తల్లి బతికుండగానే,,,కన్నతల్లికి గుడి, ఆ గుడిలో పాలరాతి విగ్రహం.

అమ్మపై ప్రేమతో తమిళనాడుకు చెందిన ఓ యువకుడు తన తల్లికి గుడి కట్టించాడు. అందులో ఆమె పాలరాతి రూపాన్ని విగ్రహంగా ప్రతిష్టించి పూజలు చేస్తున్నాడు. అమ్మ బతికుండగానే.. ఇదంతా చేశాడు. ఒక అమ్మకు.. ఏ కుమారుడూ ఇవ్వని సంతోషాన్ని ఇచ్చాడు. అలాగని అతడు బాగా ఉన్నవాడేమో అనుకుంటే పొరపాటే. బతుకుదెరువు కోసం వెల్డింగ్ పనులు చేసే ఆ యువకుడు రూపాయి, రూపాయి పోగు చేసి.. ఆ డబ్బులతో అమ్మకు గుడి కట్టించాడు. ఇప్పుడా విగ్రహం, ఆలయం.. ఆ అమ్మను మాత్రమే కాదు, యావత్ దేశాన్ని కదిలిస్తోంది.

అమ్మ చూపించే ప్రేమ, ఆప్యాయత.. పిల్లల కోసం ఆమె చేసే త్యాగం, సేవ ముందు అన్నీ దిగదిడుపే. కొంత మందికి అమ్మ లేని రోజునే ఆ లోటేంటో తెలుస్తుంది. అది ఏం చేసినా పూడ్చలేనిదని అర్థమయ్యేసరికి చాలా ఆలస్యం అవుతుంది. తమిళనాడులోని నమక్కల్‌కు చెందిన ప్రభు (30 ఏళ్లు) ఇప్పుడా బాధ లేదు. తమ కోసం తన తల్లి ఎంత కష్టపడిందో అర్థం చేసుకున్న అతడు.. ఆమెను గుండెల్లో పెట్టుకొని పూజించడమే కాదు, గుడి కట్టించి ఆరాధిస్తున్నాడు.

దురదృష్టవశాత్తూ భర్తను కోల్పోతే.. ఆ మహిళ ఎన్ని ఇబ్బందులు ఎదుర్కొవాల్సి వస్తుంది? పిల్లలను పెంచేందుకు, కుటుంబాన్ని పోషించేందుకు ఆమె ఎంత కష్టపడాల్సి వస్తుంది? ఆ పరిస్థితిని ఊహించుకుంటేనే కళ్లు చెమర్చుతాయి. ప్రభు తల్లి కూడా ఇలాంటి కష్టాలనే మోశారు.

తమ కోసం అమ్మ ఎంత కష్టపడుతుందో చిన్నతనంలో తనకు తెలిసేది కాదని ప్రభు చెబుతున్నాడు. యుక్త వయసుకు వచ్చాక, తన చదువు పూర్తై పనిలో కుదిరాక.. అది ఎంత కష్టమో అర్థమయ్యిందని చెబుతున్నాడు. తండ్రి లేని తమకు ఏ లోటూ లేకుండా చూసుకునేందుకు ఆమె ఎన్ని కష్టాలు పడిందో ఊహించుకుంటుంటే.. గుండె చెరువవుతోందని చెప్పాడు. తమ కోసం అంతలా కష్టపడిన అమ్మకు ఏదైనా చేయాలని కొన్నేళ్ల కిందటే నిర్ణయించుకున్నానని ప్రభు తెలిపాడు. ఆమెకు గుడి కట్టించడమే సరైందిగా భావించానని అతడు చెప్పాడు. ఇక నాటి నుంచి ఆ గుడి నిర్మాణం కోసం డబ్బులు పోగు చేశానని వివరించాడు.