చెవులు పగిలిపోయేలా,,,భూమి నుంచి వస్తున్న వింత శబ్దాలతో గ్రామస్థుల్లో భయం

భూమి నుంచి వస్తున్న భీకర శబ్దాలు కేరళ వాసులకు నిద్ర పట్టకుండా చేస్తున్నాయి. కొట్టాయం జిల్లాలోని చెన్నపాడి అనే చిన్న గ్రామంలో ఈ శబ్దాలు వచ్చినట్లు స్థానికులు తెలిపారు. గ్రామంలోని పలు చోట్ల వింత వింతగా భారీ శబ్దాలు వినిపిస్తున్నట్లు గ్రామస్థులు వెల్లడించారు. అయితే ఇవి వీటి వెనక ఉన్న కారణమేంటో తెలియక స్థానికులు తలలు పట్టుకుంటున్నారు. అయినప్పటికీ ఈ మిస్టరీ ధ్వనులకు కారణమేంటన్నది అంతు చిక్కడం లేదు. దీంతో నిపుణులు రంగంలోకి దిగనున్నారు. గత కొద్ది రోజులుగా ఇలాగే వరుస ఘటనలు చోటుచేసుకోవడంతో స్థానికులను భయభ్రాంతులకు గురి చేస్తున్నాయి.

మొదట్లో అంతగా పట్టించుకోని గ్రామస్థులు వరుసగా జరుగుతుండటంతో భయానికి లోనయ్యారు. వెంటనే అధికారులకు సమాచారం అందించారు. దీంతో అప్రమత్తమైన స్థానిక యంత్రాంగం.. ఈ మిస్టరీ శబ్దాలకు కారణాలను తెలుసుకునేందుకు నిపుణులను రంగంలోకి దించింది. చెన్నపాడి గ్రామంలో శుక్రవారం తెల్లవారుజామున రెండుసార్లు భారీ శబ్దాలు వినిపించినట్లు స్థానికులు తెలిపారు. చెవులు పగిలిపోయేలా ధ్వనులు వచ్చినట్లు పేర్కొన్నారు. రెండు మూడు రోజు క్రితం కూడా చెన్నపాడి గ్రామంతో పాటు చుట్టుపక్కల ప్రాంతాల్లోనూ ఇలాంటి శబ్దాలే వినిపించినట్లు చెప్పారు. వాతావరణంలో ఎలాంటి మార్పులు లేకున్నా.. భారీ ధ్వనులు వస్తుండటంతో గ్రామస్థులు ఏం చేయాలో తెలియక తీవ్ర ఆందోళనకు గురవుతున్నారు.

ఈ ఘటనపై కేరళ గనులు, భూగర్భ శాఖ అధికారులు స్పందించారు. త్వరలోనే నిపుణుల బృందం చెన్నపాడి ప్రాంతంలో పర్యటించి పరిశోధనలు చేస్తుందని తెలిపారు. కొన్నిరోజుల క్రితం మొదటిసారి శబ్దాలు వచ్చినపుడే ఆ ప్రాంతాన్ని తమ అధికారుల బృందం పరిశీలించిందని ఉన్నతాధికారులు చెప్పారు. ఆ సమయంలో ధ్వనుల ఆనవాళ్లు ఏమీ లభించలేదని పేర్కొన్నారు. అయితే శుక్రవారం కూడా ఇలాంటి భారీ శబ్దాలే వచ్చినట్లు తమకు సమాచారం వచ్చిందని తెలిపారు. త్వరలోనే సెంటర్‌ ఫర్‌ ఎర్త్‌ సైన్సెస్‌ బృందం అక్కడకి వెళ్తుందని స్పష్టం చేశారు. నిపుణుల బృందం అధ్యయనం పూర్తైన తర్వాత ఆ ధ్వనులు ఎక్కడి నుంచి వస్తున్నాయి ? ఎందుకు వస్తున్నాయి ? అనేదానిపై స్పష్టత వస్తుందని వివరించారు.

ఇంతకుముందు మహారాష్ట్రలోనూ ఇలాంటి ఘటనలు జరిగాయి. లాతూర్‌ జిల్లా పరిధిలో గల కొన్ని గ్రామాల్లోనూ భూమి నుంచి భారీగా వింత శబ్దాలు వినిపించినట్లు అక్కడి వారు తెలిపారు. అప్పట్లో లాతూర్ జిల్లాలో నిపుణుల బృందం అధ్యయనం చేసినప్పటికీ.. అవి ఎక్కడి నుంచి వచ్చాయన్నది మాత్రం గుర్తించలేకపోయారు. దీంతో తెలియని శబ్దాలతో ప్రజలు తీవ్ర భయాందోళనలకు గురవుతున్నారు.