షాపింగ్ మాల్‌కు వెళ్లితే... ఉంగరం మాయమైంది

షాపింగ్ మాల్‌కు వెళ్లిన ఓ మహిళ రూ. 5 లక్షల విలువైన తన ఉంగరాన్ని పోగొట్టుకుంది. ఈ ఘటన జరిగిన సమయంలో షాపింగ్ మాల్.. వినియోగదారులతో కిక్కిరిసిపోయి ఉంది. ఇంటికి తిరిగెళ్లిన తర్వాత తన రింగ్ లేనట్లు గుర్తించిన సదరు మహిళ.. భర్తతో కలిసి పోలీసులను ఆశ్రయించింది. పోలీసులు కేవలం 6 గంటల్లోనే ఆమె రింగ్‌ను గుర్తించి ఇచ్చారు. ఉత్తర్‌ ప్రదేశ్‌లోని నోయిడాలో ఈ ఘటన చోటు చేసుకుంది. ఆమె తన రింగ్ ఎక్కడ పెట్టి మర్చిపోయింది? పోలీసులు ఎలా పట్టిచ్చారు?

ఢిల్లీలోని షాహదారాకు చెందిన ఓ మహిళ తన కుమారుడితో కలిసి నోయిడాలోని ‘మాల్ ఆఫ్ ఇండియా’కు షాపింగ్‌కు వెళ్లింది. ఆ సమయంలో తన చేతివేలికి రూ. 5 లక్షల విలువైన ఉంగరం ధరించి ఉంది. ఆమె భర్త రియల్ ఎస్టేట్ డెవలపర్. షాపింగ్ మాల్‌లో ఆమె తన తన బిడ్డ డైపర్ మార్చడానికి వాష్‌రూమ్‌కి వెళ్లినప్పుడు 70 వజ్రాలు పొదిగి ఉన్న ఆ ఉంగరాన్ని అక్కడ పెట్టి మర్చిపోయింది.

ఇంటికి వచ్చిన తర్వాత తన ఉంగరం పోయిందని గుర్తించిన ఆ మహిళ, భర్త సాయంతో అత్యవసర సాయం కోసం 112కి డయల్ చేసింది. దీంతో నోయిడా పోలీసులు రంగంలోకి దిగారు. పోలీసులు షాపింగ్ మాల్‌లోని సీసీటీవీ ఫుటేజీలన్నింటినీ స్కాన్ చేశారు. మహిళ తన వేలి నుంచి ఉంగరాన్ని ఎప్పుడు తీసివేశారో గుర్తించారు. ఆమె తన బిడ్డను వాష్‌రూమ్‌కు తీసుకెళ్లిన సమయంలో చేతికి ఉన్న ఉంగరాన్ని తీసి, వాష్‌రూమ్‌లోని సింక్‌పై ఉంచినట్లు నిర్ధారించారు.

వాష్‌రూమ్‌లో ఉన్న మరో మహిళకు ఆ ఉంగరం కనిపించింది. బిడ్డకు డైపర్ మారుస్తున్న మహిళతో ఆమె ఏదో మాట్లాడుతూ.. ఆ ఉంగరాన్ని తన వెంట తీసుకెళ్లింది. మరోవైపు.. ఓ పోలీసుల బృందం ఉంగరం కోసం షాపింగ్ మాల్‌ను జల్లెడ పట్టింది. ఆదివారం కావడంతో అక్కడ రద్దీ ఎక్కువగా ఉంది. సాయంత్రం నుంచి మొదలుపెట్టి షాపింగ్ మాల్ మూసివేసే సమయం వరకూ వెతికారు.

ఈలోగా.. సీసీటీసీ ఫుటేజీలను పరిశీలిస్తున్న మరో బృందం.. వాష్‌రూమ్ నుంచి తనతో పాటు ఉంగరాన్ని తీసుకున్న మహిళ పార్కింగ్ ఏరియాలోని తన కారులో షాపింగ్ మాల్ నుంచి బయటకు వెళ్లడాన్ని గుర్తించింది. వెంటనే ఆ కారు నంబర్‌ను ట్రాక్ చేసి ఆమె చిరునామాను తెలుసుకున్నారు. తనతో పాటు ఉంగరం తీసుకెళ్లిన మహిళ ఢిల్లీలోని గణేష్ నగర్ ప్రాంతంలో నివసిస్తున్నట్లు గుర్తించిన పోలీసులు.. ఒక బృందాన్ని ఆ చిరునామాకు పంపించారు. అప్పటికి సమయం ఉదయం 5 గంటలు అవుతోంది. పోలీసులు ఆ తలుపు తట్టి, ఉంగరం గురించి ప్రశ్నించగానే.. ఆమె ఆ ఉంగరాన్ని తీసుకొచ్చి వారికిచ్చారు. వెంటనే వాళ్లు దాన్ని యజమానికి అప్పగించారు. ఉంగరాన్ని ఎవరు తీసుకున్నారు? దాన్ని వాళ్లు ఎలా రికవరీ చేశారో వివరించారు. అప్పుడు గానీ ఆమెకు బల్బు వెలగలేదు!

ఉంగరాన్ని గమనించిన ఆ మహిల.. బిడ్డకు డైపర్‌ని మారుస్తున్న మహిళను ఉద్దేశించి ‘ఇది మీదా?’ అని అడిగారు. తన చేతి ఉంగరాన్ని తీసి పక్కనబెట్టిన విషయం మర్చిపోయిన ఆ మహిళ ‘లేదు’ అని సమాధానం చెప్పింది. ఇంటికెళ్లిన తర్వాత తన ఉంగరం విషయం గుర్తుకొచ్చి నానా హంగామా చేసింది. అయితే, ఆ కంగారులో.. సదరు మహిళ అన్న మాటలను మాత్రం గుర్తుకుతెచ్చుకోలేకపోయింది. తన ఉంగరం మర్చిపోయి ఎంత రభస చేసింది? ఓ సామాన్యురాలు విలువైన వస్తువును పోగొట్టుకుంటే.. పోలీసులు ఇలాగే వెతికి పెట్టేవారా..? - ఈ ఎంటైర్ ఎపిసోడ్ తర్వాత చాలా మంది వేసుకుంటున్న ప్రశ్న ఇదే! మీరేమంటారూ..?