సీట్లు సర్దుబాటుపై నాదెండ్ల మనోహర్ కీలక వ్యాఖ్యలు

టీడీపీ, జనసేన మధ్య సీట్ల సర్దుబాటుపై పవన్, చంద్రబాబు చర్చించుకుంటారని  జనసేన రాజకీయ వ్యవహారాల కమిటీ ఛైర్మన్ నాదెండ్ల మనోహర్ తేల్చిచెప్పారు. గుంటూరు జిల్లా తెనాలిలో ఆయన మీడియాతో మాట్లాడుతూ.. వచ్చే ఎన్నికల్లో తాను ఎక్కడ నుంచి పోటీ చేస్తాననే దానిపై కూడా క్లారిటీ ఇచ్చారు. తాను తెనాలి నియోజకవర్గం నుంచే పోటీ చేస్తానని, అందులో ఎలాంటి అనుమానం లేదని తెలిపారు. తెనాలిని నమూనా నియోజకవర్గంగా తీర్బిదిద్దటం తన కల అని చెప్పిన నాదెండ్ల.. దానిని ఖచ్చితంగా తాను సాకారం చేస్తానన్నారు. రానున్న ఎన్నికల్లో వైసీపీ పాలనకు చరమగీతం పాడాల్సిందేనని అన్నారు.

రాష్ట్ర రాజధాని కోసం భూములు ఇచ్చిన అమరావతి రైతుల త్యాగాలను ప్రభుత్వం అవమానిస్తుందని, జగన్ సర్కార్ చేస్తున్న పనులు దారుణంగా ఉన్నాయని నాదెండ్ల మనోహర్ ఆరోపించారు. కరెంట్ బిల్లుల పెంపు, పన్నులు, చల్లాన్లతో ప్రభుత్వం దోపిడీ చేస్తోందని విమర్శించారు. వైసీపీ విముక్త ఏపీ కోసం అందరూ కృషి చేయాలని సూచించారు. జగన్ పాలనను అంతమొందించి ప్రజల పాలన తీసుకురావాలని తెలిపారు.

అయితే వచ్చే ఎన్నికల్లో టీడీపీ, జనసేన పొత్తు దాదాపు ఖాయమవ్వగా.. సీట్ల సర్దుబాటు గురించి తెరవెనుక చర్చలు సాగుతున్నాయి. తెనాలి నుంచి తాను పోటీ చేయడం ఖాయమని నాదెండ్ల మనోహర్ ప్రకటించడంతో.. ఆ సీటు జనసేనకు ఫిక్స్ అయినట్లు తెలుస్తోంది. అలాగే ఇటీవల సత్తెనపల్లి టీడీపీ ఇంచార్జ్‌గా కన్నా లక్ష్మీనారాయణను అవకాశం ఇవ్వడంతో.. ఈ సీటు నుంచి టీడీపీ అభ్యర్థి పోటీ చేస్తారనేది స్పష్టమైంది. ఇలా సీట్ల విషయంకు సంబంధింది అధికారికంగా బయటకు ప్రకటించకపోయినా.. అంతర్గంగా టీడీపీ, జనసేన పార్టీలు ఒక అవగాహనకు వస్తున్నట్లు తెలుస్తోంది.