న భాస్కర్‌రెడ్డి బెయిల్‌ ఇవ్వాలని పిటిషన్‌లో కోరారు.

ఈ సందర్భంగా వైఎస్ భాస్కర్‌ రెడ్డి అరెస్టు సందర్భంగా సీబీఐ అధికారులు కోర్టుకు సమర్పించిన రిమాండ్‌ రిపోర్టులో పలు కీలక అంశాలు పేర్కొన్నారు. ఈ కేసులో కీలక సాక్షులను అనుచరుల ద్వారా ప్రభావితం చేస్తున్నారని.. దర్యాప్తును తప్పుదోవ పట్టించేందుకు వైఎస్ భాస్కర్‌రెడ్డి ప్రయత్నించారని తెలిపారు. అలాగే, విచారణకు సహకరించడం లేదన్నారు. అందుకే విచారణకు అందుబాటులో లేకుండా పోయే ప్రమాదం ఉందనే అరెస్టు చేశామని తెలిపారు.

చివరికి, విచారణను కూడా తప్పుదోవ పట్టించేలా వైఎస్ భాస్కర్‌రెడ్డి జవాబులు ఇచ్చారని సీబీఐ అధికారులు కోర్టుకు చెప్పారు. వైఎస్‌ వివేకానందరెడ్డిపై భాస్కర్‌ రెడ్డి కుటుంబం అసంతృప్తితో ఉందని.. 2017లో జరిగిన ఎమ్మెల్సీ ఎన్నికల నుంచి వీరి మధ్య వివాదం ఉందని పేర్కొన్నారు. హత్యాస్థలంలో ఆధారాలు చెరిపేయడంలో వైఎస్ భాస్కర్‌రెడ్డిది కీలక పాత్ర అని.. నెల రోజులకు ముందే వివేకా హత్యకు కుట్రపన్నారని తెలిపారు. వైఎస్ భాస్కర్‌ రెడ్డి ఆదేశాలతోనే హత్యకు కుట్ర జరిగిందని వివరించారు. వివేకా హత్యలో సహ నిందితులకు పెద్ద మొత్తంలో డబ్బు అందిందని చెప్పారు. ఈ కేసులో సీఐ శంకరయ్యను భాస్కర్‌రెడ్డి బెదిరించారని సీబీఐ అధికారులు రిమాండ్‌ రిపోర్టులో పేర్కొన్న విషయం తెలిసిందే.