పెళ్లి చేసుకుంటానని ప్రొఫెసర్ అత్యాచారం,,,బాధితురాలి ఫిర్యాదుతో పోలీసులు కేసు నమోదు

అత్యాచారానికి గురైన బాధితురాలి జాతకంలో కుజ దోషం ఉందో లేదో తేల్చాలని అలహాబాద్ హైకోర్టు వెలువరించిన అసాధారణ ఆదేశాలపై సుప్రీంకోర్టు తీవ్రంగా స్పందించింది. ఈ ఉందతంపై సుమోటాగా విచారణ చేపట్టిన సర్వోన్నత న్యాయస్థానం.. హైకోర్టు తీరుపై మండిపడింది. అత్యాచార ఆరోపణలు ఎదుర్కొంటున్న నిందితుడి బెయిల్ పిటిషన్ విచారణ సందర్భంగా బాధితురాలికి కుజదోషం ఉందో? లేదో? తెలుసుకోవాలని జ్యోతిషుడి నివేదిక కోరడంపై తీవ్ర అభ్యంతరం వ్యక్తం చేసింది. లక్నో యూనివర్సిటీ జ్యోతిశ్శాస్త్ర విభాగాధిపతికి అలహాబాద్‌ హైకోర్టు జారీ చేసిన అసాధారణ ఆదేశంపై సుప్రీంకోర్టు స్టే విధించింది.

ఈ ఉదంతంపై శనివారం సుమోటోగా విచారణ చేపట్టిన ప్రధాన న్యాయమూర్తి జస్టిస్ డీవై చంద్రచూడ్ ధర్మాసనం.. బెయిలు దరఖాస్తును విచారించేటప్పుడు జ్యోతిషుడి నివేదికను కోరడమెందుకో అర్థం కావడం లేదని వ్యాఖ్యానించింది. పెళ్లి చేసుకుంటానని చెప్పి అత్యాచారం చేసిన వ్యక్తిని పోలీసులు అరెస్ట్ చేయగా.. అతడు బెయిలు కోసం అలహాబాద్ హైకోర్టును ఆశ్రయించాడు. విచారణ సందర్బంగా నిందితుడి తరఫున లాయర్.. బాధితురాలికి మంగళ దోషం ఉంది కాబట్టి తన క్లయింటు ఆమెను పెళ్లిచేసుకోలేడని వాదించారు.

అయితే, బాధితురాలికి అలాంటి దోషం లేదని ఆమె తరఫున న్యాయవాది వివరించారు. ‘హిందూ సంప్రదాయంలో జ్యోతిషం ప్రకారం వధూవరులలో ఒకరికి మంగళ దోషం (కుజదోషం) ఉండి రెండో వారికి లేకపోతే అది అరిష్టం.. వారిద్దరూ వివాహం చేసుకోరాదని కొన్ని వర్గాలు నమ్ముతాయి.. కాబట్టి ఇద్దరి జాతకాలను పరిశీలించి 10 రోజుల్లో సలహా చెప్పాలి’ అని లక్నో విశ్వవిద్యాలయ జ్యోతిశాస్త్ర విభాగాధిపతిని అలహాబాద్ హైకోర్టు కోరింది. దీనిపై ఇరుపక్షాల సమ్మతితోనే హైకోర్టు ఇటువంటి ఆదేశం పంపిందని పిటిషనర్‌ తరఫు న్యాయవాది సుప్రీంకోర్టుకు విన్నవించారు.

ఈ సందర్భంగా ఈ వ్యవహారాన్ని చూశారా అని? సోలిసిటర్‌ జనరల్‌ తుషార్‌ మెహతాను సీజేఐ చంద్రచూడ్ ప్రశ్నించగా... ‘చూశాను, దీనిపై స్టే ఇవ్వండి’ అని ఆయన సూచించారు. ఈ విషయంలో వ్యక్తిగత గోప్యతా రక్షణతో పాటు పలు అంశాలు ఇమిడి ఉన్నాయని సుప్రీంకోర్టు వ్యాఖ్యానించింది. అలహాబాద్‌ హైకోర్టు ఉత్తర్వులపై స్టే విధిస్తూ విచారణను జులై 10కి వాయిదా వేసింది. ఇదే కేసును అలహాబాద్‌ హైకోర్టు జూన్‌ 26కు విచారణను వాయిదా వేసింది. నిందితుడు అలహాబాద్ యూనివర్సిటీలో ప్రొఫెసర్‌గా పనిచేస్తున్నాడు.